დავითაშვილის ინიციატივა საჯარო სამართლის იურიდიული პირის – დაზღვევის ფონდის დაარსებას გულისხმობს, რომლის დაფინანსება ფიზიკური პირის მიერ გადახდილი საშემოსავლო გადასახადის 1/3-ით, საბიუჯეტო დოტაციით, შემოწირულობებით განისაზღვრება. კობა დავითაშვილის მოსაზრებით, ჯანმრთელობის საყოველთაო დაზღვევის ფონდში სამეთვალყურეო საბჭოს ხუთი წევრის არჩევა საკრებულოს არჩევნების დროს უნდა მოხდეს. დეპუტატის განმარტებით, კერძო სადაზღვევო კომპანიებს სახელმწიფო თანხები რაც შეიძლება მალე უნდა ჩამოერთვას და საყოველთაო დაზღვევის ფონდში გადაინაცვლოს.
მინისტრი დავით სერგეენკო კობა დავითაშვილის განცხადებას “გურია ნიუსის” საშუალებით პასუხობს:
დავით სერგეენკო: “ის, რომ საყოველთაო ჯანდაცვის პროექტი მართვას უნდა განახორციელოს სახელმწიფო ფონდმა, ამაში ეჭვი არავის შეაქვს და არანაირ რევიზიას არ ექვემდებარება. ეს გაცხადებული იყო როგორც წინასაარჩევნო პლატფორმაში, ასევე ჩვენს მიერვე მომზადებულ დოკუმენტში, რომელიც პარლამენტს 2012 წლის ნოემბრის ბოლოს წარვუდგინეთ.
ჩვენი პოზიცია ახლაც იგივეა, ეს ფონდი აუცილებლად უნდა შეიქმნას, ოღონდ ამ კალიბრის და ამ მასშტაბის სტრუქტურის, მეთოდოლოგიის, სამუშაო აღწერილობის ჩამოყალიბებას, და შესაბამისი საკანონმდებლო ცვლილებების განხორციელებას, ასევე კადრების მოძიებას დრო ჭირდება.
საერთაშორისო ექსპერტებთან კონსულტაციების შედეგად გადაწყდა, რომ ეს დრო იქნებოდა წელიწადი ან წელიწადნახევარი და ეს ვადაც წარვუდგინეთ პარლამენტს.
შესაბამისად, აქტიური მუშაობა დავიწყეთ ამაზე შარშან ნოემბერში და წელს ნოემბერში გახდება ერთი წელი.
_ ანუ, ეს თავიდანვე იყო დაგეგმილი და დროში გაწერილიც. როგორც აღნიშნეთ, ამაზე მსჯელობა იყო პარლამენტშიც. კობა დავითაშვილმა არ იცოდა ეს ყველაფერი?
_ მე თავს შევიკავებ მაგაზე კომენტარის გაკეთებისგან, მაგრამ გეტყვით, რომ მოსმენას, რომელზეც ჩვენ წარვადგინეთ საყოველთაო ჯანდაცვის პროექტის ადმინისტრირების სამი ვარიანტი. მოკლედ გეტყვით სამთავეს.
პირველი _ ისევ კერძო სადაზღვევო კომპანიებს განეხორციელებინათ მთლიანად ამ პროექტის მართვა; მეორე _ გარდამავალი პერიოდი აგვეღო. რადგან ფონდის ჩამოყალიბებას დრო ჭირდებოდა, თავიდან ეს ფუნქცია ეტვირთა ჯანდაცვის სამინისტროს და სოციალური მომსახურების სამინისტროს და შემდეგ გადაებარებინა ფონდისთვის. მესამე _ დაუყოვნებლივ შექმნილიყო ფონდი. მსჯელობების შედეგად შევჩერდით მეორე ვარიანტზე.
_ თუ ეს ყველაფერი გარკვეული იყო, როგორ ფიქრობთ, რაში დაჭირდა დავითაშვილს ასეთი განცხადების გაკეთება?
_ არ ვიცი, გამიჭირდება მაგაზე პასუხის გაცემა და ბევრი მიზეზის გამო თავს შევიკავებ. მისგან უფრო პროდუქტიული იქნება ამის მოსმენა.
შეგახსენებთ, რომ როგორც კომიტეტის სხდომაზე გაირკვა, პროექტს მხარს არ უჭერს იურიდიულ საკითხთა კომიტეტი, შენიშვნები აქვს არა მარტო ადამიანის უფლებათა დაცვისა და სამოქალაქო ინტეგრაციის კომიტეტს, არამედ საფინანსო-საბიუჯეტო კომიტეტსაც. ინიციატივას მხარს არ უჭერს მთავრობა, რომელმაც პარლამენტს უარყოფითი დასკვნა წარუდგინა.
ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია მართალია იზიარებს პარლამენტის წევრის, კობა დავითაშვილის მოსაზრებას საყოველთაო ჯანდაცვის ხელმისაწვდომობის თაობაზე, მაგრამ მიიჩნევს, რომ დეპუტატის ინიციატივით წარმოდგენილ კანონპროექტში “ჯანმრთელობის საყოველთაო სოციალური დაზღვევის შესახებ”, რიგი საკითხები დასაზუსტებელია, დამუშავებას საჭიროებს, რის გამოც იგი კომიტეტმა არასაკმარისად მომზადებულად მიიჩნია.
