სხდომის დღის წესრიგი საკრებულოს თავმჯდომარე ამირან გიგინეიშვილმა გააცნო. სხდომა საკმაოდ ხმაურით წარიმართა და დიდხანს გაგრძელდა _ საკრებულოს თავმჯდომარემ ორჯერ შესვენება გამოაცხადა.
“ქალაქ ლანჩხუთის განვითარების გეგმის დამტკიცების შესახებ” თავმჯდომარის მოადგილე ზვიად აფხაზავამ ისაუბრა. აღნიშნულ საკითხის განხილვას მოჰყვა დავით წულაძის მწვავე რეპლიკა:
_ ქალაქი ლანჩხუთი არ არსებობს, ვის “აბოლებთ“, თქვენ, ბატონო ამირან?! _ მიმართა საკრებულოს თავმჯდომარეს დავით წულაძემ.
“ლანჩხუთის მუნიციპალიტეტის 2013 წლის ბიუჯეტის დამტკიცების შესახებ” ლანჩხუთის მუნიციპალიტეტის საკრებულოს 2012 წლის 16 დეკემბრის #34 დადგენილებაში ცვლილების შეტანის თაობაზე ლანჩხუთის მუნიციპალიტეტის საკრებულოს დადგენილების შესახებ საკრებულოს თავმჯდომარემ ისაუბრა. არა საგადასახადო შემოსავლების ზრდის ხარჯზე და ხარჯვის ნაწილში საფეხბურთო კლუბ “გურიას” წინაშე არსებული სახელფასო და მიმდინარე ხარჯების დავალიანების დასაფინანსებლად ბიუჯეტის შემოსავლების ნაწილი გაიზარდა 90 000 ლარით.
ლანჩხუთის მუნიციპალიტეტის საკრებულოს აპარატსა და გამგეობაში საჯარო თანამდებობათა დასაკავებლად დამატებითი საკვალიფიკაციო მოთხოვნების დამტკიცების შესახებ არსებითი განხილვა შემდგომი სხდომისთვის გადაიდო.
ამ საკითხის განხილვამ დიდი ხმაურის ფონზე ჩაიარა. რაც შეეხება საკვალიფიკაიო მოთხოვნებს, შეთანხმდნენ, რომ გამგებელები და მოადგილეები უნდა იყვნენ მაგისტრები, 2-წლიანი სტაჟით; სამსახურის უფროსები კი ბაკალავრები 1-წლიანი სტაჟით. საკითხი, რაზეც საკრებულოს წევრები ვერ შეთანხმდნენ, იყო მოთხოვნები მთავარი და წამყვანი სპეციალისტები მიმართ. ეს საკითხი გადაიდო.
2013 წლის ბიუჯეტიდან სოციალური დახმარების გაცემისა და მიღების წესის დამტკიცების შესახებ იურიდიული სამსახურის უფროსმა შოთა ჩაგუნავამ ისაუბრა. მისი თქმით, ლანჩხუთის მუნიციპალიტეტის საკრებულოს 2013 წლის 29 იანვრის #1 დადგენილებაში შევიდა ცვლილება და დადგენილების პირველი მუხლით დამტკიცებული ლანჩხუთის მუნიციპალიტეტის 2013 წლის ბიუჯეტიდან სოციალური დახმარების გაცემისა და მიღების წესის 1-ლი მუხლის მე-8; მე-9 და მე-13 პუნქტები ამოღებული იქნება.
სამანდატო, საპროცედურო და ეთიკის კომისიის თავმჯდომარემ ილია გვარჯალაძემ ფრაქციებში წევრების გადანაცვლების, ფრაქციის დაშლისა და ახალი ფრაქციის შექმნის შესახებ ინფორმაცია გააცნო საკრებულოს წევრებს. მისი თქმით, ერთ-ერთ ფრაქციის წევრი ლევან ჩხაიძე გაირიცხა მარიკა თურნავას ” ქართული ოცნება _ რესპუბლიკელების” ფრაქციიდან იმის გამო, რომ ის შევიდა პარტია “ქართულ ოცნებაში” და რეგლამენტიდან გამომდინარე, ამა თუ იმ პარტიის წევრს არ აქვს უფლება იყოს სხვა სახელის მქონე ფრაქციაში. ვინაიდან ლევან ჩხაიძემ საკუთარი ნებით არ დაწერა განცხადება ფრაქციიდან წასვლის თაობაზე, იგი ფრაქციის ხელმძღვანელის მიერ გარიცხული იქნა. აღნიშნულ განცხადებას დეპუტატები სიცილითა და რეპლიკების სროლით შეხვდნენ.
აღნიშნული საკითხზე საუბრისას მწვავე კომენტარი ესროლა დავით წულაძემ:
_ ხომ ვამბობდი “ბარდაგ-ბალაგანია”,-მეთქი _ ვინ სად მიძვრება და რას აკეთებს, ვერ გაიგებ.
საკრებულოს თავმჯდომარემ არა ერთი შენიშვნისა თუ გაფრთხილების მიუხედავად წულაძე ვერ გააჩუმა _ის დღევანდელ სხდომაზე განსაკუთრებით აქტიურობით გამოირჩეოდა.
საკრებულოს დეპუტატები ფეხბურთის თემითაც დაინტერესდნენ. ლევან ჩხაიძემ მადლობა გადაუხადა გამგებელს “გურიას” თანადგომისათვის.
“დღეს ლანჩხუთის ბიუჯეტს არ აქვს იმის საშუალება, რომ ფეხბურთის კლუბი დააფინანსოს. ეს ძალიან დიდ ხარჯებთანაა დაკავშირებული, _ თქვა გამგებლის მოვალეობის შემსრულებელმა ზაზა ურუშაძემ, _ საუბარი გვაქვს რუს და ბერძენ სპონსორებთან. უახლოესს დღეებში მივიღებთ გადაწყვეტილებას. მუნიციპალიტეტის ბალანსზე გადმოვიდა გრიგოლეთის საწვრთნელი ბაზა, ინტენსიური მუშაობა მიმდინარეობს სტადიონზე… რაც მთავარია “გურიაში” ლანჩხუთელები ითამაშებენ. 5 ლანჩხუთელი უკვე შეყვანილია ძირითად შემადგენლობაში. გუნდში საშუალო ასაკი ნაცვლად, 33 -39 წლისა, 25 -26 წელი იქნება. როგორც ცნობილია, ფეხბურთელებს შორის გაუგებრობა მოხდა, თუმცა, ერთ-ერთმა დამირეკა და ბოდიშიც მომიხადა. მთავარია, რომ ჩვენ ყველაფერს გავაკეთებთ, დაწყებულ საქმეს ბოლომდე მივიყვანთ.”
