“ეს იმას ნიშნავს, რომ მე შტაბში, მასთან და მის გუნდთან ერთად ვერ ვიმუშავებ და შესაბამისად, ვერ მივიღებ მონაწილეობას საშტაბო გადაწყვეტილებების მიღებაში. ეს არის ჩემი პირადი პოზიცია და არა საერთო პარტიული. “რესპუბლიკურ პარტიას” საარჩევნო საქმიანობის ყველა მიმართულებით ჰყავს კომპეტენტური, გამოცდილი ადამიანები და ისინი ჩაერთვებიან საარჩევნო კომისიებისა და შტაბების მუშაობაში, _ აცხადებს ჩვენთან საუბრის დროს ტიფო მიქატაძე, _ მე ვარ პარტიის, კოალიციის საპარლამენტო კანდიდატის ერთგული მხარდამჭერი და საარჩევნო ბრძოლაში ვრჩები, როგორც რიგითი ჯარისკაცი და არა როგორც საბრძოლო შტაბის წევრი.
პარტია “ქართული ოცნება – დემოკრატიული საქართველოს” რაიონულ ლიდერებს არ აღმოაჩნდათ რაიონის წინაშე არსებული პრობლემების გადაწყვეტის, საზოგადოებრივი შეკვეთების რეალიზაციის, არც კოალიციის წევრებთან გუნდური მუშაობისა და პასუხისმგებლობის გადანაწილების სურვილი და უნარი. მეტიც, თვეების განმავლობაში ჩვენ ვხედავთ მათი მხრიდან “რესპუბლიკური პარტიის,” ჩემი და ჩემი ოჯახის წინააღმდეგ ბრძოლას. ასეთი დამოკიდებულებები არსებობს კოალიციაში შემავალი პარტიებთან მიმართებაშიც.
ამიტომ დ. დარჩიას, კ. შარაშენიძის და “ქართული ოცნების” სხვა ლიდერებისთვის მხარდაჭერა ჩემთვის არა პოლიტიკის, არამედ ღირსების საკითხად იქცა. ასეთ გარემოში მე ვერ ვიმუშავებ, ვერ შევძლებ სრულად ჩემი რესურსებისა და გამოცდილების გამოვლენას, ვერ ვიქნები პროდუქტიული.
რადგან, ამჟამადაც, კოალიციის საპრეზიდენტო კანდიდატის მხარდაჭერისას, კვლავ ერთ გუნდად გვიწევს მუშაობა, მიუხედავად ზემოთ თქმულისა, ჩვენ არ გავურბივართ პასუხისმგებლობას და შექმნილ მდგომარეობაში ვეძებთ უფრო რაციონალურ ფორმას კოალიციური თანამშრომლობისთვის,” _ გვითხრა ტიფო მიქატაძემ.
