2010 წლის სექტემბრიდან, საინვესტიციო პროგრამების დაცვის ფარგლებში სახელმწიფო საკუთრებაში არსებული ჩოხატაურის საავადმყოფო-პოლიკლინიკა სახელმწიფო ქონების პრივატიზებისას გამოცხადებულ აუქციონზე გაიყიდა და კერძო საკუთრებაში გადავიდა.
ჰოსპიტლების ოპერირების საერთაშორისო საწარმომ “აიჰოპმა“ დააარსა შვილობილი შეზღუდული პასუხისმგებლობის საზოგადოება “ადითი“, რომელმაც შეიძინა ჩოხატაურის, ლანჩხუთის, ხარაგაულის, დედოფლისწყაროს, ქარელის, ვანის, ასპინძის, ლენტეხის და გუდაურის სამედიცინო დაწესებულებები.
საავადმყოფოს გაყიდვამ ჩოხატაურში დიდი აჟიოტაჟი გამოიწვია _ გურულებს, სხვა გაჭირვებასთან ერთად, ჯანმრთელობაც ოცნებად ექცათ. ქუჩაში თუ თავშეყრის სხვა ადგილებში ხშირად ისმის უკმაყოფილო ადამიანების საუბარი: “რაღა გვეშველება აწი?! ექიმთან ისედაც ვერ მივდიოდით, ახლა სულ ვეღარ მივალთ _ ალბათ, ისეთი ფასები იქნება, კარებშიც არავინ შეგვიშვებს უფულოდ”, _ ამბობენ ისინი.
დაბა ჩოხატაურის ცენტრში არსებულ საავადმყოფოში, მიუხედავად იმისა, რომ კერძო მფლობელი ჰყავს, არც შიგნით და არც გარეთ არაფერი შეცვლილა, თუ არ ჩავთვლით იმას, რომ რამდენიმე თანამშრომელი სამსახურიდან დაითხოვეს და ფასებმაც საკმაოდ მოიმატა.
ჩვენ შპს “ადითის” ჩოხატაურის ფილიალის დირექტორთან თემურ კოროშინაძესთან შევეცადეთ, გაგვერკვია, რა პრინციპით მუშაობს “ახალი” საავადმყოფო და რა მომსახურებას სთავაზობს მოსახლეობას:
_ ბატონო თემურ, რა შეიცვალა საავადმყოფოს გაყიდვის შემდეგ? ცნობილია, რომ ფასებმა მოიმატა სტაციონარულ, ამბულატორიულ და ლაბორატორიულ გამოკვლევებზე, მკურნალობაზე და საერთოდ, ექიმთან ვიზიტებზე.
_ სერვისების მხრივ არაფერი შეცვლილა, არც ფასები გაზრდილა არც ერთ პროგრამაზე. შეიზღუდა მხოლოდ მუნიციპალური პროგრამები, რადგანაც საავადმყოფო კერძო მფლობელობაში გადავიდა. მომსახურება დარჩა იგივე, რაც აქამდე იყო. ჩვეულებრივი სტანდარტით მოქმედებს სადაზღვევო პროგრამები, როგორც სოციალურად დაუცველთათვის, ასევე კორპორაციული დაზღვევის მქონე პირთათვის _ ისინი ზუსტად მიიღებენ სადაზღვევო პაკეტით გათვალისწინებულ დაფინანსებას. არანაირი პრობლემა არ გვაქვს მედიკამენტებზე. კლინიკა აღჭურვილია სათანადოდ, რათა ნებისმიერმა ადამიანმა ისარგებლოს სტანდარტით გათვალისწინებული მედიკამენტოზური მომსახურებით. თუ ზესტანდარტულ მომსახურებაზეა ლაპარაკი, თანხა დაიფარება ავადმყოფის ან სპონსორის მიერ. დანარჩენ შემთხვევაში, ყველა ავადმყოფს ვაძლევთ მედიკამენტებს სტანდარტის შესაბამისად.
_ ბავშვთა და სხვა ასაკობრივი ჯგუფის მკურნალობაზე რას გვეტყვით?
_ ბავშვთა სახელმწიფო დაზღვევის პროგრამა მოქმედებს ჩვეულებრივად. 0-დან 3 წლამდე ბავშვების სტაციონალური მომსახურების 80%-ს ფარავს სახელმწიფო, დანარჩენ 20%-ს ოჯახი ან სპონსორი.
მოქმედებს 3-დან 18 წლამდე მოსახლეობის (რომელთა სარეიტინგო ქულაა 70 000-დან 120 000-მდე) თანადაფინანსების პროგრამა _ მუნიციპალიტეტი ამ კონტიგენტს უფინანსებს საფასურის 50%-ს სტაცინარული და გადაუდებელი მკურნალობის შემთხვევაში, არა უმეტეს, 300 ლარისა. ასეთივე შემთხვევაში, 18-დან 60 წლამდე კონტიგენტისთვის მოქმედებს გადაუდებელი სტაციონარული მკურნალობის თანადაფინანსების მუნიციპალური პროგრამა _ მუნიციპალიტეტი აფინანსებს ჩატარებული მკურნალობის 40%-ს, არაუმეტეს 300 ლარისა. ასევე 60 წელს ზევით მოქმედებს ურგენტული (გადაუდებელი) სახელმწიფო სტაციონარული პროგრამა _ ამ შემთხვეში სახელმწიფო აფინანსებს ჩატარებული მკურნალობის 75%-ს.
_ რა პრინციპით ხდება ორსულთა მკურნალობა? ფასიანია თუ არა ვიზიტები და ლაბორატორიული გამოკვლევები?
_ ყველა ორსულმა უნდა იცოდეს, რომ ორსულობის 12 კვირამდე უნდა გამოცხადდნენ ქალთა კონსულტაციაზე, რათა მიიღონ ორსულის ვაუჩერი და კუთვნილი ოთხი ვიზიტი მათთვის უფასო იქნება. იმ შემთხვევაში, თუ ორსული დაიგვიანებს და ქალთა კონსულტაციას 12 კვირის შემდეგ მიმართავს, ყველა ვიზიტი ფასიანი იქნება.
_ მშობიარობაზე ფასები ხომ არ გაზრდილა?
_ ფასები იგივე დარჩა. თუ ერთ სერვისს მოემატა ფასი, სამაგიეროდ, მეორეს დააკლდა და ერთმანეთში ისე გადანაწილდა, რომ პაციენტს ზედმეტი თანხის გადახდა არ მოუწევს. ფასები ასეთია: ფიზიოლოგიური მშობიარობა _ 400 ლარი; პათოლოგიური მშობიარობა _ 540 ლარი; საკეისრო კვეთა _ 810 ლარი. და კიდევ _ ყველა ახალშობილს ვასაჩუქრებთ ახალშობილთა ორი პაკეტით.
_ სპეციალისტები რამდენად აკმაყოფილებენ თანამედროვე მოთხოვნებს?
_ თამამად გეტყვით, რომ სრულიად აკმაყოფილებენ.
როდესაც ადამიანი მკურნალობაში ფულს იხდის, შესაბამის კომფორტსაც ითხოვს, რასაც ამჟამად ნამდვილად ვერ მიიღებს. თემურ კოროშინაძე ამბობს, რომ უახლოეს მომავალში საავადმყოფოში სრული კომფორტი იქნება: “აშენდება სრულიად ახალი, ევროპული სტანდარტის შესაბამისი შენობები და აღიჭურვება უახლესი აპარატურით. რაც მთავარია, ჩვენ გვექნება ერთჯერადი უფასო კონსულტაციების აქციები, რომლის შესახებაც წინასწარ ვაცნობებთ მოსახლეობას.
ჩვენ ისეთივე თბილი ადამიანები ვართ, როგორიც აქამდე ვიყავით, ისევე თბილად მოვემსახურებით ყველას, როგორც აქამდე; არავის მოვაკლებთ ყურადღებას და ნუ შეიქმნიან ისეთ წარმოდგენას, თითქოს ჩვენთან არ მოისვლება”, _ ამ სიტყვებით და თბილი ღიმილით დაგვემშვიდობა ბატონი თემური და ყველას ჯანმრთელობა გვისურვა.
