“ყველა დარღვევა გადაგზავნილი გვაქვს შესაბამის ორგანოებში _ ზოგი პროკურატურაში, ზოგიც ფინანსთა სამინისტროს საგამოძიებო სამსახურში. პერიოდულად რეკავენ ჩვენთან, თუ დამატებითი ინფორმაციები სჭირდებათ და ვაწვდით. ამ დარღვევებმა ორი კარგი რამ გვასწავლა _ როცა დავინახეთ, რა დარღვევები იყო, მომავალში ამის პრევენციას ვაკეთებთ. და, რაც მთავარია, ჩვენი სამსახურები მაქსიმალურად არიან მზად, არ დაუშვან მსგავსი შეცდომები“.
_ ბატონო დავით, რამდენიმე დღის წინ, ძალიან მკაცრი ტონით ილაპარაკეთ გზების მშენებლობის დარღვევებთან დაკავშირებით და განაცხადეთ, რომ უმკაცრესად დაისჯება ყველა, ვინც არ შეასრულებს იმ პირობებს, რაც გათვალისწინებულია.
შეგიძლიათ გვითხრათ, რამ გაგაბრაზათ ასე ძალიან და რა პერიოდზე საუბარი, თქვენი მინისტრობის დროინდელ თუ წინა ხელისუფლების დროს მომხდარ დარღვევებზე ?
_ ჩემი ტონი იქნება ძალიან მკაცრი, თუ ვნახავ რომ ვერ მოწესრიგდა ხარისხთან დაკავშირებული სისტემა. თუ ცალკეული კომპანიები კვლავაც გააგრძელებენ უხარისხო გზების დაგებას, ან უხარისხო სამუშაოს შესრულებას, გადაწყვეტილებები იქნება უმკაცრესი! როცა მე მინისტრად დავინიშნე, მე და პრემიერ-მინისტრმა ერთმანეთს მივეცით პირობა და ბატონი ბიძინასგან მივიღე დავალება, რომ ხარისხზე ზრუნვა იქნებოდა ჩვენი სამინისტროს საქმიანობის N1 ამოცანა და პრიორიტეტი. დავიწყეთ და ყველაფერი ჩავდეთ იმაში, რომ ხარისხი გაუმჯობესებულიყო. ხშირად ვაფრთხილებდი კომპანიებს იმასთან დაკავშირებით, რომ შემოწმდებოდა ხარისხი. ჩვენ დაქვემდებარებულ სამსახურებს ყველა თათბირზე ვაძლევდი დავალებას, რომ ხარისხი არის N1 ამოცანა და როცა გადავამოწმეთ ცალკეული სამუშაოები, გაჩნდა ეჭვები და აქედან გამომდინარე, ლაბორატორიული შემოწმებები ჩავატარეთ.
უნდა დაისაჯონ ისინიც, ვინც წლების განმავლობაში უხარისხოდ ასრულებდა სამუშაოებს და ახლაც უნდათ ახალი ხელისუფლების პერიოდში მსგავსი ქმედებების გაგრძელება. მეორეს მხრივ, ეს პრევენცია უნდა იყოს სხვებისთვის, რომ მსგავსი რამ არ გაბედონ. შემოწმებებს მე აუცილებლად გავაგრძელებ და დაისჯება ყველა, თუ ვინმეს რამე აქვს მოპარული. ამ შემთხვევაში მოპარვა ნიშნავს იმას, რომ ბიუჯეტიდან კომპანია იღებს ფულს, იმაზე ნაკლებს ხარჯავს ვიდრე უნდა დახარჯოს და შესაბამისად, დონორი ორგანიზაციებიდან მოზიდული კრედიტი იქნება თუ ბიუჯეტის დაფინანსება, კომპანია ცდილობს, ხალხის და სახელმწიფოს ფინანსების ხარჯზე გამდიდრდეს.
ეს არ ეპატიება არავის. ცალკეული კომპანიის ზოგიერთი თავხედი წარმომადგენელი დადის და ავრცელებს ხმებს იმასთან დაკავშირებით, რომ სამინისტრო რაღაცას ვერ მიხვდა, ან რაღაც გამოაპარეს. მე მინდა ვუთხრა მათ, ვერაფერს ვერ გამოგვაპარებენ!
კონკრეტული სამუშაოები, რომელზეც მე განცხადება გავაკეთე, წინა ხელისუფლების პერიოდში დაიწყო და ჩვენს დროს გაგრძელდა. ჩვენ გავაკეთეთ ლაბორატორიული შემოწმება, როგორც წინა პერიოდში, ასევე ჩვენ პერიოდში შესრულებული სამუშაოების. ჩვენს პერიოდში შესრულებულ სამუშაოებზე განსაკუთრებულ მონიტორინგს დავაწესებთ და ყველაფერს გავაკეთებთ იმისთვის, რომ მივაღწიოთ საგზაო სამუშაოების უკეთეს ხარისხს. ლაბორატორიული შემოწმებები გაკეთდება არა მხოლოდ საქართველოში, არამედ სინჯები და ნიმუშები გაიგზავნება საზღვარგარეთ აკრედიტირებულ ლაბორატორიებში, რადგან ხშირად ისმის კითხვები სანდოობასთან დაკავშირებით, როცა ადგილობრივად ლაბორატორიულად მოწმდება. ამ კითხვებს თვითონ კომპანიები სვამენ. ამიტომ მეტი სიზუსტისთვის ნიმუშებს საზღვარგარეთაც გავაგზავნით.
_ რაღაც უცნაური მოვლენა იყო ქართული სინამდვილისთვის, გამოდის, რომ საკუთარი თავიც გაკრიტიკეთ, რადგან ყველაზე დიდი პასუხისმგებლობა სწორედ თქვენ გეკისრებათ…
_ დიახ, გავაკრიტიკე საკუთარი თავიც, რა თქმა უნდა! მე ყოველთვის ასე ვარ. მუდმივად უკამაყოფილო ვარ საკუთარი შესრულებული სამუშაოთი. თუ ვატყობ, რომ მეტის გაკეთება შეიძლებოდა და რაღაცა ვერ გავაკეთეთ ისე, როგორც საჭიროა. ანალოგიურად ვეუბნები ჩემს მოადგილეებს, ჩემი სამსახურის ხელმძღვანელებს. ის, რაც გასაკეთებელია, აუცილებლად უნდა გავაკეთოთ!
