როგორც ოჯახის წევრები ამბობენ, რომ არა მეზობელი, რომელიც მათდა ბედად, სამსახურში გამოიძახეს შუაღამისას, ისე ჩაიწვებოდნენ სახლთან ერთად, ვერც თვითონ და ვერც მეზობლები ვერაფერს გაიგებდნენ.
ოჯახში 6 სული ცხოვრობს. ისინი ამჯერად მეზობლების იმედად არიან დარჩენილები. სახლისგან მხოლოდ კიბე გადარჩა, დანარჩენი _ დაწყებული საყოფაცხოვრებო ნივთებით და დოკუმენტებით, დამთავრებული შინაურ ფრინველებით, სულ რაღაც ნახევარ საათში განადგურდა.
ოჯახის ერთ-ერთი წევრი ნანი კვაჭაძე: “ღამის სამის ნახევარი იქნებოდა, როცა გავიგეთ, რომ სახლს ცეცხლი ეკიდა. მეზობელმა დაინახა, სახლიდან კვამლი რომ გამოდიოდა. ყველას გვეძინა. არ ვიცით, ცეცხლი რამ გააჩინა _ შუქი არ იყო არც დღისით და არც ღამით. რძალი თითქმის გაგუდული იყო ბოლისგან. მოვიყვანეთ აზრზე და გამოვიქეცით ყველა. ტანსაცმლის ჩაცმაც კი ვერ მოვასწარით _ ღამის პერანგების ამარა გამოვცვივდით გარეთ. გამოვედით თუ არა კიბეზე, იატაკი ჩავარდა. საყოფაცხოვრებო ნივთებიც კი განადგურდა.
სოციალურად დაუცველები ვართ, დახმარებას ვიღებდით და იმის გამო, რომ საბუთებიც ცეცხლმა გაგვინადგურა, შეგვიჩერდა. პირადობის მოწმობის გარეშე ვინ რას მოგვცემს?! საჭმელს იმით ვყიდულობდით. იყვნენ გამგეობიდან, დაგვპირდნენ დახმარებას.”
თვალცრემლიანი ნანი კვაჭაძე იმასაც იხსენებს, როგორ ჩაიწვა სახლთან ერთად შინაური ფრინველი: “სახლი ორსართულიანი იყო. მეორე სართული ხის, ბოძებზე შემდგარი, ქვედა სართულზე საკუჭნაოდ და ფრინველების დასაბუდრებად ვიყენებდით. მქონდა 3 ტომარა პურის ფქვილი, იხვის ჭუკები და ქათმები ქვედა სართულზე მყავდა, ყველაფერი დაიწვა სახლთან ერთად _ 8 წიწილი გადარჩა მხოლოდ. სახანძრო გამოიძახა ჩემმა მეზობელმა. ორი მანქანა მოვიდა, მაგრამ რას უშველიდა _ სახლი ძალიან მალე დაიწვა.”
ბაჩანა კვაჭაძე ჯურუყვეთის თემის რწმუნებული: “დაჰპირდნენ, რომ სამასალედ გამოუყოფენ ჩვენთან ტყე კაფში ხეებს. ამ ეტაპზე მხოლოდ ეს არის. გამგებლის მოვალეობის შემსრულებელმა და საკრებულოს თავმჯდომარემ თქვეს, პერმანენტულად გავაგრძელებთ დახმარებასო. რთულ მდგომარეობაშია ეს ოჯახი _ ღია ცის ქვეშ დარჩა 6 ადამიანი, თავშესაფარიც არ აქვთ, მეზობლებში არიან გადანაწილებული. სოციალურად დაუცველია, იმის გამო, რომ დოკუმენტაცია დაეწვათ, პრობლემები შეგვექმნა _ განცხადებასაც ვერ წერენ, დახმარებაც ვერ აიღეს. ვიცი, რომ 29-ში ქალბატონ ნანის პირადობის მოწმობა მზად იქნებ და დაიძვრება საქმე. სოფელიც გვერდში უდგას.“
“მართალია სოფელი გვერდში გვიდგას, მაგრამ ხალხს რა უნდა მოსთხოვო? ყველას კარგად მოგვეხსენება, ლანჩხუთის რაიონი როგორი შეჭირვებულია. გარდა ამისა, აქვე, მეზობელს, ერთი წელი არა გასული, რაც სახლი დაეწვა და რამდენი ქნან ამ მეზობლებმა? ხალხისგან გაღებული შესაწირავი ჩვენთვის ბევრს ნიშნავს. ადგილობრივ ხელისუფლებას რაც შეეხება, ჩვენს რწმუნებულთან ერთად იმავე დღეს მოგვინახულეს საკრებულოს თავმჯდომარემ ამირან გიგინეიშვილმა და სოფლის მაჟორიტარმა დეპუტატმა. დაპირებები არის, თანხის მოცემასაც შეგვპირდნენ, რამდენს მოგვცემენ, არ უთქვამთ. თუმცა, ჯერ არაფერი გაუკეთებიათ. ვნახოთ, რა იქნება,” _ ამბობს ოჯახის წევრი ზოია აბუსერიძე.
საკრებულოს თავმჯდომარის ამირან გიგინეიშვილის თქმით, საკრებულო, ამ ეტაპზე, დაზარალებულ ოჯახს 1 000 ლარით დაეხმარება.
სტატია მომზადებულია ფონდის “ღია საზოგადოება _ საქართველოს” მიერ დაფინანსებული პროექტის _ “დათვალე საკუთარი ფული!”, ფარგლებში და მასში გამოთქმული მოსაზრება არ გამოხატავს ფონდის პოზიციას.
