ღია წერილი ნოდარ ხადურს: “გამოფხიზლდით, გამოფხიზლდით!”

_ 2012 წლის 12 დეკემბერს განახლდა “სახელმწიფო საშინაო ვალის პრობლემათა შემსწავლელი სახელმწიფო კომისიის” შემადგენლობა და უფლებამოსილების ვადა გაუხანგრძლივდა 1 წლით, 2014 წლის იანვრამდე. კომისიამ თავის მხრივ შექმნა “სამუშაო ჯგუფი”, რომელიც სწავლობს კოოპერატიული ბინათმშენებლობის დაუსრულებლობით გამოწვეულ პრობლემას და ეს ჯგუფი დაკომლექტებულია ფინანსთა სამინისტროს კადრებით. თუმცა, საქართველოს საფინანსო-საბიუჯეტო კომიტეტის 2012 წლის 12 ნოემბრის სხდომაზე გადაწყდა (ამოიღეთ საოქმო ჩანაწერი), რომ მასში გაერთიანდებოდა სამოქალაქო სექტორის წარმომადგენლები და დაზარალებულთა გარკვეული საინიციატივო ჯგუფები. ეს არ შესრულდა! 8 თვე გავიდა, რაც ეს “სამუშაო ჯგუფი” სწავლობს, სწავლობს და რით ვერ შეისწავლა ეს საკითხი. თქვენი “კომპეტენტური” პასუხი ამის შესახებ კი გაჭრილი ვაშლივით ჰგავს იმ პასუხს, რასაც წინა ხელისუფლება აძლევდა ათასობით დაზარალებულს _ “მუშაობს სახელმწიფო კომისია”! ბევრჯერ ვითხოვეთ თქვენგან _ ჩაგვრთეთ ამ პროცესში, მოგვისმინეთ, გაეცანით იმ დოკუმენტებს, რომელსაც წარმოგიდგენთ, და ვფიქრობთ ეს ხელს შეუწყობს ნათელი მოეფინოს ამ სფეროში არსებულ პრობლემებს. ასევე გთხოვეთ იმ მიზეზების დასახელება, რაც ხელს უშლის საკითხის “შესწავლის” პროცესის დასრულებას, კერძოდ: რამდენი დაზარალებულია ამ პრობლემით საქართველოში; რამდენია “საშინაო ვალის” ეს ნაწილი; რა მექნიზმით,წესით და პროგრამით აპირებთ ვალის გასტუმრებას; ვისი და რისი მიზეზით ხდებოდა გასულ წლებში ის უამრავი დარღვევა რაც თქვენი სიტყვებით, ხელს უშლის ნათელი გახადოს რეალური მდგომარეობა. ჯერ კიდევ 2012 წლის ოქტომბრის თვეში მოგწერეთ, რომ გვესმოდა, რა მძიმე მემკვიდრეობა დაგხვდათ წინა ხელისუფლებისგან. გაგეწერათ 5 წლიანი პროგრამა და ეტაპობრივად შედგომოდით აღიარებული ვალის გასტუმრებას, დაგესრულებინათ დასამთავრებელი კოოპერატიული კორპუსები, რომელთა მდგომარეობა დღითიდღე სავალალო ხდება და ამ კორპუსებში ცხოვრობს ასობით ოჯახი! კიდევ ერთხელ მოგიწოდებთ! გამოფხიზლდით, გამოფხიზლდით და ერთად გადავდგათ ნაბიჯები კოოპერატიული ბინათმშენებლობის პრობლემის გადაჭრისთვის. ბატონო მინისტრო! მოგიწოდებთ საჯაროობისაკენ, და ჩვენის მხრივ მზად ვართ აქტიური, ყოველდღიური თანამშრომლობისათვის, _ აღნიშნულია წერილში.