როგორც გამოკითხვები ცხადჰყოფდა, სოფელ თხინვალის მოსახლეობას გზის შეკეთებასთან ერთად, საჯარო სკოლის შენობის, ადმინისტრაციული შენობის, კლუბის და საბავშვო ბაღის რემონტი ესაჭიროებოდა. ასევე, მოსახლეობა მოსაცდელის გაკეთებას და სტადიონის მოწყობასაც ითხოვდა. გამოკითხვის შედეგების გაცნობის შემდეგ, მუნიციპალიტეტის ხელმძღვანელობამ გზის მოხრეშვა გადაწყვიტა, რისთვისაც ბიუჯეტიდან 7 021 ლარი გამოყო. ასევე, 6 948 ლარად ორი მოსაცდელი გაკეთდა, სპორტული მოედნის მოსაწყობად კი 6658 ლარი დაიხარჯა.
როგორც “საქართველოს დემოკრატიული განვითარების კავშირის” ეკონომისტი ლევან ჩხაიძე ამბობს, მათი ორგანიზაცია დაინტერესდა იმ სამუშაოებით, რომელიც გასულ წელს სოფელ თხინვალში ჩატარდა: _ ჩვენს ინტერესს წარმოადგენდა სოფელ თხინვალში მუნიციპალიტეტის მიერ შესრულებული სამუშაოების შესაბამისობა ხელშეკრულებით გათვალისწინებულ პირობებთან. მიუხედავად იმისა, რომ თხინვალის სკოლას ფანჯრები არ აქვს და მოსწავლეები ფარღალალა საკლასო ოთახებში იღებენ განათლებას, მუნიციპალიტეტის ხელმძღვანელობამ მიიღო გადაწყვეტილება, მოსაცდელების მშენებლობაზე 6 948 ლარი დაეხარჯა. ერთი მოსაცდელის ფასად შესაძლო იყო სკოლის შენობის მთლიანი შემინვა. ზოგიერთს შესაძლოა გაუჩნდეს მოსაზრება, რომ სკოლის შენობა მუნიციპალიტეტის საკუთრებას არ წარმოადგენს და უფლებამოსილება არ გააჩნია, ამ მიმართულებით გახარჯოს ადგილობრივი ბიუჯეტის თანხები, მაგრამ აღვნიშნავთ, რომ არც პოლიციის დაფინანსება არ შეიძლება მუნიციპალიტეტის ბიუჯეტიდან, რისთვისაც ყოველწლიურად ადგილობრივი ბიუჯეტი 120 000 ლარს ხარჯავს. თუ შესაძლებელია პოლიციის დაფინანსება, იგივე წარმატებით შესაძლებელია სკოლის შენობის შერემონტება, _ ამბობს ჩხაიძე.
მისივე თქმით, თხინვალში გახორციელებული პროექტებიდან ყველაზე საინტერესო აღმოჩნდა სპორტული მოედნის მოწყობა, რომლისთვისაც 6 658 ლარი დაიხარჯა _ 2010 წლის 26 აპრილს, ოზურგეთის მუნიციპალიტეტის გამგებელმა, “ერთ პირთან მოლაპარაკების” ფორმით, #92 ხელშეკრულება გააფორმა ინდივიდუალურ მეწარმე ირაკლი ახვლედიანთან. შესყიდვის ფორმის განსაზღვრა შესაბამისობაშია საქართველოს მთავრობის 2010 წლის 13 იანვრის #41 განკარგულებასთან. სადეფექტო აქტში აღნიშნულია შემდეგი სამუშაოების შესრულება: არსებული ღობის დემონტაჟი _ 50 მეტრი; ბეტონის ფუნდამენტის მოწყობა _ 10 ერთეული, ბეტონის ფუნდამენტისა და ზეძირკველის მოწყობა შესასვლელ ჭიშკარში _ 10X0,6X0,25 მ; ხის მასალა ზეძირკველის მოსაწყობად _ 0,6 კუბური მეტრი; განათების მოწყობა _ 6 ცალი; მეორადი 150 მმ ლითონის მილისგან კალათბურთის ფარის საყრდენის დამზადება; მოედნის მიმდებარე ტერიტორიისა და სანიაღვრე არხის მოწყობა (კოვშიანი ექსკავატორით); არსებული ღობის შევსება მავთულბადით. ერთი მეტრი მავთულბადის ღირებულება _ 5 ლარი. ყოველივე ამ საქმიანობის შესრულებაში მუნიციპალიტეტმა 6 658 ლარი გაიღო.
“ოზურგეთის მუნიციპალიტეტის ინსპექტირების ჯგუფმა, 8-კაციანი შემადგენლობით, 18 და 28 მაისს, შეამოწმა ხელშეკრულებით გათვალისწინებულ მოთხოვნებთან ჩატარებული სამუშაოების შესაბამისობა და 
დაადგინა, რომ ყოველგვარი სამუშაოები ჩატარებულია ხარჯთაღრიცხვის თანახმად და ის სრულად არის შესრულებული”, – ვკითხულობთ დოკუმენტში.
თუმცა, როგორც ლევან ჩხაიძე ამბობს, რეალობა ასეთია: _ არსებული 50 მეტრი ღობე დემონტირებულია, დამონტაჟებულია 30 მეტრი, მაგრამ იქ არსებული 20 მეტრი ღობე აღარ მოჩანს, არც სადეფექტო აქტშია მითითებული, რა უქნეს მორჩენილ სამშენებლო მასალას. უნდა მოწყობილიყო 10 ერთეული ბეტონის ფუნდამენტი, ადგილზე მისულებს კი მხოლოდ 5 მათგანი დაგვხვდა, დანარჩენებს ვერსად მივაგენით; ბეტონის ფუნდამენტისა და ზეძირკველის მოწყობა შესასვლელ ჭიშკარში 10X0,6X0,25 მ _ შესასვლელ ჭიშკარში 3 მეტრი ფუნდამენტია მოწყობილი, დარჩენილი 7 მეტრი არსად ჩანს; მეორადი 150 მმ ლითონის მილისაგან კალათბურთის ფარის საყრდენის დამზადება _ ადგილზე დათვალიერებისას დადგინდა, რომ კალათბურთის ფარის საყრდენი არ შეცვლილა. გამოყენებულია მოედნის ღობის ბოძი, რომელიც იქ თავიდანვე იყო დამონტაჟებული, ანუ მასზე დანახარჯი არ გაღებულა; მოედნის მიმდებარე ტერიტორიისა და სანიაღვრე არხის მოწყობა კოვშიანი ექსკავატორით _ ხარჯთაღრიცხვის მიხედვით, 10 მეტრიანი არხის ტრაქტორით გაყვანას 600 ლარი დაახარჯეს, ხოლო მოედნის მიმდებარე ტერიტორიის მოწყობაზე საუბარი ზედმეტია. მოედანთან მისასვლელის ნახვის შემდეგ ნათელი გახდება, რომ იქ არანაირ მოწესრიგების სამუშაოები არ ჩატარებულა.
აქედან გამომდინარე, შესაძლოა ვივარაუდოთ, რომ სამუშაოთა მწარმოებელმა უხარისხოდ და არასრულყოფილად შეასრულა სამუშაოები, რამაც სოფლის მოსახლეობის ინტერესები დააზარალა. ადგილობრივმა ხელისუფლებამ კი გაცილებით უფრო მეტად დაკვირვებით უნდა განახორციელოს ბიუჯეტის ფულით გახორციელებული საქმიანობების მიღება-ჩაბარება. იმ ადამიანებმა, რომლებმაც ხელი მოაწერეს ბოლომდე შეუსრულებელი საქმიანობების მიღება-ჩაბარებას, შესაბამისი ახსნა-განმარტებები უნდა მისცენ ხელისუფლებას, _ მიიჩნევს “საქართველოს დემოკრატიული განვითარების კავშირის” ეკონომისტი.
თუმცა, მის მოსაზრებას არ ეთანხმება სოფელ თხინვალის რწმუნებული აბესალომ ბოლქვაძე და ამბობს, რომ გასულ წელს და არამარტო გასულ წელს, სოფელისთვის გამოყოფილი თანხა მიზანმიმართულად დაიხარჯა და შესაბამისად, გათვალისწინებული სამუშაოები დათქმულ ვადებში, ხარისხიანად ჩატარდა.
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები დემოკრატიისთვის” ფარგლებში.
