სადაც თავდადებით ემსახურებოდა საქართველოს მოსახლეობას, ჩოხატაურელებს კი უანგაროდ შეეძლოთ ამ ინსტიტუტში მკურნალობა და კონსულტაციები.
ბატონი არჩილი დღეს ჩვენი სტუმარია.
_ ბატონო არჩილ, თბილისის სამედიცინო ინსტიტუტის დამთავრების შემდეგ, სწავლა რუსეთში, ასპირანტურაში გააგრძელეთ. რუსეთში საკმაოდ პრესტიჟულ კლინიკაში მოღვაწეობდით, საქართველოში 20 წლის შემდეგ დაბრუნდით…
_ დიახ, რუსეთში, 20 წლის მანძილზე საკმაოდ დიდი გამოცდილება და ცოდნა შევიძინე, შემდეგ კი საქართველოში დავბრუნდი ოჯახური პირობების გამო _ ჩემი მშობლები არ მინდოდა მარტო ყოფილიყვნენ და ამან გადამაწყვეტინა, კვლავ საქართველოს დავბრუნებოდი. რამდენიმე ათეული წელი ჩემს მეგობარ კოლეგებთან ერთად ნაყოფიერად ვიმუშავე ჟორდანიას სახელობის ინსტიტუტში.
_ როგორც ცნობილია, მას შემდეგ, რაც თქვენ ამ ინსტიტუტს აღარ ხელმძღვანელობდით, არ შეგიწყვეტიათ ფიქრი და მოქმედება იმასთან დაკავშირებით, რომ ამ ტიპის კლინიკა კვლავ აღდგენილიყო საქართველოში.
_ თავის დროზე იმიტომ დაარსდა ჟორდანიას ინსტიტუტი, რომ ის ყოფილიყო არა კომერციული დაწესებულება, არამედ, ყოფილიყო მთელი საქართველოს მასშტაბით, მედიცინის მუშაკების, სტუდენტების კვალიფიკაციის ამაღლებისთვის, განათლებისთვის, კონფერენციებისთვის, სიმპოზიუმებისთვის და ა.შ. ამიტომაც გადავწყვიტე, შევქმნა კლინიკა, რომელსაც ყველა ეს თვისება ექნება შენარჩუნებული, ანუ გააგრძელებს მუშაობას იმ პროფილით, რისთვისაც თავის დროზე დაარსდა ჟორდანიას ინსტიტუტი. მაქვს კერძო ფართი, რომელსაც გაუკეთდა რემონტი და მინდა გითხრათ, რომ სულ მალე, მე და ჩემი მეგობრები კვლავ ხალხის სამსახურში ჩავდგებით.
_ არასახარბიელო მდგომარეობაა საქართველოში შობადობის თვალსაზრისით, რას იტყვით ამ საკითხთან დაკავშირებით?
_ საქართველო, შობადობის თვალსაზრისით, განეკუთვნება, ე.წ. ევროპული ტიპის ქვეყნებს, როგორებიცაა: ბელგია, იტალია, საფრანგეთი, ინგლისი და სხვა. ამ ქვეყნებისთვის და მათ შორის საქართველოსთვის, დამახასიათებელია შობადობის შემცირება და მოსახლეობის გადაბერება _ ეს ნიშნავს, რომ ამ ქვეყნების მოსახლეობის რაოდენობა მცირდება და მცირედი შობადობის მომატება ხდება, ძირითადად, ემიგრანტების ხარჯზე. რაც არ უნდა ვიძახოთ, ქართველები მცირერიცხოვანი ერი ვართ და აუცილებლად უნდა გავმრავლდეთო, ამ პრობლემას მხოლოდ ლოზუნგებით ვერ გადავჭრით, ამისათვის საჭიროა მოხდეს სწორი დემოგრაფიული, სოციალური და ეკონომიური პოლიტიკის გატარება. რაც ხელს შეუწყობს შობადობის სტაბილიზაციას.
_ როგორც ცნობილია, თქვენ ძალიან ბევრ უშვილო ოჯახს დაეხმარეთ, თუმცა ეს პრობლემა კვლავ აქტუალურია.
_ საქართველოში მოსახლეობის 10% არის უშვილო, ანუ თუ ერთი წლის განმავლობაში რეგულარული სექსუალური კავშირის შედეგად, ქალი არ ორსულდება, ის ითვლება უშვილოდ. ამას ემატება 1/2%, როცა ქალს შეუძლია დაორსულება, მაგრამ მისი ჯანმრთელობის მდგომარეობა (თირკმლის, ღვიძლის, გულ-სისხლძარღვთა სისტემის დაავადებები) არ იძლევა იმის საშუალებას, რომ ეს ორსულობა მიიტანოს ბოლომდე. კიდევ არის ორნახევარი პროცენტი, რომელთაც შეუძლიათ დაორსულებაც და მშობიარობაც, მაგრამ მათ მიერ დაბადებული ბავშვი არ სჭირდება არც ოჯახს და არც საზოგადოებას, იმიტომ, რომ დედას აქვს გენეტიკურად განპირობებული ფსიქიკური დაავადება, რაც 100%-ით გადადის შთამომავლობაზე. ასეთ კონტიგენტს უნდა ვურჩიოთ, რომ შვილები არ იყოლიონ.
_ საგრძნობლად იმატა აბორტის რიცხვმა მცირე ასაკის გოგონებში, დემოგრაფიული პრობლემის ერთ-ერთი მიზეზი ესეცაა…
_ მიუხედავად იმისა, რომ აბორტების რიცხვი საქართველოში ბოლო 25 წლის განმავლობაში 10-ჯერ შემცირდა, მაინც ბევრია. რა თქმა უნდა, ყველაზე არასასიამოვნოა ის ფაქტი, რომ 15 წლიდან მოზარდებში აბორტის გაკეთების რიცხვმა საკმაოდ იმატა. ეს საშინელებაა, რადგან ის, როგორც მორალურად, ასევე ფიზიოლოგიურად დიდ დაღს ასვამს მოზარდს. საქართველოში მოზარდებში აბორტის რიცხვი უფრო მაღალია, ვიდრე ევროპაში. ევროპის ქვეყნებში განგაშს ტეხდნენ ამის გამო, მაგრამ მათ ეს პერიოდი გაიარეს. ეს არის საზოგადოების ემანსიპაციის თავისებური გამოვლინება. პრესის, ტელევიზიის აღვირახსნილობის დემონსტრირება და სხვა. დღეს საქართველოში, სამწუხაროდ, არ არის სათანადოდ განვითარებული სქესობრივი აღზრდა. არ იციან თანამედროვე ჩასახვის საწინააღმდეგო საშუალებების სწორი გამოყენება. თუმცა, უნდა ითქვას, რომ ჩემი და ჩემი კოლეგების ძირითადი მოღვაწეობით, ჯანმრთელობის სამინისტროსა და ჟურნალისტების დახმარებით, მოსახლეობის მნიშვნელოვანი ნაწილი ხმარობს ულტრათანამედროვე ჰორმონალურ საშუალებებს. ზოგიერთი დემაგოგი ამბობს, რომ ეს საშუალებები მავნე ზემოქმედებას ახდენს ქალის ჯანმრთელობაზე, რაც სიმართლეს არ შეესაბამება.
_ რა მდგომარეობაა დღეს მედიცინაში?
_ ჩემი შეფასებით მედიცინა დღეს უფსკრულის წინაშე დგას. თუ ასე გაგრძელდება, შეიძლება, საქართველოში მედიცინა დაიღუპოს. ძირითადი მიზეზი ამისა არის სამედიცინო განათლებისა და პროფესიონალიზმის დაქვეითება. მეორე უკიდურესობა გახლავთ მედიცინაში კომერციონალიზმი. დღეს საქართველოში საავადმყოფოები ეკუთვნის ფარმაცევტულ და სადაზღვევო კომპანიებს. ეს დეგრადაცია თუ არ შეჩერდა და პროცესი კვლავ გაგრძელდა, სავალალო შედეგს მივიღებთ. ექიმი იძულებულია, იფიქროს შემოსავალზე, ხოლო განათლებასა და კვალიფიკაციის ამაღლებაზე ზრუნვის დრო, სამწუხაროდ, აღარ რჩება. იმედი მაქვს, რომ ეს პრობლემა დღევანდელი ხელისუფლების თანადგომით დადებითად გადაწყდება.
