რათა შეიცვალოს ფოთის მუნიციპალიტეტის საზღვრები. წერილში ფოთის საკრებულო რაიმეს დაზუსტებას კი არ ითხოვს, არამედ გულისხმობს ფოთის ტერიტორიის გაფართოებას ლანჩხუთის ტერიტორიის შემცირების ხარჯზე. კონკრეტულად, საუბარია პალიასტომის ტბის მიმდებარე და “იმნათის” ტერიტორიაზე, სადაც ბუნებრივი ტორფის საბადოა. ტერიტორიის გადაცემის მოტივად ფოთელები მუნიციპალიტეტის განვითარებას ასახელებენ. წერილის ავტორი ფოთის მუნიციპალიტეტის საკრებულოს თავმჯდომარეა.
“პირველად მოხდა, როცა ფოთლებმა საქმის კურსში ჩაგვაყენეს და ჩვენი საკრებულოს გვერდის ავლით ეს საკითხი არ დასვეს ზემდგომ ორგანოებში. წლების წინ, ფოთი ამას ძალიან კარგად ახერხებდა _ საერთოდ არ გვეკითხებოდა, ისე აყენებდა მსგავს საკითხებს ზემდგომ ორგანოებში. ჩვენ მოვიძიეთ ყველა დოკუმენტი _ მათ მოთხოვნას სამართლებრივი და ადმინისტრაციული საფუძველი არ აქვს. ბიურომ მოამზადა წერილი, რომელიც გაეგზავნება ფოთის საკრებულოს. ჩვენ ძალიან კულტურულად ვეუბნებით მათ უარს ამ ტერიტორიების დათმობაზე. ინციდენტის გარეშე გადაწყდება ეს პრობლემა,” _ განაცხადა ლანჩხუთის გამგეობის ეკონომიკური განვითარების სამსახურის უფროსმა რომან ბიწაძემ. ლანჩხუთის საკრებულოს თავმჯდომარის ამირან გიგინეიშვილის თქმით კი, ყველა კომისია და იურიდიული სამსახური შეისწავლის საკითხს და მოამზადებენ საპასუხო წერილს, რომელსაც ფოთის საკრებულოს გაუგზავნიან.
ეს არ არის პირველი შემთხვევა, როცა ფოთი ლანჩხუთის მიწებს ითხოვს და რადგან წინა შემთხვევებში ამას მალულად კი აკეთებდა, მაგრამ შედეგი ვერ მიიღო, ახლა ღია კონტაქტზე გამოვიდნენ.
ერთი ხანობა ქალაქ ფოთის ხელმძღვანელები ლანჩხუთს მიწების მიტაცებაში ადანაშაულებდნენ და საამისოდ წერილს ფოთი თითქმის ყოველწლიურად აგზავნიდა თბილისში. პირველად ამ თემაზე საუბარი ჯერ კიდევ 6 წლის წინ დაიწყო. მაშინაც ფოთის მერიის კულუარებიდან გახდა ინფორმაცია ჩვენთვის ცნობილი. ფაქტის გახმაურებას ბევრი საქმეში ჩახედული ლანჩხუთელი გამოეხმაურა და რუკებიც დადეს _ რომელი ტერიტორია ეკუთვნის ფოთს და რომელი _ ლანჩხუთს. მაშინ ფოთის პოზიცია მერის მრჩეველმა დააფიქსირა: “დიდი გაუგებრობაა აღმოსავლეთ საზღვარზე, ლანჩხუთის მხარეს. “გეოგრაფიკის” რუკაზე პალიასტომის ტბა დიაგონალურად შუაზეა გაყოფილი და მისი ერთი ნაწილი, ლანჩხუთს ეკუთვნის, მეორე _ რაოდენ გასაკვირიც უნდა იყოს _ ხობს. ფოთი კვლავ არაფრის გარეშე რჩება. ოდითგანვე ითვლებოდა, რომ პალიასტომი ფოთის იყო. ამ რუკით კი იგი, თურმე, ჩვენი მეზობელი რაიონებისაა. ტბა მთლიანად უნდა შემოვიდეს ფოთის ადმინისტრაციულ საზღვარში. საკითხი მარტო ამით როდი ამოიწურება. ფოთის ტერიტორიები შედის ლანჩხუთის ადმინისტრაციულ საზღვარში. კიდევ ერთ სადავო საკითხზე მოგვიწევს ბრძოლა _ ქალაქიდან გასასვლელში მშრალ ხიდს გაღმა, ზღვის სანაპირო ზოლი, სადაც ახლა მდიდრული კოტეჯებია, ფეხბურთელთა საწვრთნელ ბაზამდე, არის ფოთის ტერიტორია, რომელიც ლანჩხუთის რაიონმა მიითვისა, ნაკვეთები კერძო პირებზე გაყიდა, შემოსავალი კი ლანჩხუთის ბიუჯეტში შევიდა. დოკუმენტი, რომ ეს ტერიტორია ფოთს ჩამოერთვა და ლანჩხუთს გადაეცა, არ არსებობს. ე. ი. თვითნებურად მოხდა მისი მითვისება. ჩვენ ყველა მოსაზრებას დოკუმენტალურად დავასაბუთებთ.”
მერის მრჩევლის პოზიციას იზიარებდა ფოთის მთავარი არქიტექტორი. მისი თქმით, ქალაქის ხელმძღვანელობა “დაკარგული ტერიტორიების დაბრუნებისას” მინისტრთა საბჭოს ძველ დადგენილებას უნდა დაეყრდნოს, სადაც საზღვრის აღწერილობაა ნაჩვენები.
თავის დროზე, როცა ეს სკანდალი ატყდა, ფოთის მერს, ვანო საღინაძეს მობილურზე თითქმის ყოველდღე ვურეკავდით, მაგრამ იგი ჩვენს ზარებს პრინციპულად არ პასუხობდა. ერთ დღესაც ჩვენთვის მოულოდნელად, ფოთის მერი თავად დაგვიკავშირდა.
_ თქვენ ჟურნალისტი ბრძანდებით? ვანო საღინაძე გახლავართ, ქალაქ ფოთის მერი.
_ ბატონო ვანო, კარგა ხანია თქვენთან დაკავშირებას უშედეგოდ ვცდილობთ, სადავო მიწებზე გვსურდა თქვენი კომენტარი…
_ არავითარი სადავო მიწა არ არის…
_ მაპატიეთ, გაწყვეტინებთ, მაგრამ თქვენი თანაშემწე სწორედ ასეთ კომენტარს აკეთებს _ ლანჩხუთმა მიწები მიითვისა და ახლა უკან უნდა დავიბრუნოთო…
_ ცოტა სხვანაირად არის საქმე. ჩვენ ლანჩხუთთან სადავო არაფერი გვაქვს. უბრალოდ, ლაპარაკია იმაზე, რომ გაკეთებულ რუკაზე გასასწორებელია წითელი ხაზები.
_ ე. ი. მიწებს არ გვედავებით?
_ არა… ჩვენ ძველ საბუთებს ამოვწევთ და კანონიერად გაკეთდება.
_ მაპატიეთ, მაგრამ დავიბენი… ლანჩხუთს მიწებს ედავებით თუ არა? კონკრეტულად მიპასუხეთ, გრიგოლეთის ბაზა თქვენია?
_ არა, ეს არც ერთ შემთხვევაში ფოთის არ არის.
_ მიმდებარე ტერიტორია?
_ არა, მე მგონი, არც ეს მიწები…
_ მგონი თუ არა? დაგვიკონკრეტეთ.
_ უფრო არა, თუმცა, ახლა მე სიზუსტე არ ვიცი, მუშაობის პროცესი მიმდინარეობს. ერთში დარწმუნებული იყავით _ ლანჩხუთს არაფერს წავართმევთ.
აი, ასეთი იყო ფოთის მერის კომენტარი. ახლა, როგორც ხედავთ, მისმა მემკვიდრემ ლანჩხუთთან ურთიერთობის მეთოდი შეცვალა, თუმცა, მოთხოვნა იგივეა _ ფოთი ლანჩხუთის მიწებს ითხოვს.
