როგორც თვითონ ამბობს, 1981 წლიდან იყო გუნდის უფროსი. მას 10-ჯერ აქვს აღებული საქართველოს თასი, ორჯერ გახდა საბჭოთა კავშირის ჩემპიონი, ერთხელ მოგებული აქვს საბჭოთა კავშირის თასი და სუპერთასი. მე ბოლოს სტადიონის უფროსიც და
გუნდის
უფროსიც იყო შეთავსებით, არის საქართველოს დამსახურებული მწვრთნელი.
ბახვას ერთ-ერთი მეგობარი ენერგეტიკისა და ბუნებრივი რესურსების მინისტრის კახი კალაძის მამის კარლო კალაძეა. “გურია ნიუსის” ინფორმაციით, ბატონი კარლო ამის გამო ხშირად სტუმრობს ოზურგეთს. მას რამდენიმეჯერ უთხოვია კიდეც ოზურგეთის მუნიციპალიტეტის გამგებლის მოვალეობის შემსრულებლისთვის კოტე შარაშენიძისთვის, თავისი მეგობრის დასაქმება, მაგრამ, ჩვენი წყაროს ინფორმაციით, შარაშენიძეს ეს თხოვნა არ გაუთვალისწინებია, რაზეც კარლო კალაძე განაწყენებულა.
ამ ინფორმაციების გადამოწმება ბახვა გიორგაძესთან ვცადეთ. იგი შეცბა და გვთხოვა, ამის შესახებ არაფერი დაგვეწერა.
_ ძალიან გთხოვთ, რა, არ დამიწეროთ, ჩემი შვილი პოლიციაში მუშაობს _ ვინმემ რამე არ უთხრას, ვერიდები. კარლო ჩემი ძმაკაცია და იყო ჩამოსული რამდენიმეჯერ. მე დავდივარ მასთან და იგი დადის ჩემთან. არ გინდათ რა გეხვეწებით, ვიღაცას შეიძლება კი თხოვა ჩემზე, მაგრამ ყურადღება არ მოუქცევიათ. ჩემს ცხოვრებაში არ დამიწყია ინტრიგნობა და არ მინდა ბავშვებს ეგ სახელი დავუტოვო, _ გვითხრა ბახვა გიორგაძემ, _ მეც მაქვს “მერცხალის” ისტორიაში წვლილი და შევთავაზე, თუ ამომიყენებთ გვერდში და საქმეს გაკეთდება კარგი იქნება,-მეთქი. რა ვუყოთ _ არ ვუნდივართ დამსახურებული მწვრთნელები, ჩამოწერილები ვართ და ღმერთმა კარგად ამყოფონ.
_ ჩვენი ინფორმაციით, ბატონმა კარლომ თხოვა გამგებელს, რომ თქვენ დაებრუნებინეთ “მერცხალში”, რაზედაც გამგებელს ყურადღება არ მიუქცევია.
_ ძალიან გთხოვთ, არ გინდათ. არ ვარ მაგის კაცი, ჟურნალისტებთან დავდგე და ვილაპარაკო. ბოდიშს გიხდით. რაც იყო, იყო და დამთავრდა. თუ კი დავჭირდები და დამიძახებენ, მივალ და მოვეხმარები. მე მაქ არც პირველკაცობა მინდა და არც არაფერი, მინდა, რომ “მერცხალი” იყოს ისეთი გუნდი, რომელიც არ ჩამორჩება კარგ გუნდებს. თქვენ რომ ჩაიხედავთ მაგ საქმეში, მიხვდებით, რისი ბრალია ეგ, _ გვითხრა გიორგაძემ.
ჩვენ კარლო კალაძეს დავუკავშირდით, რომელმაც ოზურგეთში სტუმრობა დაგვიდასტურა, თუმცა, კოტე შარაშენიძისთვის მისი მეგობრისთვის სამსახურის თხოვნის თაობაზე ინფორმაცია უარყო.
_ ბატონო კარლო, როგორც ვიცით, ოზურგეთს ხშირად სტუმრობთ.
_ დიახ, დიახ.
_ ბახვა გიორგაძის მეგობარი ბრძანდებით.
_ კი, ბატონო, გისმენთ.
_ როგორც ჩვენი წყარო ამბობს, თქვენ გამგებელს სთხოვეთ, გიორგაძე “მერცხალში” დაებრუნებინა, მან კი თქვენი თხოვნა არ გაითვალისწინა.
_ არა, არა, არაფერი… ტყუილია ეგ ყველაფერი… არა, შვილო, _ გვითხრა კარლო კალაძემ.
ჩვენ ოზურგეთის მუნიციპალიტეტის გამგებლის მოვალეობის შემსრულებელთან კოტე შარაშენიძესთან დაკავშირებაც ვცადეთ, თუმცა, მან ჩვენს სატელეფონო ზარებს არ გვიპასუხა. ბოლო დროს, მიუხედავად ჩვენი მრავალგზის მცდელობისა, ის ჩვენთან საუბარს გაურბის.
