– ეს განცხადება თბილისის საკრებულოს თავმჯდომარე ირაკლი შიხიაშვილმა 9 აგვისტოს საკრებულოში გამწვანებულ ზონებთან დაკავშირებით, ადგილობრივ მოსახლეობასა და ბიზნეს სექტორს შორის არსებული პრობლემების განხილვისას გააკეთა.
ბიზნესმენებმა სხდომაზე ის პროექტები წარმოადგინეს, რის გამოც კუს ტბაზე, ასათიანის ქუჩაზე და წავკისის ტყეში ხეები იჭრება.
“თქვენი მოყვანილი ხალხი “დრუჟბებით” თიბავდა ტყეს”, – შპს “მედჯგუფი-საქართველოს” გენერალური დირექტორის მირიან ამირანაშვილის მისამართით განაცხადა “მწვანეთა მოძრაობის” და წავკისის მოსახლეობის წარმომადგენელმა ზურაბ ქოროღლიშვილმა.
ქოროღლიშვილის თქმით, ოქტომბრის არჩევნებამდე ამაზე ხმას ვერ იღებდა, რადგან საჯარო სამსახურში მუშაობდა: “მე ამისთვის ციხეში ვერ წავიდოდი. ციხეში წავალ მაშინ, თუ ამით ჩემს ქვეყანას ეშველება”, – აღნიშნა მან.
მირიან ამირანაშვილმა დეტალურად განიხილა ის პროექტი, რომელიც წავკისის და კოჯრის ტყეებში მისი კომპანიის მიერ ხორციელდება და აღნიშნა, რომ მათ, პირიქით, ტერიტორიის კეთილმოწყობის სამუშაოები ჩაატარეს და ტყეც იმიტომ შემოღობეს მავთულხლართებით, პირუტყვისგან რომ დაეცვათ. რაც შეეხება ხეების ჭრას, ამირანაშვილის განცხადებით, ის მხოლოდ მოვლითი და სანიტარული, ასევე გზის ასაშენებლად განხორციელდა.
“პრემიერი საქმის კურსშია ჩვენი საქმიანობის შესახებ და მიესალმება კოჯრის მიმდებარე ტერიტორიაზე მსოფლიო დონის გამაჯანსაღებელი კომპლექსის მშენებლობას. ის, რომ პროექტი კანონიერად ხორციელდება, ამას ისიც ადასტურებს, რომ საჩივრებზე პროკურატურამ და ფინანსურმა პოლიციამ საქმის ვითარება შეისწავლეს და დადგინდა, რომ საინვესტიციო პროექტის გახორციელების უკანონობა არც ერთ პუნქტში არ არსებობს. ტერიტორია, სადაც მშენებლობა მიმდინარეობს, თბილისის მერიის საკუთრებაში იყო. ქალაქის ქონების მართვის სააგენტოსთან ხელშეკრულება გვაქვს გაფორმებული და, რა თქმა უნდა, მერიც პროექტის შესახებ საქმის კურსშია. რაც შეეხება გარემოს დაცვის მინისტრს, ისიც, ასევე, ძალიან კარგად იცნობს კომპანიის საქმიანობას, რადგან სწორედ მისმა გამოგზავნილმა სპეციალისტებით დაკომპლექტებულმა კომისიამ ადგილზე შეისწავლა, როგორც ტყის მდგომარეობა, ისე პროექტის სხვა საკითხები და მათ ვერანაირი უკანონობა ვერ აღმოაჩინეს, რომ აღარაფერი ვთქვათ ტყის გაჩეხვაზე. სწორედ მათგან მიღებულ ინფორმაციას დაეყრდნო ბიზნესომბუდსმენი, როდესაც ჩვენი დაცვა დაიწყო. ამ შემთხვევაში არა ეკოლოგიურ კატასტროფასთან, არამედ საქმე გვაქვს განსაკუთრებულ მოვლენასთან, როდესაც ბიზნესმენი სახელმწიფოს საკუთრებაში არსებული ტყის კეთილმოწყობის ვალდებულებას იღებს”, – განაცხადა “მედჯგუფი-საქართველოს” გენერალურმა დირექტორმა და დაამატა, რომ, თუ აღებულ ვალდებულებებს ვადებში არ შეასრულებს კომპანია, ის ამისთვის დაჯარიმდება.
მსგავსი საშიშროებაზე ისაუბრეს სხვა კომპანიის წარმომადგენლებმაც. რაზეც საკრებულოს თავმჯდომარე ირაკლი შიხიაშვილმა გარემოს დამცველების მისამართით განაცხადა, რომ “თუ თქვენ, ვერ დაითვლით ზარალს, ბიზნესი მოგიბრუნდებათ და გეტყვით, რომ დრო და ფული ტყუილად დააკარგვინეთ და მოგთხოვთ კომპენსაციას. თბილისის ბიუჯეტს კი ამის საშუალება არ გააჩნია, ისედაც ბევრი სოციალური პრობლემა აქვს მოსაგვარებელი”.
კომპანიების განცახდებას, რომ მშენებლობების და ხეების ჭრის ნებართვა კანონიერად აქვთ აღებული, უპირისპირდებიან მოქალაქეები და გარემოს დამცველები. არასამთავრობო ორგანიზაცია “უსაფრთხო სივრცის” წარმომადგენლმა ანა გაბრიაძემ გამოთქვა ეჭვი, რომ ხეების სანიტარულ ჭრასთან დაკავშირებით არაკომპეტენტური დასკვნებია გაცემული: “
“ასათიანის ქუჩაზე საღ ხეებზეა სანიტარული ჭრის ნებართვა გაცემული “ბოტანიკური ბაღის” მუშაკების მიერ. 10 წელია ამ სფეროში ვმუშაობ. ეს ორგანიზაცია ისეთი დასკვნებს გასცემს, სპეციალისტის მიერ ხელიც კი არაა მოწერილი და ბუნებრივია, ეჭვი ჩნდება მის კომპეტენტურობაზე. “ბოტანიკურ ბაღს” არ აქვს ის აღჭურვილობა, რის მიხედვითაც ხდება ხეების ჭრაზე ნებართვის გაცემა,” – აცხადებს ანა გაბრიაძე.
თბილისის საკრებულოს ადამიანის უფლებათა დაცვის და საზოგადოებასთან ურთიერთობის კომისიის თავმჯდომარე კახა კუკავა სხდომაზე ალტერნატიული ექსპერტიზის ჩატარების ინიციატივით გამოვიდა
“უნდა იქნეს მოძიებული არაკორუმპირებული ექსპერტული დასკვნები. კორუფცია ტრიალებს ცალკე გარემოს დაცვაში, ცალკე ექსპერტიზებში. ჩვენ უნდა მივაგნოთ იმ ხალხს, რომლებიც ობიექტურ დასკვნებს გასცემს აღნიშნულ საკითხებზე”, – ამბობს კუკავა.
სხდომის დასასრულს ირაკლი საკრებულოს თავმჯდომარის მიერ გამოითქვა ინიციატივა, რომ ყველა პროექტი ადგილზე უნდა ინახოს.
“პრეზენტირებული მშენებლობები უნდა დავათვალიეროთ და დავაზუსტოთ არის თუ არა ნამდვილი, კომპანიების მიერ წარმოდგენილი პროექტები. ვინც ნებართვა გასცა, იმასთან შეიძლება გახდეს სადაო, თორემ ბიზნესმა ის იყიდა, რაც მიყიდეს, ეს ლოგიკურია. ამ პროცესში თავიდანვე რომ ყოფილიყო ჩართული საზოგადოება, შეიძლება ამდენი ვნებათაღელვა პროცესს აღარ მოჰყოლოდა”, – განაცხადა ირაკლი შიხიაშვილმა.
