“იმის შიშით, შენობა თავზე არ ჩამოენგრათ, ბავშვები სკოლაში ვერ დადიან”

პრობლემები მარნეულში, ისევე როგორც საქართველოს უმეტეს რეგიონში, ერთი სახისაა. სოფლებში არის წყლის, დენისა და გზის პრობლემები.  მოგეხსენებათ, მარნეულის მოსახლეობა ძირითადად სოფლის მეურნეობითაა დაკავებული და მათთვის უმნიშვნელოვანესია მოყვანილი  პროდუქტის გატანა და რუსეთის ბაზრის გახსნა.

როგორც ნინო ბურჯანაძემ აღნიშნა, სირცხვილია 21-ე საუკუნეში ასეთი სახის პრობლემებზე საუბარი. ნინო ბურჯანაძესთან ერთად იმყოფება   ირაკლი ბათიაშვილი, “სახალხო კრების” ლიდერი გია ბურჯანაძე და შიდა ქართლის რეგიონული და მარნეულის რაიონული ორგანიზაციის ხელმძღვანელები და წარმომადგენლები. შეხვედრები გრძელდება. ნინო ბურჯანაძე უახლოეს წუთებში ეწვევა სოფელ ორჯონიკიძეს, ალგეთს, ხოლო 19:00 საათისთვის შეხვედრას გამართავს მარნეულის ცენტრში.  შეხვედრების შემდეგ ქალბატონმა ნინო ბურჯანაძემ ჟურნალისტებთან საუბრისას აღნიშნა:

“აქ ჩვენ პრობლემები შეიძლება ორ ნაწილად დავყოთ: ერთი არის ყოფითი და მეორე სახელმწიფოებრივი მნიშვნელობის საკითხები. ყოფითი პრობლემებიდან ადამიანებისათვის განსაკუთრებით მტკივნეულია ის, რომ ამ სოფელში, ისევე როგორც საქართველოს სხვა ბევრ სოფელში, არ არის სასმელი წყალი, არ არის გზა და რაც ყველაზე სამწუხაროა, სოფელში სადაც 1300-მდე ოჯახი ცხოვრობს არის მხოლოდ ერთი სკოლა, რომელიც ავარიულ მდგომარეობაშია. პრაქტიკულად, იმის შიშით, რომ ბავშვებს სკოლა თავზე არ ჩამოენგრეთ, ისინი სკოლაში ვერ დადიან. ეს ის პრობლემებია, რომლებსაც მიხედვა უნდა.

საერთო სახელმწიფოებრივი პრობლემებიდან აღსანიშნავია, ის რომ სოფლის მოსახლეობისათვის მეტად მტკივნეულია რუსეთის ბაზრისა და სავიზო რეჟიმის საკითხი. მე მიხარია, რომ აბსოლუტურად ყველა ადამიანი, ვინც დღეს შეხვედრას ესწრებოდა, დიდი ენთუზიაზმით გამოეხმაურა მოთხოვნას, რომ აუცილებელია მათმა შვილებმა ისწავლონ და იმეტყველონ ქართულ ენაზე და ჩაერთონ საერთო სახელმწიფოებრივ საქმეში. ჩემი პრეზიდენტად არჩევის შემთხვევაში, პირობას ვდებ, რომ გავაკეთებ ყველაფერს იმისათვის, რათა საქართველოს ყველა მოქალაქემ თავი იგრძნოს ღირსეულად, დაცულად და ეს იქნება ჩვენი სამშობლოს ერთიანობის, ძლიერების და განვითარების გარანტი.”