ჩვენ კითხვაზე, რა აზრის ხართ ოპოზიციის მიერ დაგეგმილ მიტინგებზე, ან რამდენად ენდობით მას, საკუთარ მოსაზრებას ოზურგეთელი მოქალაქეები გვიზიარებენ:
56 წლის ნესტორი: _ მინდა, რომ კარგად იყოს ჩემი ქვეყანა. ვინც კარგად გვაცხოვრებს, სწორ გზაზე დაგვაყენებს, ის მინდა მე, სხვა რა უნდა გითხრათ, ვერაფერს გეტყვით, ამ ეტაპზე არ ვფლობ ინფორმაციას, ზუსტად რას აპირებს ოპოზიცია და რამდენად საიმედოა ეს ხალხი.
70 წლის ომარი: _ შტერია ყველა, ოპოზიციაში ერთი კაცი ჭკვიანი არ მეგულება, ვისი დავიჯერო, ერთმანეთს ცემენ, აგინებენ, ხელისუფლება რასაც აკეთებს, ჩანს. ვაი, ამ საცოდავ ოპოზიციას…
64 წლის მზია: _ არც ოპოზიცია ვიცი და არც პოზიცია _ ვარ ჩემთვის.
65 წლის გულიკო: _ არ ვარ ოპოზიციის კმაყოფილი, რა ოპოზიციაა მაგი, ამდენი ხალხი დააყენეს ქუჩაში და ერთმანეთს უღალატეს! არ მჯერა მაგათი.
75 წლის ანდრო: _ არ მიმაჩნია ნორმალურად ეს ხალხი, მოჩვენებითია ეს ყველაფერი, არაფრის მაქნისნი არიან.
47 წლის გიგლა: _ როცა გვჭირდებოდა და გვჯეროდა მაგ ხალხის, იმედები გაგვიცრუეს და ახლა, არა მგონია, ესენი რაიმეს გამკეთებლები იყვნენ, პირდაპირ გეტყვით, არ მჯერა.
48 წლის მარინა: _ ვიმედოვნებ, რომ ეს ხელისუფლება მალე დაიხურავს ქუდს, გააღარიბა და გაამათხოვრა ხალხი, ვერ გეტყვით, რომელი კარგია და რომელი ცუდი, მაგრამ ეს ცხოვრება რომ უნდა შეიცვალოს, ეს კი ვიცი, ხალხის საკეთილდღეოდ ვიღაცამ ხომ უნდა იზრუნოს, იქნებ, მართლა გამოჩნდეს ისეთი ძალა, რომელიც უკეთესად გაუძღვება ქვეყანას.
65 წლის რეზო: _ აღარ ვიცი, ვინ კარგია და ვინ ცუდი, პოზიცია თუ ოპოზიცია, მაგრამ ეს კი ვიცი თუ ასე გაგრძელდა, მშივრები ამოვწყდებით. არჩიონ მერე, ვინ არის კარგი და ვინ არის ცუდი, საქმე გააკეთონ, ქვეყანას მიხედონ ეს არის მთავარი.
ნიკა 28 წლის: _ ოპოზიციის არ მჯერა იმიტომ, რომ არ არის სერიოზული პოლიტიკური ძალა, რომელიც თუნდაც ოპონირებას გაუწევს ხელისუფლებას, ამიტომ ვარ ჩემთვის, არ მაინტერესებს მაგათი საქმიანობა.
ბადრი 49 წლის: _ ნამდვილად არ ვიცი რას აპირებს ოპოზიცია, მაგრამ ის კი ვიცი, რომ ხალხი დაიღალა ამდენი ტყუილებით, საქმე აკეთონ სასიკეთო და შეეშვან ამ სულელურ დაპირებებს, იმედგაცრუებას და ტყუილს. ადამიანები არ ივიწყებენ, ოპოზიციამ ეს უკვე არაერთხელ გააკეთა.
ნაზი 50 წლის: _ მე ოჯახის დიასახლისი ვარ, 15 წელია, არ ვმუშაობ, რაც ეს ქვეყანა დაინგრა და დაიშალა. ჯერ აშენებული და გაკეთებული ძალიან ცოტაა. ოპოზიცია და პოზიცია ჩემთვის ერთნაირია, მირჩევნია, ნორმალური და ხალხისთვის სასარგებლო ერთ-ერთი მათგანი მაინც იყოს, არცერთი არ არის ჩვენთვის, ასე მგონია, რომ საკუთარი ტყავისთვის იბრძვიან. ამდენად, ვარ ნეიტრალური და ჩემს საქმეს რომ ვაკეთებდე, დასაქმებული რომ ვიყო, სულ აღარ დამაინტერესებდა მაგათი პოლიტიკა.
გელა 42 წლის: _ ოპოზიციას თუ კიდევ ქუჩაში სირბილი უნდა, კიდევ ხალხის დაიმედება და კიდევ მოტყუება, ვერ გეტყვით, მაგათი გაკეთებული საქმე მე არ მინახავს. ამდენად ჩემი აზრით, არ არის სანდო და საერთოდ თუ გვინდა ქვეყანა გვქონდეს, ამას სერიოზული, პატიოსანი და მამულიშვილი უნდა აკეთებდეს. სამწუხაროდ, ვერც პოზიციაში ვხედავ ასეთ ადამიანებს და ვერც _ ოპოზიციაში.
