წერილის დაწერის მთავარი მიზეზი კი სადაზღვევო კომპანია “არქიმედე გლობალს ჯორჯიაში” დროებითი, იძულებითი მმართველის დანიშვნა გახდა. ასეთი ღონისძიების გატარებას, საჭიროების შემთხვევაში, საქართველოს კანონმდებლობა ითვალისწინებს. არის თუ არა კანონის აღსრულება ინვესტორების შევიწრობა, როგორც ამას წერილის ავტორები აცხადებენ? ამ საკითხთან დაკავშირებით “გურია ნიუსთან” კომენტარს ჯანდაცვის მინისტრი დავით სერგეენკო აკეთებს.
_ ბატონო დავით, სახელმწიფოსა და ჯანდაცვის სამინისტროს იმ პოლიტიკაზე მინდა გკითხოთ, რომელიც სადაზღვევო კომპანიებს ეხება. ბოლო პერიოდში, საკმაოდ მწვავედ დადგა ზოგიერთი სადაზღვევო კომპანიის საკითხი. სახელმწიფომ დაიწყო მოქმედება, რასაც მოყვა პროტესტი სადაზღვევოების მხრიდან და ებრაელი ინვესტორების წერილი პრემიერის სახელზე, თითქოს მათ ბიზნესს ავიწროვებენ. თქვენ როგორ შეაფასებდით ამ მოვლენებს?
_ მოდით, დავაზუსტოთ რამდენიმე საკითხი, პირველი ის, რომ ეს არ შეეხება მთლიანად სადაზღვევო ინდუსტრიას, არამედ შეეხება კომპანია “არქიმედეს” , მეორე _ რომ ეს არის არა ებრაელი ინვესტორების, არამედ კომპანია “არქიმედეს” ეროვნებით ებრაელი პარტნიორის წერილი. აბსოლუტურად უადგილოა ამ საკითხების გაიგივება სახელმწიფოთა შორის ურთიერთობებზე. ეს არის აბსოლუტურად კონკრეტული თემა, როდესაც სახელმწიფო სტრუქტურა, კერძოდ სადაზღვევო კომპანიების ზედამხედველობის სამსახური იცავს იმ ფინანსურ პარამეტრებს, რომლის ვალდებულებაც მას აქვს. არაფერი დრამატული არ არის იმაში, რომ კომპანიაში შევიდა იძულებითი მმართველი. ეს არის საერთაშორისო დონეზე მიღებული პრაქტიკა, რათა მოინახოს ყველა შესაძლებელი გზა თვითონ კომპანიის ფინანსური მდგომარეობის გასაუმჯობესებლად და კომპანია არ იქნას გაწირული გასაკოტრებლად.
ჩვენი ამოცანაა, კომპანიამ განაგრძოს თავისი აქტივობა და რადგან ეს მისმა ადგილობრივმა მენეჯმენტმა ვერ შეძლო, მიუხედავად მისთვის მიცემული არაერთი შანსისა და წერილობითი გაფრთხილებისა, მხოლოდ ამის შემდეგ შევიდა იძულებითი მმართველი. ეს არ ნიშნავს სადამსჯელო ღონისძიების გატარებას.
შესაბამისად, ანგაჟირება იმ თემისა, თითქოს სახელმწიფო უტევს კერძო სადაზღვევო კომპანიებს, უადგილოა. ეს არის კონკრეტული და კანონიერი ქმედება და მისი გაიგივება ჩვენი მეგობარი სახელმწიფოს მტრულ დამოკიდებულებასთან, ცალსახად მავნებლური საქციელია. კანონიერი მოქმედება სადაზღვევო კომპანიებზე შეტევას არ ნიშნავს.
ეს ყველაფერი გაირკვევა კანონის ფარგლებში. ჩვენი ამოცანაა, რომ საქართველოს მოქალაქეების ჯანმრთელობა და სიცოცხლე იქნას დაცული.
ჩვენი ინფორმაციით, ამ ეტაპზე, კომპანია “არქიმედეს” დავალიანება, რომელიც მას სხვადასხვა კლინიკების მიმართ აქვს, რამდენიმე მილიონს აჭარბებს. “არქიმედე” ბოლო სამი თვეა, მინუსებშია გადასული. მედიაციის სამსახურის ინფორმაციით კი, 191 სარჩელიდან 71 მარტო არქიმედეს წინააღმდეგ არის შესული. 71-დან კერძო პირია _ 6, სამედიცინო დაწესებულება კი – 65. საერთო ჯამში, სადავო თანხის ოდენობა 12 876 874 ლარს შეადგენს.
ჯანდაცვის მედიაციის სამსახურის უფროსი, გიული მარღიშვილი “გურია ნიუსთან” საუბრისას აცხადებს, რომ “არქიმედე გლობალს ჯორჯიასთან” დაკავშირებით “მორიგებით დასრულდა 32 საქმე, უარი ეთქვა 2 სუბიექტს და სასარჩელო წარმოება მიმდინარეობს 20 განცხადებაზე. სარჩელი გაიხმო 6-მა, რადგან შესრულდა ვალდებულებები.
იმ რეკომენდაციებზე, რაც მედიაციის სამსახურის მიერ იქნა გაცემული, შეუსრულებლობა არ ფიქსირდება, კომპანიის მხრიდან გონივრული გეგმა-გრაფიკი იქნა წარდგენილი”. _ აცხადებს გიული მარღიშვილი.
მიუხედავად კომპანიის მიერ წარდგენილი გეგმა-გრაფიკებისა, დაზღვევის ზედამხედველობის სამსახურმა “არქიმედეს” შემოწმების შემდეგ დაადგინა, რომ კომპანიის წინაშე არსებული ვალდებულებები კომპანიის რეზერვს აჭარბებდა და დადებითი ბალანსის მიღებამდე კომპანიას დროებითი მმართველი ეყოლება.
