განცხადება “გურია ნიუსი” უცვლელად გთავაზობთ:
“საქართველოს შინაგან საქმეთა მინისტრს, ბატონ ირაკლი ღარიბაშვილს -დააყენოს შესაბამის პირთა თანამდებობრივი პასუხისმგებლობის საკითხი!
“ნინო ბურჯანაძე-დემოკრატიული მოძრაობა” ოზურგეთის რაიონული ორგანიზაცია შეშფოთებას გამოთქვამს ოზურგეთის მუნიციპალიტეტში ბოლო თვეების განმავლობაში კრიმინოგენური სიტუაციის უკიდურესად გამწვავების გამო.
განსაკუთრებით იმატა როგორც შეიარაღებულ პირთა ჯგუფების მიერ ჩადენილმა ყაჩაღობებმა და მკვლელობებმა, ასევე კრიმინალების მხრიდან ბიზნესზე და საზოგადოების სხვა წარმომადგენლებზე ზეწოლამ; აშკარად გაიზარდა ქურდობისა და ნარკოტიკების მოხმარების ფაქტები. ყველაფერი ეს მოსახლეობის სერიოზულ შიშს იწვევს.
ადგილობრივი ძალოვანი სტრუქტურები და სპეც-სამსახურები, იმის მაგივრად, რომ აქტიურად იყვნენ ჩართულნი მათ კომპეტენციაში შემავალი საკითხების დროულად გადაჭრის პროცესში, აშკარად და უხეშად ერევიან ადგილობრივი თვითმმართველობის და, ზოგადად, მუნიციპალიტეტში მიმდინარე პოლიტიკურ პროცესებში.
“ნინო ბურჯანაძე-დემოკრატიული მოძრაობა” ოზურგეთის რაიონული ორგანიზაცია აცხადებს, რომ თითოეული დანაშაულის ფაქტი უნდა იყოს გამოძიებული და ყველა დამნაშავემ უნდა აგოს პასუხი კანონის წინაშე. გამონაკლისი არც ადგილობრივი ხელისუფლების მაღალჩინოსანი უნდა იყოს, რომელმაც მისივე თანაგუნდელზე შეიარაღებულ თავდასხმა განახორციელა. სამწუხაროდ, ეს ინციდენტი დღემდე არ ყოფილა გამოძიების საგანი.
“ნინო ბურჯანაძე _ დემოკრატიული მოძრაობა” ოზურგეთის რაიონული ორგანიზაცია მიმართავს საქართველოს შინაგან საქმეთა მინისტრს, დააყენოს იმ პირთა თანამდებობრივი პასუხისმგებლობის საკითხი, რომელთაც ვერ შეასრულეს მათზე დაკისრებული მოვალეობა გურიაში და ოზურგეთში.
“ნინო ბურჯანაძე _ დემოკრატიული მოძრაობა” ოზურგეთის რაიონული ორგანიზაცია აცხადებს, რომ საზოგადოებაში უკვე დანერგილი შიშისა და დაუცველობის სინდრომი სახელისუფლებო ძალების მხრიდან საარჩევნო პროცესებში ამომრჩევლებზე უკანონო მანიპულირების ხელსაყრელ გარემოს ქმნის,” _ ნათქვამია განცხადებაში.
