ოზურგეთის რაიონული მოსამართლეების თანამდებობიდან მიღებული წლიური შემოსავალი ათეულობით ათასი ლარია.
დღეს მოსამართლეების _ ნუცუბიძისა და ზვიადაძის ფინანსურ და ქონებრივ მდგომარეობაზე გესაუბრებით. საზოგადოებას მათ შესახებ ძალიან მწირი ინფორმაცია აქვს, უცნობია მათ მიერ მიღებული გადაწყვეტილებების ძალიან დიდი ნაწილის შესახებაც, ისინი არც მედიასთან აკეთებენ განმარტებებს. მიუხედავად არა ერთი რეფორმისა და ამა თუ იმ ავტორიტეტული ორგანიზაციების რეკომენდაციისა, მოსამართლეების საქმიანობა გაუმჭვირვალე რჩება.
სასამართლოს მიმართ საზოგადოების კრიტიკულ განწყობაში, საქართველოს უზენაესი სასამართლოს თავმჯდომარე კონსტანტინე კუბლაშვილი მედიის წვლილსაც ხედავს: “სასამართლო რეპორტაჟის მომზადების დროს, პრესით და ტელევიზიებით მხოლოდ განაწყენებული მხარის სუბიექტური პოზიციის ტირაჟირება არ უნდა ხდებოდეს. ჟურნალისტი თავად უნდა შეეცადოს, გაერკვეს საქმის არსში და საზოგადოებას დაბალანსებული და ობიექტური ინფორმაცია მიაწოდოს”, _ თქვა კუბლაშვილმა გაზეთ “24 საათთან” ინტერვიუში. თუმცა, უზენაესი სასამართლოს თავმჯდომარე არ განმარტავს, როგორ უნდა მოეხერხოს ეს ჟურნალისტმა, როცა მოსამართლეები მედიასთან კომენტარს არ აკეთებენ, სასამართლო დარბაზში ჟურნალისტებს ფოტო-ვიდეო გადაღებების და აუდიოჩანაწერის გაკეთების უფლებას არ აძლევენ.
მოსამართლეების ქონება და ბიოგრაფია
ოზურგეთის რაიონული სასამართლოს თავმჯდომარე ლევან ნუცუბიძე დაიბადა 1978 წლის 21 ივლისს, ქალაქ ქუთაისში. 1995 წელს დაამთავრა წყალტუბოს რაიონის სოფელ მუხიანის საშუალო სკოლა, 2000 წელს _ აკაკი წერეთლის სახელობის ქუთაისის სახელმწიფო უნივერსიტეტის იურიდიული ფაკულტეტი, 2003 წელს _ საქართველოს მეცნიერებათა აკადემიის სახელმწიფოსა და სამართლის ინსტიტუტის ასპირანტურა სისხლის სამართლის სპეციალობით. 2001-2003 წლებში მუშაობდა საქართველოს ადვოკატთა კოლეგიის ქუთაისის ადვოკატურაში ადვოკატად, 2003-2004 წლებში _ “საქართველოს ახალგაზრდა იურისტთა ასოციაციის” ქუთაისის ფილიალში სისხლის სამართლის საქმეთა ადვოკატად, 2004-2005 წლებში _ საქართველოს გენერალური პროკურატურის იუსტიციის სამინისტროში გამოძიების საპროცესო ხელმძღვანელობის დეპარტამენტის პროკურორად, 2005-2007 წლებში _ დასავლეთ საქართველოს საოლქო პროკურატურის უფროს პროკურორად. 2007 წლიდან არის ქობულეთის რაიონული სასამართლოს მოსამართლე. 2007-2008 წლებში მოსამართლისა და თავმჯდომარის უფლებამოსილებას ახორციელებდა ჩოხატაურის რაიონულ სასამართლოში. 2007 წლიდან მივლინებულია ოზურგეთის რაიონულ სასამართლოში მოსამართლედ. 2007 წლიდან დაკისრებული აქვს, ამავე სასამართლოს თავმჯდომარის უფლებამოსილება. ჰყავს მეუღლე ნინო კეზევაძე და შვილი ლუკა ნუცუბიძე.
მისი ქონებრივი მდგომარეობა ასე გამოიყურება: საცხოვრებელი სახლი წყალტუბოში, ნუცუბიძის ქუჩაზე, ფართით 124 კვადრატული მეტრი. ასევე, წყალტუბოში ირიცხება მის სახელზე 2 160 კვადრატული მეტრი მიწის ფართობი. დედის სახელზე სულ 5 ფართობია რეგისტრირებული, აქედან ერთი საცხოვრებელი სახლი სოფელ ფარცხანაყანებში, ფართით 210 კვადრატული მეტრი და 10 947 კვადრატული მეტრი მიწის ფართობი, ასევე ფარცხანაყანებში. დეკლარაციის შევსების მომენტში, მიმდინარე წლის 13 მაისს, მოსამართლე ნუცუბიძეს “სახალხო ბანკში” ანგარიშზე სახელფასო ნაშთი 0 ლარი ერიცხებოდა. დეკლარაციის თანახმად, დედა _ ციცინო ნუცუბიძე სამეწარმეო საქმიანობაში მონაწილეობს: იგი შპს “ავტოსერვისის” პარტნიორია, თუმცა, როგორც ფინანური მდგომარეობის შესახებ წლიურ ანგარიშში ვკითხულობთ, გასული ერთი წლის განმავლობაში ქალბატონ ციცინოს ამ კუთხით მოგება ერთი თეთრიც არ მიუღია. ლევან ნუცუბიძის შემოსავალმა 2010 წელს 56 160 ლარი შეადგინა, ხოლო მისმა მეუღლემ ნინო კეზევაძემ საავადმყოფო “ბომონდის” იურისტის პოზიციაზე 3 600 ლარი მიიღო. ოზურგეთის რაიონული სასამართლოს მოსამართლეს “ლიბერთი ბანკიდან” 5 000 ლარი კრედიტი აქვს გამოტანილი, აქედან, მატერიალური შედეგის გასავალმა 2 334 ლარი და 57 თეთრი შეადგინა. წინა წელს, ნუცუბიძემ სარემონტო სამუშაოების ხარჯებზე 4 000 ლარი გაიღო.
ამავე თანამდებობაზე ყოფნის დროს, მას ქონებრივი მდგომარეობის შესახებ დეკლარაციის შევსება 2010 წლის 7 მაისს მოუხდა. მაშინ “სახალხო ბანკში” სახელფასო ნაშთი 2 900 ლარი ერიცხებოდა, ნაღდი ფულის სახით კი 3 100 ლარს ფლობდა. თანამდებობაზე ყოფნის პერიოდში, ანუ 2009 წელს მისი შემოსავალი 44 562 ლარი იყო, მეუღლის კი _ 2 400. დეკლარაციაში მითითებულია, რომ ნუცუბიძეების ოჯახის წევრებმა, აღნიშნული შემოსავლებიდან სარემონტო სამუშაოების ჩატარებისთვის 3 000 ლარი დახარჯეს.
ოზურგეთის რაიონული სასამართლოს მოსამართლე გიორგი ზვიადაძე დაიბადა 1977 წლის 29 აპრილს, ქალაქ ქუთაისში. 1994 წელს დაამთავრა ქუთაისის #1 საშუალო სკოლა, 1999 წელს _ ქუთაისის აკაკი წერეთლის სახელობის სახელმწიფო უნივერსიტეტის იურიდიული ფაკულტეტი. 2000-2002 წლებში გაიარა გერმანული ენის სწავლების კურსი თბილისის გოეთეს სახელობის ინსტიტუტში. 2002-2005 წლებში მუშაობდა თბილისის დიდუბე-ჩუღურეთის რაიონულ სასამართლოში მოსამართლის თანაშემწედ, 2005-2007 წლებში _ თბილისის საქალაქო სასამართლოს სისხლის სამართლის საქმეთა კოლეგიის მოსამართლის თანაშემწედ. 2007-2009 წლებში იყო იუსტიციის უმაღლესი სკოლის მსმენელი. ჰყავს მეუღლე თამარ მახათაძე და შვილი საბა ზვიადაძე.
მას და მის ოჯახის წევრებს საკუთრებაში არსებული უძრავი ქონება არ გააჩნიათ. დეკლარაციის შევსების მომენტში, 2010 წლის 2 ივლისს, “სახალხო ბანკში” სახელფასო ნაშთი 2 800 ლარი ერიცხებოდა. ოზურგეთის რაიონული მოსამართლის პოზიციაზე მან 2009 წელს 20 000 ლარი მიიღო. მისმა მეუღლემ კი, რომელსაც დეკლარაციის შევსების მომენტში საჯარო რეესტრის ეროვნული სააგენტოს თბილისის სარეგისტრაციო სამსახურის ასისტენტის პოზიცია ეკავა, 16 276 ლარი მიიღო. აქვე ვკითხულობთ, რომ მოსამართლე ზვიადაძემ გასულ წელს, 8 000-ლარიანი ავტომანქანა შეიძინა.
ზვიადაძემ პირველად დეკლარაცია, ჩოხატაურის რაიონული სასამართლოს მოსამართლის თანამდებობაზე ყოფნის დროს, 2009 წლის 26 ივნისს შეავსო. დეკლარაცია ძალიან მწირ ინფორმაციას შეიცავს. შევსების მომენტში მის მეუღლეს სახელფასო ანგარიშზე 50 ლარი ერიცხებოდა, ხოლო ბატონ გიორგის საკრედიტო ბარათზე _ 950 ლარი. როგორც ჩანს მას, დეკლარაციის შევსება თანამდებობაზე დანიშვნის პერიოდში მოუხდა და შესაბამისად, სამუშაოს შესრულებისთვის ფინანსური სარგებელი არ ჰქონდა მინაღები. მის მეუღლეს კი, რომელიც საქართველოს იუსტიციის სამინისტროს საჯარო რეესტრის თბილისის სამინისტროს რეგისტრატორად მუშაობდა, წლის განმავლობაში ხელფასის სახით 12 000 ლარი აქვს მიღებული. ზვიადაძის შემოსავლები მხოლოდ იუსტიციის უმაღლეს სკოლაში სწავლის დროს მიღებული სტიპენდიაა, რისთვისაც მას 6 500 ლარი ერგო.
საქართველოს კანონი “საჯარო სამსახურში ინტერესთა შეუთავსებლობისა და კორუფციის შესახებ” ადგენს საჯარო სამსახურში ინტერესთა შეუთავსებლობისა და კორუფციის თავიდან აცილების, გამოვლენისა და აღკვეთის, ასევე კორუფციული სამართალდარღვევის ჩამდენ პირთა პასუხისმგებლობის ძირითად პრინციპებს, სამართლებრივი რეგლამენტაციის საფუძვლებსა და მექანიზმებს, აგრეთვე, არეგულირებს თანამდებობის პირთა ქონებრივი მდგომარეობის დეკლარაციების წარდგენის სამართლებრივ პირობებსა და მექანიზმს. ამავე კანონის თანახმად, საჯარო მოხელე, რომელიც თავს არიდებს ან აგვიანებს ქონებრივი მდგომარეობის შესახებ დეკლარაციის შევსებას, სხვადასხვა სახით ისჯება.
