იმის შესახებ, თუ როგორ ხვდება სასწავლო წელს ჩოხატაურის მუნიციპალიტეტში არსებული სკოლები, რა პრობლემების წინაშე დგანან და რა მოთხოვნები აქვთ მათ, გვესაუბრება ჩოხატაურის მუნიციპალიტეტის რესურსცენტრის უფროსი შორენა სიხარულიძე.
_ სასწავლო წელი როდის იწყება?
_ სასწავლო წელი იწყება 16 სექტემბერს. ეს გადაწყვეტილია და არ შეიცვლება.
_ უკვე რამდენიმე თვეა, რაც რესურსცენტრის უფროსი ხართ, ეს საკმარისი დროა იმისთვის, რომ სკოლებში არსებული მდგომარეობა შეგესწავლათ და მათი პრობლემებისა თუ მოთხოვნების შესახებ გაგეგოთ. რამდენად მზად არიან სკოლები ახალი სასწავლო წლის დაწყებისთვის?
_ დავიწყოთ ინფრასტრუქტურით _ სულ ვარემონტებთ თერთმეტ სკოლას, ხუთ სკოლაში (ამაღლება, ქვაბღა, შუა ფარცხმა, ვან-ზომლეთი, დაბლაციხე) სამუშაოები დაწყებულია. ექვს სკოლაში ველოდებით ინფრასტრუქტურის სამსახურის წარმომადგენლებს. ტენდერი უკვე დამთავრდა და გამარჯვებულიც გამოვლენილია, იურიდიული დოკუმენტების გაფორმებაა დარჩენილი. ამის შემდეგ კიდევ ექვს სკოლაში დაიწყება სარემონტო სამუშაოები და ვფიქრობ, რომ სასწავლო წლისთვის დასრულდება.
_ მაგრამ იმას, რასაც რემონტი ჰქვია, დიდი დრო დასჭირდება?
_ ინფრასტრუქტურის სამსახურმაც გვითხრა, რომ შესაძლოა, ვერ მოვასწროთო, მაგრამ ჩქარი ტემპით მუშაობენ. ვნახოთ, რა და როგორ მოესწრება.
_ “გურია ნიუსი” უკვე წერდა, რომ მუნიციპალიტეტში რამდენიმე ახალი სკოლა აშენდება.
_ საერთოდ, მთელ საქართველოში ხუთი სკოლის მშენებლობაა დაგეგმილი და ყველა ჩვენთან ვერ აშენდება. ამ ეტაპზე მხოლოდ სოფელ წიფნარის სკოლის მშენებლობა დაიწყება, თუმცა, ამას სასწავლო პროცესთან შეხება არ ექნება და ხელს არ შეუშლის. სკოლის მშენებლობა დაიწყება სექტემბერში.
_ ჩვენ გვაქვს ინფორმაცია, რომ გუთურის საჯარო სკოლიდან მიიღეთ განცხადება სკოლის ავარიული მდგომარეობის შესახებ. ამასთან დაკავშირებით რა გადაწყდა?
_ მუნიციპალიტეტის გამგებლის მოვალეობის შემსრულებელმა, თამაზ ჯინჭარაძემ გუთურის საჯარო სკოლის მდგომარეობის შესასწავლად გამოყო კომისია. კომისიის წარმომადგენლები მივიდნენ ადგილზე, ნახეს, შეაფასეს და დაგვპირდნენ დახმარებას. ამ ეტაპზე, რაც შეიძლება, გაკეთდეს, გასამაგრებელი სამუშაოებია, სახიფათო მდგომარეობა რომ არ შეექმნეს ბავშვებს და დაცული იყოს უსაფრთხოება. ეს გაკეთდება აუცილებლად.
_ როგორც ვიცით, ძალიან მტკივნეულად ჩაიარა დირექტორების სერტიფიცირების პირველმა ეტაპმა…
_ სამწუხაროდ, აპლიკანტთა მხოლოდ 60%-მა გადალახა კომპეტენციის მინიმალური ზღვარი.
_ რამდენი სკოლა დარჩა დირექტორის გარეშე?
_ 15 სკოლის დირექტორმა ვერ გადალახა ზღვარი, თუმცა, ისინი, ჯერჯერობით, რჩებიან მოვალეობის შემსრულებლებად, რადგან მათი ჩანაცვლება ახალი კადრებით დროში გაწელილი პროცესია. როცა ტესტირებისა და გასაუბრების ეტაპების გადალახვის შემდეგ დირექტორს ეძლევა სერტიფიკატი, მერე ირჩევს სკოლას, სადაც სამეურვეო საბჭო წყვეტს მისი დანიშვნის საკითხს.
_ სკოლის დირექტორებს საათობრივი დატვირთვის საშუალება თუ ექნებათ?
_ სკოლის დირექტორები, რადგან მიზერული ანაზღაურება ჰქონდათ, სრული დატვირთვით მუშაობდნენ გაკვეთილებზე. ეს შეცდომა იყო, რადგან სრული დატვირთვით ვერ იმუშავებ, როცა დირექტორი ხარ. დირექტორი აუცილებელია, ჩართული იყოს სასწავლო პროცესში, მაგრამ არა მთელი დატვირთვით.
_ ახალი სასწავლო წლიდან რა სიახლეებია სკოლებში?
_ სიახლეა ტრანსპორტთან დაკავშირებით. განათლებისა და მეცნიერების სამინისტრომ უკვე დადო ხელშეკრულება და ტრანსპორტი გაიგზავნება იმ სკოლებში, რომელი სკოლის დირექტორებმაც წარმოადგინეს მოთხოვნა ამის თაობაზე. სიახლეა ისიც, რომ სკოლის დირექტორებს და ადმინისტრაციას (დარაჯი, ბუღალტერი, საქმეთა მმართველი, დამლაგებელი) გაეზარდათ ანაზღაურება.
_ მუნიციპალიტეტში თუ არის ისეთი სკოლა, სადაც რომელიმე საგანი არ ისწავლება?
_ არა, ასეთი სკოლა არ გვაქვს, მაგრამ არის სკოლები, სადაც არ ასწავლიან პროფესიონალები. წელს პროგრამების _ “ასწავლე საქართველოში” და “ასწავლე და ისწავლე საქართველოსთან ერთად” _ ფარგლებში გვეყოლება ოთხი ინგლისური ენის მასწავლებელი, რომელიც გადანაწილდება შუა ამაღლების, ზემო სურების, ზოტისა და ქვაბღის სკოლებში. კოორდინატორები უკვე იყვნენ ჩამოსულები, გაარკვიეს საცხოვრებელი პირობები, სადაც პედაგოგები იცხოვრებენ. ამის გარდა, შესაძლებელია, სხვა საგნის მასწავლებლებითაც დაგვეხმარონ. სამწუხაროდ, სკოლის დირექტორები არ გვაწვდიან კადრების შესახებ ინფორმაციას, რაც განპირობებულია უფრო სუბიექტური მიზეზებით. მართალია, ეს მტკივნეულია, მაგრამ ჩემთვის მიუღებელია, რადგან არაპროფესიონალ მასწავლებელს სწავლების ხარისხი დაბალი ექნება. ამ პროგრამით ჩვენ გვაქვს შესაძლებლობა, ნებისმიერი საგნის მასწავლებელი მოვითხოვოთ.
_ აქვს თუ არა პედაგოგებს ასაკობრივი შეზღუდვა?
_ არანაირი, მაგრამ 2014 წლის პირველი იანვრიდან, მასწავლებელი, რომელიც არ იქნება სერტიფიცირებული, სკოლას დატოვებს.
_ თითქოს, ერთგვარ ტრადიციად იქცა, საბაზო საფეხურის დამთავრების შემდეგ, წარჩინებული მოსწავლეებისთვის საჩუქრად კომპიუტერების გადაცემა. გაგრძელდება თუ არა ეს ღონისძიება. აგრეთვე, მიიღებენ თუ არა პირველკლასელები ნეთბუქებს?
_ ეს ღონისძიება გაგრძელდება. წელს ასეთი ექვსი მოსწავლე გვყავს, ექვსივე #1 საჯარო სკოლის მოსწავლეა, რაც ძალიან მიკვირს. რაც შეეხება პირველკლასელებს, ისინი მიიღებენ ნეთბუქებს.
_ რამდენი პირველკლასელი გვეყოლება და არის თუ არა სკოლა, სადაც არ ეყოლებათ პირველკლასელი?
_ ზუსტი სტატისტიკა, თუ რამდენი პირველკლასელი გვეყოლება, ჯერ არ გვაქვს, თუმცა, არის სკოლები, სადაც პირველკლასელები არ ეყოლებათ.
_ კლასკომპლექტი თუ გაქვთ რომელიმე სკოლაში, რაც, ალბათ, გარკვეულ პრობლემას ქმნის?
_ კლასკომპლექტი გვაქვს რამდენიმე სოფელში და არანაირ პრობლემას არ ქმნის. პრობლემა ის არის, რომ ცოტაა ბავშვიც და მასწავლებელიც, შესაბამისად, მოტივაციაც უფრო ნაკლებია. ეს არის, ძირითადად, მაღალმთიან სოფლებში.
_ თუ გაქვთ ინფორმაცია კურსდამთავრებულებზე, რომლებმაც ჩააბარეს მისაღები გამოცდები?
_ დაახლოებით, ვიცით, რამდენმა ჩააბარა, თუმცა, ზუსტი მონაცემები, ჯერჯერობით, არ გვაქვს.
