მოკლული გოჩა გუჯაბიძე, რამდენიმე თვეა, რაც ამნისტიით გათავისუფლდა. ის საკუთარ სახლთან დაუდგენელმა პირებმა ავტომატებით ჩაცხრილეს. როგორც მოკლულის ოჯახის ახლობლებმა “გურია ნიუსს” უთხრეს, გოჩა სახლიდან გამოიყვანეს და ესროლეს. ის პირველად მამამ, ვარდენ გუჯაბიძემ ნახა და, ფაქტობრივად, უკვე გარდაცვლილი, თავადვე მიიყვანა საავადმყოფოში. სხვა ინფორმაციას ამ ეტაპზე გარდაცვლილის ახლობლები არ ფლობენ.
“არ ვიცით, რა შეიძლებოდა გამხდარიყო ახალგაზრდა კაცის ასე გამეტების მიზეზი,” _ ამბობენ ოჯახის ახლობლები.
შპს “მედალფას” კლინიკური დირექტორი დავით მდინარაძე “გურია ნიუსთან” აღნიშნავს, რომ მოკლული მამამ მოიყვანა საავადმყოფოში და ის, ფაქტობრივად, უკვე გვამი იყო, რის შემდეგაც პოლიციამ ექსპერტიზაზე გადაიყვანა.
ოზურგეთის რაიონული პროკურორის მოადგილის მალხაზ სირაძის განცხადებით, აღნიშნული მკვლელობის დეტალებისა და მიზეზების შესახებ პროკურატურაში ინფორმაციას არ ფლობენ.
_ ჯერჯერობით, საქმე გაუხსნელია, მკვლელობის ფაქტი იყო, გამოძიება ს.ს.კ. 108-ე მუხლით მიმდინარეობს. უცნობია, რამდენი პირი იმყოფებოდა მკვლელობის დროს. დეტალებზე და მიზეზებზე ვერ ვისაუბრებთ, რადგან ჯერ არაფერი ვიცით, _ გვითხრა მალხაზ სირაძემ.
გოჩა გუჯაბიძის შესახებ, “გურია ნიუსის” ვებგვერდზე არა ერთი სტატია გამოქვეყნდა. ერთ-ერთი _ “პოლიციამ ახალგაზრდებს, პოლიტიკური ორიენტაციის გამო, ჯიბეში ნარკოტიკები ჩაუდო”, 2012 წლის 26 ოქტომბერს გავრცელდა, სადაც გუჯაბიძის მამა ვარდენ გუჯაბიძე მისი შვილის დაკავების შესახებ დეტალებზე საუბრობდა .
“2011 წლის 19 მაისს, ოზურგეთში, კოსტავას ქუჩის #125-ში მდებარე საცხოვრებელი კორპუსის ეზოში, შსს გურიის სამხარეო მთავარი სამმართველოს თანამშრომლებმა სპეცოპერაცია ჩაატარეს, რის შემდეგაც ოზურგეთის მუნიციპალიტეტის სოფელ ხვარბეთში მცხოვრები გოჩა გუჯაბიძე და ზემოთ აღნიშნული კორპუსის მცხოვრები ივანე გობრონიძე დააპატიმრეს.
როგორც თვითმხილველები “გურია ნიუსთან” საუბარში აღნიშნავდნენ, დაკავებულებს პოლიციამ ნარკოტიკები კორპუსის მცხოვრებლების თვალწინ ჩაუდო ჯიბეებში. დაკავებული გოჩა გუჯაბიძის მამა კი ამბობდა, რომ მისი შვილი უკანონოდ დაიჭირეს, რის მიზეზადაც გოჩას პოლიტიკურ აქტიურობას ასახელებდა.
ჯიბიდან ხელებს არ იღებდნენ, თან ყვიროდნენ, მოგვეხმარეთო. ვხედავდით, როგორ უტენიდნენ ჯიბეში ნარკოტიკს და ვერაფერს ვშველოდით. წარმოიდგინეთ, ამდენი ხალხის წინაშე ჩაუდეს ნარკოტიკი ბავშვებს! ჯერ დაეკარგათ პოლიციელებს ეს ნარკოტიკი და დაიწყეს ჩხუბი, ეძებეს, აგინეს ერთმანეთს, მერე იპოვეს. რა სანახაობა იყო, ვერ აგიწერთ. ვეკამათეთ პოლიციის უფროსს. ის გვეუბნებოდა, აბა, არ უნდა დავიჭიროთ დამნაშავეო?!
_ თუ უნდოდათ, ამ ბიჭების აყვანა ხმაურის გარეშეც შეიძლებოდა. მაინც და მაინც ამდენი ხალხის თვალწინ, არაადამიანურად, 200 კაცის თვალწინ ჩაუდო ნარკოტიკი ბიჭებს, გაგიგიათ? პოლიციამ სწორედ ახალგაზრდების პოლიტიკური ორიენტაციის გამო გააკეთა ეს, _ ამბობენ თვითმხილველები.”
გოჩა გუჯაბიძის მამა, ვარდენ გუჯაბიძე “გურია ნიუსთან” აღნიშნავდა, რომ მისი შვილი უკანონო პატიმარი იყო და ახალ მთავრობას ამ საქმის ხელახლა გამოძიებას და სიმართლის დადგენას სთხოვდა. მისი განცხადებით, ოჯახზე ზეწოლა, წლებია მიდის, იმის გამო, რომ ის ყოველთვის ოპოზიციაშია და პოლიტიკურად აქტიური პიროვნებაა: _ ამის შემდეგ პროკურორთან მქონდა შეხვედრები, საუბრები, ჯერ ოთხწლიან პატიმრობაზე და საპროცესო გარიგებაზე იყო საუბარი. ჩატარდა ზუსტად 10 სასამართლო პროცესი, მეათე სასამართლო პროცესზე გამოუტანეს განაჩენი _ მიესაჯა რვაწლიანი პატიმრობა, _ამბობდა ვარდენ გუჯაბიძე “გურია ნიუსთან”.
