“გურია ნიუსის” ინფორმაციით, 6 აგვისტოს, ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე, გაგა მკურნალიძის მამა ავთო მკურნალიძე, სოფელ გურიანთის რწმუნებული ბახვა კვერღელიძე და სოფლის მაჟორიტარი დეპუტატი მერაბ მჟავია, სახელმწიფო უსაფრთხოების სააგენტოს თანამშრომლები _ ვანო საჯაია, ირაკლი ანდღულაძე, გია გიორგაძე,ოზურგეთის მუნიციპალიტეტის გამგეობის თანამშრომლები _ ელიკო დოლიძე, სოფელ მაკვანეთისა და სოფელ ოზურგეთის გათავისუფლებული რწმუნებულები გია ჩხაიძე და მერაბ ვასაძე, სოფელ ბაილეთის მაჟორიტარი დეპუტატი პაატა კიღურაძე, საგზაოს სამსახურის უფროსი თემურ ჯახვა ერთ-ერთ რესტორანში ქეიფობდნენ. მოქალაქეები, რომლებმაც ეს ინფორმაცია მოგვაწოდეს, აღშფოთებულები იყვნენ, რადგან სოფელ გურიანთაში უმძიმესი მდგომარეობაა. საქმე იმაშია, რომ 5 აგვისტოს, გვიან ღამით, გურიანთის მკვიდრი გოჩა გუჯაბიძე საკუთარ საცხოვრებელ სახლთან ავტომატით ჩაცხრილეს. აღნიშნული მკვლელობა ამ წუთამდე ბურუსით არის მოცული და გაუხსენილია.
ინფორმაციის გადასამოწმებლად რესტორანთან მისულებს, ავთო მკურნალიძემ სულ რამდენიმე წუთით გაგვასწრო, რაც დავაფიქსირეთ კიდეც; ჟურნალისტებთან შეხვედრას თავი აარიდა გამგებლის მოვალეობის შემსრულებელმა კოტე შარაშენიძემაც.
თუ რას აღნიშნავდნენ საჯარო მოხელეები და უშიშროების თანამშრომლები, ასევე მკურნალიძე და შარაშენიძე, ამაზე კომენტარი გურიანთის მაჟორიტარ დეპუტატს მერაბ მჟავიას ვთხოვეთ.
_ ბატონო მერაბ, რას აღნიშნავთ?
_ ბახვას დაბადების დღეს…
_ რატომ დატოვეს სუფრა გამგებელმა და მკურნალიძემ, სად გავიდნენ?
_ სად გავიდნენ, არსად არ წასულან. ადგილზე არიან, აქ არ იყო ამ ამ წუთს?! ბახვას დაბადების დღეა და აღვნიშნავთ მეგობრები და შინაურები. თქვენ ვერ დაინახეთ?
_ ბატონო მერაბ, სოფელში როცა ასეთი სიტუაციაა, მოკლეს ახალგაზრდა კაცი, თქვენ როგორ ფიქრობთ, ქეიფის დროა?
_ რას ქვია, კაცო, ქეიფობის დროა, საშინელი სიტუაციაა, მაგრამ დაბადების დღე გვაქვს და რა ვქნათ, არ ვიქეიფოთ?!
_ იქნებ, დაგვიკონკრეტოთ კიდევ ერთხელ, თქვენი სტუმრების ვინაობა, უშიშროების თანამშრომლებიც თქვენთან ერთად არიან?
_ წამობრძანდით, დაესწარით და ნახავთ თქვენი თვალით, უშიშროება სადაა, მე არ დამინახავს..
_ შეიძლება ერთი ფოტო რომ გადავიღოთ?
_ კი, კაცო, ორი გადაიღეთ, _ გვითხრა მერაბ მჟავიამ.
კოტე შარაშენიძისა და ავთო მკურნალიძის ახლო ურთიერთობების შესახებ “გურია ნიუსი” არაერთხელ წერდა, თუმცა 2012 წლის არჩევნებზე შარაშენიძე პრესასთან მკურნალიძესთან ახლო ურთიერთობას უარყოფდა.
