საკრებულოს თავმჯდომარემ, ავთანდილ სურგულაძემ განაცხადა, რომ ოზურგეთის მუნიციპალიტეტის სახელმწიფო შესყიდვების 2013 წლის გეგმაში ცვლილებები და დამატებები შევიდა.
საკრებულოს სხდომაზე აზრთა სხვადასხვაობა გამოიწვია გრეიდერის ყიდვამ, რომელიც დაახლოებით 220 000 ლარი დაუჯდება ბიუჯეტს. ამის შესახებ ქვემოთ მოგითხრობთ, მანამდე ვნახოთ, რა ცვლილება გახორციელდა რიგგარეშე სხდომაზე.
ოზურგეთის მუნიციპალიტეტის გამგეობის წარმომადგენელმა, ამირან გირკელიძემ დაწვრილებით ისაუბრა იმ ცვლილებებზე, რომელიც 2 აგვისტოს გახორციელდა:
ადგილობრივი ბიუჯეტი _ მუნიციპალიტეტის საკრებულოს ავეჯის შესყიდვის ხარჯი შემცირდა 150 ლარით. აღნიშნული თანხით შეძენილი იქნა მობილური ტელეფონი, სავარაუდო ღირებულება _ 150 ლარი; 190 ლარით შემცირდა მუნიციპალიტეტის გამგეობის კომპიუტერული ტექნიკის შესყიდვის ხარჯი, რის შედეგადაც გაიზარდა საოფისე ტექნიკის რემონტის ხარჯი; გეგმაში სატრანსპორტო საშუალებების რემონტის ხარჯი გაიზარდა 200 ლარით (სკუტერის ძრავის რემონტისთვის, სარეზერვო ფონდიდან); გეგმაში სამშენებლო მასალების შესაძენად შეტანილი იქნა 500 ლარი.
სახელმწიფო ბიუჯეტიდან გეგმაში სოფლის პროექტების ხარჯთაღრიცხვების შედგენისა და ექსპერტიზის მომსახურეობის შესყიდვის ღირებულება დაზუსტებას მოითხოვს და განისაზღვრა 20 765 ლარით; ადგილობრივი მნიშვნელობის გზების რეაბილიტაციის სამუშაოების ღირებულება გაიზარდა 1 187 230 ლარით; გეგმაში საბავშვო ბაღების შენობების კაპიტალური რემონტისთვის შეტანილი იქნას 818 930 ლარი; გეგმაში შეტანილი იქნა გრეიდერის შესყიდვა _ სავარაუდო ღირებულება 220 000 ლარი; გეგმიდან ამოღებული იქნა ხე-ტყის შესყიდვის ხარჯი 5000 ლარი; საწვავის შეძენის ხარჯი შემცირდა 7 245 ლარით; სამშენებლო მასალების შეძენის ხარჯი შემცირდეს 10 000 ლარით; სახურავების შეკეთების ხარჯი გაიზარდა 23 745 ლარით, გეგმიდან ამოღებული იქნა სარემონტო სამონტაჟო სამუშაოები 1 500 ლარი; შენობების შეკეთების სამუშაოები შემცირდა 2 177 ლარით, ხე-ტყის დამუშავების ხარჯი გაიზარდა 2 177 ლარით.
საკრებულოს დეპუტატმა, დიმიტრი კვერღელიძემ განაცხადა, რომ გრეიდერის ყიდვა არ არის ოზურგეთელი ხალხის მოთხოვნა: _ საკრებულოს სხდომაზე ისაუბრეს გრეიდერის შესყიდვის შესახებ და არ მინდა, რომ ვინმე ჩათვალოს, ის ზემოდან, ცენტრალური ხელისუფლებიდან არის მოწოდებული. ეს არის მოთხოვნა, რომელიც ადგილობრივმა ხელისუფლებამ გააკეთა. მე ბევრი რამე მაინტერესებს და ბევრი რამე მაწუხებს _ როცა მუნიციპალიტეტის ხელისუფლება თავს აძლევს უფლებას 200 000 ლარი გრეიდერზე იქნას გახარჯული, ეს ჩვენი ბიუჯეტისთვის ძალიან დიდი თანხაა. რამდენად სამართლიანად, რამდენად ეფექტურად არის განაწილებული? ხომ არ ჯობდა, ამ თანხის მაგივრად გრეიდერის მაგივრად ჩაწერილი ყოფილიყო სხვა რამე. ეს არის თანხა, რომელიც ერთ სოფელს შიდა გზას მაინც გაუკეთებდა, რაც, მე მგონი, უფრო ეფექტური იქნებოდა. პირდაპირ გეტყვით, რა არის ამის უკან. ძალიან მინდა, ამ თემას გლობალურად შევხედოთ და ვიტყვი პირდაპირ, ყველანაირი მორიდების და დაფარვის გარეშე _ მოგეხსენებათ, ეს არის ძვირადღირებული ტექნიკა და, ჩვენდა სამწუხაროდ, საქართველოში და, მით უმეტეს, გურიაში მოქმედ საგზაო კომპანიებს, არ აქვს საშუალება იმისა, რომ ფისკალურად ამხელა ინვესტიცია გაუწიოს ტექნიკის შეძენას. ეს არის ფარული დაფინანსება კომპანიისა, რომელმაც შემდგომში უნდა გააკეთოს საგზაო სამუშაოები, რომ შემდეგ უფრო მეტი სარგებელი გაუჩნდეს. ძალიან საეჭვოა კერძო კომპანიების მფლობელების და ოზურგეთის გამგებლის მოვალეობის შემსრულებლის ალიანსი, ძალიან ხშირი შეხვედრები, შეხვედრები ოჯახებში. ეს ყველაფერი ორი თვეა მიმდინარეობს _ ყველა ოთახებში იხილებოდა ამ გრეიდერების საკითხი. მე მინდა, რომ ეფექტურად მოხდეს ყველაფერი და არ ეგონოს ვინმეს, კარგ საქმეს ვეწინააღმდეგები. მაშინ ადგეს გამგეობა, ხან სასადილო გააკეთოს, ხან მაღაზია და ეს 10 000 000-იანი ბიუჯეტი ბიზნესებში გამოიყენოს. ეს წერილი და ეს გრეიდერი არ არის არც საკრებულოს და არც ხალხის მოთხოვნა. ამ საქმით დავინტერესდები და უფრო დეტალურად შევისწავლი, _ განაცხადა დიმიტრი კვერღელიძემ.
ავთანდილ სურგულაძემ კვერღელიძეს უპასუხა: “ერთი დღით გრეიდერის დაქირავება 550 ლარი ღირს. ახლა გრეიდერს რომ შევიძენთ, ბატონო დიმა, თქვენი აზრით, რა სამუშაო უნდა შეასრულოს? ამის შემდეგ დაგეგმილია, რომ თვითმცლელს შევიძენთ და ყველა სოფლის შიდა გზას ჩვენი ხარჯით გავარემონტებთ. წარმოიდგინეთ, რამდენ საქმეს გავაკეთებთ. დეკემბრამდე თქვენ კარგად დაინახავთ, რამდენი გზა იქნება ამ გრეიდერით გაკეთებული.
საკრებულოს თავმჯდომარის მოადგილე ავთანდილ მექვაბიშვილი: “საკითხი დგას ისე, რომ ის არის ცუდი, თუ გრეიდერს იძენს მუნიციპალიტეტი? ასე დასვი საკითხი? მაინტერესებს.”
საკრებულოს დეპუტატმა, ხვიჩა კილაძემ თავისი გამოსვლის დროს განაცხადა, რომ მის სოფელში გზა გაუვალია: “ტექნიკა არ აქვს ოზურგეთს, რომ ამ გზის პრობლემა მოგვარდეს. გრეიდერი როდესაც გვეყოლება, სარეზერვო ფონდიდან 20 ლიტრ ბენზინს ჩავუსხამთ და ერთი პრობლემა მოგვარდება”.
დიმიტრი კვერღელიძე: _ ეკონომიკაში არის ორი მცნება: ყიდვა ჯობია თუ ქირავნობა. მე გეუბნებით იმ ფონზე, რაც ჩვენს ბიუჯეტს საშუალებები აქვს. ამხელა ინვესტიციის გაწევა ახლა არის მიზანშეუწონელი. ის, რომ გრეიდერი უნდა გვყავდეს, ეს სრულებითაც არ არის ცუდი, მაგრამ იმას ვამბობ, ამ თანხას როდის ამოვიღებთ?!
თემურ ჯახვა, საკრებულოს დეპუტატი და “გზამშენი 18”-ის დირექტორი: _ მე მყავს ორი გამართული გრეიდერი. ზამთრის პერიოდში ოზურგეთში არის პრობლემა და ეს გრეიდერები არ გვყოფნის. გრეიდერმა ზამთარში ერთი ან ორი თვე რომ იმუშაოს, მარტო მაგისთვის ღირს მისი ყიდვა.
ავთანდილ მექვაბიშვილი: _ გასაგებია ყველაფერი?!
დიმიტრი კვერღელიძე: _ თქვენს ჩემს მთავარ სათქმელს ვერ იგებთ. ბიუჯეტი იზომება ერთი წლის ვადით… ერთი წუთით, არ მინდა რაღაცეები ვთქვა, დემაგოგიას და კომპენტეტურობას ნუ აურევთ ძალიან გთხოვთ, რა.
ავთანდილ მექვაბიშვილი: _ დემაგოგია ის არის, რომ გრეიდერის ყიდვა გვინდა?
დიმიტრი კვერღელიძე: _ ერთი წუთით, ბატონო ავთო, დაწყნარდი.
ავთანდილ მექვაბიშვილი: _ ბატონო დიმა, თქვენ ნუ არეგულირებთ საკრებულოზე ქცევის წესებს. თქვენ არ გეკითხებათ ის, რას ვიტყვი მე საკრებულოს სხდომაზე.
დიმიტრი კვერღელიძე: _ არც თქვენ.
ავთანდილ მექვაბიშვილი: _ მე ჩემი აზრის გამოთქმის უფლება მაქვს და დემაგოგიას დაანებეთ თავი. დემაგოგი მე არ ვარ და ზრდილობიანად იყავით, თორემ პასუხს გავცემ იმას, ვინც იმსახურებს.
ლელა ნაცვალაძე, საკრებულოს დეპუტატი: _ სიმართლის გაგონება არავის უნდა, შეესივნენ დიმიტრი კვერღელიძეს. დეპუტატებს ახლა გაახსენდათ, რომ მათ სოფელში გზა არ არის? აქამდე სად იყვნენ? ეს ყველაფერი კეთდება ერთი კაცის დაკრულზე _ გამგებელს უნდა გრეიდერი.
ეს საკრებულოს მუნიციპალიტეტის რიგგარეშე სხდომაზე გამართული კამათის მოკლე სტენოგრამაა. დეპუტატებმა დიდხანს იდავეს და იკამათეს გრეიდერის შესახებ. სხდომის დასასრულს საკრებულოს თავმჯდომარემ განაცხადა, რომ ოზურგეთისთვის გრეიდერი საჭიროა და ამით სხდომა დაასრულა.
