სენაკის მოსახლეობა უშედეგოდ სთხოვდა რაიონის საკრებულოს და გამგეობას დახმარებას.
“გურია ნიუსს” სენაკელი ინგა ქარდავა დაუკავშირდა:
_ სენაკის ბოლო თვენახევრის განმავლობაში მეორეჯერ დაიტბორა. ხალხი გამწარებული მირეკავდა, ადგილობრივ კი არხეინად ეძინა და არც შეუწუხებია თავი. წინა წყალდიდობის შემდეგ მიყენებული ზარალის დამთვლელი კომისიის თავმჯდომარე, ზურაბ ტყებუჩავა დილით მოვიდა და მორალის კითხვა დაგვიწყო. სხვათაშორის, ის გამგებლის მოადგილეა და სწორედ მათ ეხებოდათ იმ არხის გაწმენდა, რომელიც წინა წყალდიდობის შემდეგ უფრო სავალალო მდგომარეობაშია.
ვერსად ვერ ვპოვეთ დახმარება და ბატონ დავით ნარმანიას დავურეკე. დილის 4 საათიდან ის ჩვენთან სატელეფონო კავშირზეა და სწორედ მისი ჩარევის შემდეგ მოხდა ადგილზე სამაშველო ბრიგადის მოსვლა. მინდა თქვენი სააგენტოს საშუალებით დიდი მადლობა გადავუხადო დავით ნარმანიას. სამწუხაროდ, რაიონებში ბიძინა ივანიშვილს საბოტაჟს უწყობენ და ხალხში მისდამი სიძულვილს და უნდოობას აღვივებენ.
_ ამ დროისთვის რა ხდება?
_ ახლა მიმდინარეობს სახლებიდან წყლის ამოტუმბვა. კეთილმოწყობის სამსახური მხოლოდ მას შემდეგ გამოჩნდა, რაც მინისტრმა უშუალო კონტროლზე აიყვანა ეს საქმე. იქამდე კი მოსახლეობა იძულებული იყო საკუთარი ხელით ამოეტუმბა წყალი. როდის იყო სტიქიას შიშველი ხელით აჩერებდნენ?!
ადგილზე იმყოფებოდა სენაკის მუნიციპალიტეტის საკრებულოს თავმჯდომარის მოვალეობის შემსრულებელი ზურაბ ხაბურძანია, რომელმაც აღნიშნა, რომ მობილიზებულია სამაშველო სამსახურის ბრიგადები, მიმდინარეობს წყლის ამოტუმბვა სახლებიდან და ყველაფერი კეთდება მოსახლეობის დასახმარებლად. მიყენებულ ზარალს კი მას შემდეგ დაითვლიან, რაც წყალი ამოიტუმბება.
_ მოსახლეობა ამბობს, თხრილები არა არის გაწმენდილი და ძლიერი წვიმის შედეგად კიდევ დატბორვის საშიშროების წინაშე დგანან.
_ ყველაფერი კეთდება, ითვლება წინა წყალდიდობის შედეგად მიყენებული ზარალი და დასახული გეგმის მიხედვით ყველა სამუშაო სრულდება.
_ შეგიძლიათ გვითხრათ, რამდენი ოჯახი დაზარალდა დღეს?
_ პირველადი ინფორმაციით, 25 ოჯახამდე.
