“ღარიბი” სამართალდამცავები

საქართველოს კანონმდებლობის თანახმად, თანამდებობის პირები ქონებრივი და ფინანსური მდგომარეობის შესახებ დეკლარაციებს ყოველწლიურად ავსებენ. მოსახლეობას, ანუ დამქირავებელს, უფლება აქვს იცოდეს და აკონტროლოს მისი ჯიბიდან ხელფასგადახდილი მაღალჩინოსნების ქონებრივი შემოსავლების დინამიკა, ანუ რას ფლობდნენ ისინი თანამდებობებზე მოსვლამდე და რას წაიღებენ წასვლის დროს.

შინაგან საქმეთა სამინისტროს გურიის სამხარეო მთავარი სამმართველოს უფროსის 34 წლის გიორგი (გიგა) ჯაფარიძის ქონება ასე გამოიყურება: _ მამის, გრიგოლ ჯაფარიძის სახელზე რეგისტრირებული საცხოვრებელი სახლი 228 კვადრატულ მეტრ ფართობზე, ლანჩხუთის მუნიციპალიტეტის სოფელ შუხუთში მდებარეობს. ასევე, მამის სახელზეა გაფორმებული მიწის ნაკვეთები შუხუთში, რაც ჯამში 10 700 კვადრატულ მეტრს შეადგენს. დეკლარაციის თანახმად, 10 000 ლარს არ აღემატება. არც სამმართველოს უფროსის და არც მისი ოჯახის წევრების მოძრავი ქონება. ასევე, მისი ოჯახის წევრების საკუთრებაში არსებული ფასიანი ქაღალდების გვერდი მონაცემებს არ შეიცავს.

თავად გიორგი ჯაფარიძეს კი დეკლარაციის შევსების მომენტში, 2010 წლის 26 ივლისს, მაშინ როცა ჯერ კიდევ ქვემო-ქართლის სამხარეო სამმართველოს მარნეულის რაიონული სამმართველოს უფროსის მოადგილე _ დეტექტივების განყოფილების უფროსი იყო, ანგარიშზე 300 ლარი ერიცხებოდა; საკრედიტო ბარათებზე კი _ 1 315 ლარი; დედის საკრედიტო ბარათზე _ 70 ლარი; ხოლო მამის საკრედიტო ბარათებზე _ 225 ლარი. ასევე, მონაცემებს არ შეიცავს გვერდი, საიდანაც გაიგებ აქვს თუ არა დეკლარაციის შემვსებს ხელზე 4 000 ლარზე მეტი ფული. ჯაფარიძის ოჯახის წევრები სამეწარმეო საქმიანობაშიც არ მონაწილეობენ. გურიის პირველი პოლიციელის შემოსავალმა 2009 წლის 1 იანვრიდან 31 დეკემბრის ჩათვლით, 17 313 ლარი შეადგინა. მას დეკლარაციის შევსების მომენტში საქართველოს ბანკთან სამი ხელშეკრულება ჰქონდა დადებული და სესხების საერთო ღირებულება 15 800 ლარს შეადგენდა. ასევე, დოკუმენტებს თუ დავეყრდნობით, ბატონ გიორგისთვის არავის უჩუქებია 500 ლარზე მეტი ღირებულების საჩუქარი.

დეკლარაციის მიხედვით, შინაგან საქმეთა სამინისტროს ოზურგეთის რაიონული სამმართველოს უფროსის ნიკოლოზ იმერლიშვილის სახელზე ქონება არ ირიცხება. მან ქონებრივი დეკლარაცია გასული წლის 24 ოქტომბერს, გურიის რეგიონის მთავარი სამმართველოს უბნის ინსპექტორების სამმართველოს უფროსის თანამდებობაზე ყოფნის დროს შეავსო. დედის, მზია იმერლიშვილის სახელზეა გაფორმებული ვანში, ციხესულორში 2500 კვადრატული მეტრი მიწის ფართობი და 80 კვადრატულ მეტრზე გაშენებული საცხოვრებელი სახლი. ჯაფარიძის მსგავსად, იმერლიშვილსაც საკუთრებაში არსებული მოძრავი ქონება, რომელიც 10 000 ლარს აღემატება, არ გააჩნია. ასევე, მონაცემებს არ შეიცავს საკუთრებაში არსებული ფასიანი ქაღალდების გრაფაც. იმერლიშვილს, დეკლარაციის შევსების მომენტში, სახელფასო ნაშთი 20 ლარი ერიცხებოდა, ანაბარზე კი _ 1 200 ლარი. როგორც დეკლარაციაში ვკითხულობთ, მისი ოჯახის წევრები სამეწარმეო საქმიანობას არ ეწევიან და არც ნაღდ ფულს ფლობენ. იმერლიშვილს, თბილისის მთავარი სამმართველოს ისან-სამგორის სამმართველოს დეტექტივ-თანაშემწე გამომძიებლის პოზიციაზე ყოფნის დროს, ხელფასის სახით, 13 000 ლარი მიუღია. მიიღო თუ არა სხვა შემოსავალი ოზურგეთის პოლიციის სამმართველოს უფროსმა და მისმა ოჯახის წევრებმა, დოკუმენტებში არ იკითხება.

შინაგან საქმეთა სამინისტროს ლანჩხუთის რაიონული სამმართველოს უფროსი დიმიტრი ბიკაშვილი თბილისში, ტატიშვილის ქუჩაზე, 50 კვადრატულ მეტრ საცხოვრებელ ფართს ფლობს. დედის სახელზე ირიცხება გორის რაიონში, სოფელ ახალუბანში 350 კვადრატული მეტრი მიწის ფართობი. ის და მისი ოჯახის წევრები, საკუთრებაში არც ფასიან ქაღალდებს ფლობენ და არც 10 000 ლარზე მეტი ღირებულების მოძრავი ქონება გააჩნიათ. 29 სექტემბერს, დეკლარაციის შევსების დროს, მის სახელზე ირიცხებოდა, საქართველოს ბანკში სახელფასო დებეტი 1 364 ლარი, ხოლო წინა წლის შემოსავლები 13 740 ლარით შემოიფარგლებოდა. ასეთ მწირ ინფორმაციას შეიცავს ლანჩხუთის პოლიციის სამმართველოს უფროსის მიერ შარშან შევსებული ქონებრივი და ფინანსური მდგომარეობის შესახებ არსებული დეკლარაცია.

რაც შეეხება შინაგან საქმეთა სამინისტროს ჩოხატაურის რაიონული სამმართველოს უფროსის ბესარიონ სიხარულიძის ქონებრივ მდგომარეობას, 2010 წლის 16 ნოემბერს იგი ასე გამოიყურებოდა: 29 წლის პოლიციელი, თბილისში, ზესტაფონის ქუჩაზე, 44 კვადრატულ მეტრ საცხოვრებელ ფართზე, მშობლებთან ერთად ცხოვრობს, რომელიც დედის სახელზეა გაფორმებული. ასევე, დედამისი აგარაკს ფლობს გორში სოფელ კარალეთში. მონაცემებს არ შეიცავს არც ერთი გრაფა, რომელიც ზემოთ აღნიშნულმა მაღალჩინოსანმა პოლიციელებმა შეავსეს _ ბესარიონ სიხარულიძეს მხოლოდ ერთი გრაფის შევსება მოუხდა, სადაც წინა წელს მიღებული ხელფასი _ 12 960 ლარი იკითხება.

ე.წ. “ბახმაროს სკანდალში” გახვეული გურული პოლიციელები თანამდებობიდან დეკლარაციებში მითითებული ქონების საფუძველზე გაათავისუფლეს _ მათ ქონებრივ დეკლარაციაში მითითებული ჰქონდათ ბახმაროში, საკუთრებაში არსებული ნაკვეთები. ჯერჯერობით არავის გაუცია პასუხი კითხვაზე, რა უფრო დიდი დანაშაულია _ დეკლარირებული ქონება თუ არადეკლარირებული, სხვის სახელზე გადაფორმებული ფეშენებელური აგარაკები. ასეთ ქონებას საკმაოდ ბევრი მაღალჩინოსანი ფლობს, უმეტესწილად შავიზღვისპირეთში. გარდა ამისა, ჩვენი წყაროს ინფორმაციით, გურულ მაღალჩინოსან პოლიციელებს ხშირად ნახავთ რესტორნებში, ტოტალიზატორებში და სამორინეებში.