მოსამართლე ლევან ჯორბენაძემ ე.წ. “ტრაქტორების” საქმეზე დაკავებულებისგან უარი მიიღო, რომ მათი საქმე ნაფიც მსაჯულებს განეხილათ. “ტრაქტორების საქმის” არსებითი განხილვა 2013 წლის 21 აგვისტოს დაინიშნა.
მექანიზაციის ინსტიტუტის ყოფილმა დირექტორმა პროფესორი ზაზა მახარობლიძემ საქმის მასალებიდან ექსპერტიზის დასკვნის დაუშვებლად ცნობას მოითხოვა.
“ექსპერტები არ არიან კვალიფიცირებულები. არ აქვთ შესაბამისი ტექნიკური განათლება. რაც მათ უფლებას მისცემს აღნიშნული ტიპის ექსპერიმენტები ჩაატარონ.”- განაცხადა ჩვენთან საუბრისას მახარობლიძემ.
_ ბატონო ზაზა, რას გულისხმობთ?
_ ტრაქტორების წევის გამოცდას. ამისთვის არსებობს ISO სტანდარტი.
ISO სტანდარტით გათვალისწინებული არცერთი მოთხოვნა არ არის დაკმაყოფილებული ექსპერტიზის ჩატარების დროს. ექსპერიმენტი ჩატარდა მათი შეხედულებისამებრ, არაპროფესიულად. ექსპერტიზა არის ჩატარებული სტანდარტების დაცვის გარეშე. ეს ექსპერტიზის დასკვნა მტკიცებულებად არ უნდა იქნას მიღებული. არცერთი პირი, ვინც ამ ექსპერტიზას ატარებდა, არ ფლობს შესაბამის ტექნიკურ განათლებას, აღარაა ლაპარაკი კვალიფიკაციაზე.
_ თუ ექსპერტებს შესაბამისი ტექნიკური განათლება არ აქვთ, როგორ ჩაატარეს ექსპერიმენტი?
– მათ ვიღაცამ დაავალა. ეს იყო პროკურატურის ინტერესი. სავარაუდოდ, ეს განახორციელა პროკურატურამ. გააკეთებინა ის, რაც მას უნდოდა. ტრაქტორების გამოცდა უნდა ჩაატაროს ტრაქტორების სპეციალისტმა.
_ ჩვენ გვყავს ასეთი სპეციალისტები?
_ აკადემიის აკადემიკოსი, სახელმწიფო პრემიის ლაურეატი, რევაზ მახარობლიძე; მანქანა-ტრაქტორთა პარკების ექსპლუატაციის კათედრის გამგე წლების მანძილზე, ტექნიკის მეცნიერებათა დოქტორი, პროფესორი ბეჟან ბასილაშვილი; მექანიზაციის ინსტიტუტის განყოფილების გამგე, ტექნიკის მეცნიერებათა დოქტორი იგორ ლაგვილავა;
გურულები რომ სხლავდით ჩაის, ჩაის მანქანა, ამ ხალხის გაკეთებულია. ტრაქტორი არ იყო ის დასაწვავი? ვინ გააკეთა, ჩვენ არ გავაკეთეთ?! ჩვენ გვეუბნებიან სპეციალისტები არ ხართ და ექპერტიზაზე მოჰყავთ მემცენარე, რომელსაც ტრაქტორის გამოცდას აბარებენ?!
ჩვენ ახლაც გვაქვს ახალი ტრაქტორი გაკეთებული. აგიყვანთ ინსტიტუტში და გაჩვენებთ, ტრაქტორის ახალი მოდელი, რომელზედაც ავიღეთ გრანტი 150 000-ად გავაკეთეთ გურულებისთვის, რომელმაც უნდა მოკრიფოს და დასხლას ჩაი.
ჩვენ ტრაქტორებს მარტო კი არ ვცდით, არამედ ვაპროექტებთ, კონსტრუქციებს ვამუშავებთ. ვჩარხავთ, ვაწყობთ და ვაწვდით ქვეყანას.
თუ ფასთა სხვაობაზე მიდის საუბარი, გაცილებით უფრო იაფად ნაკლებ ფასად შეგიძლიათ ისეთ სიმძლავრის ტრაქტორები შეიძინოთ აზიური წარმოების ქვეყნებში, ვიდრე, კონკრეტული ჯგუფი სთავაზობდა სახელმწიფოს. მაგრამ, აქ საუბარი არის ხარისხზე. აპელირება იმაზე, ეს ტრაქტორი იაფი ღირდა ამაზე, არ შეიძლება. ის ტექნიკური მახასიათებლები, რომელიც ექსპერტთა ჯგუფმა დადო მოთხოვნად, არცერთი იმ ტრაქტორის მახასიათებელი არ შეესაბამებოდა მოთხოვნილს.
ჩვენ, პირადად მეცნიერები საერთოდ არანაირ შეხებაში არ ვიყავით შესყიდვებთან.
ექსპერტიზა, რომელიც ჩაატარეს, მასხარაობა იყო. როგორც შეიძლება ტრაქტორისტმა და გამომძიებელმა ჩაატაროს ექსპერტიზა.
ვინ დააყენა გუთანი წინასწარ? რომელზე იყო სწორად დაყენებული. იციან სწორად დაყენება?
_ რას გულისხმობთ წინასწარ დაყენებაში?
_ გუთანი წინასწარ უნდა იყოს დაყენებული. ვინ დააყენა, ჰყავდათ ამის სპეციალისტი?
ჰყავდათ თუ არა ამის სპეციალისტები და ვის ინტერესებში შედიოდა “შეჯიბრი ტრაქტორებით”, ამაზე სასამართლო იმსჯელებს.
