“გაფუჭებული ონკანის გამოსაცვლელად ტენდერი უნდა ჩატარდეს”

მოსახლეობა ხელისუფლებისგან დახმარებას თხოვს: _ მერამდენედ ხდება ეს, ვეღარ დავითვალეთ. სანიაღვრე არხები გაჭედილია, წყალი ვერ გადის და როგორც კი ძლიერად გაწვიმდება, იტბორება სახლები. არც ფრინველი და არც პირუტყვი აღარ გაგვაჩნია. სანამდე უნდა ვიყოთ ასე? თუ არ მოგვაქცევენ ყურადღებას, იძულებულები ვიქნებით, აქედან გადავსახლდეთ, _ აცხადებდნენ ურეკის მაცხოვრებლები.

მათ პრობლემის მოგვარების იმედი უკვე აღარ აქვთ, დაზარალებული მოსახლეობა “გურია ნიუსს” გულისტკივილს უზიარებს.

დაეხმარებიან თუ არა იმ ოჯახებს, რომლებიც წყალდიდობის დროს დაზარალდნენ, რა შეიცვალა ურეკელებისთვის არჩევნების შემდეგ და როდის მოგვარდება პრობლემები _ ამასთან დაკავშირებით, დაბა ურეკის რწმუნებულს ბიძინა იმნაიშვილს ვესაუბრეთ.

_ ვერ გეტყვით ზუსტად, წელს რამდენი დამსვენებელი ჩამოვიდა ურეკში. ამ სტიქიიდან და წყალდიდობიდან გამომდინარე, დამსვენებლები ისევ უკან ბრუნდებოდნენ. რაოდენობა ალბათ სეზონის ბოლოს დადგინდება., მაგრამ შარშანდელთან შედარებით, ნაკლები რომაა, ეს ცხადია.

_ როდის ეღირსება ურეკს სასმელი წყალი?

_ სასმელი წყლის შესახებ, უკვე რამდენიმე წელია მიდის საუბარი. უკვე მეშინია ამ პრობლემის ხსენება, კიდევ არ გადაიდოს მისი მოგვარება,-მეთქი. ასეა ხოლმე _ რასაც ამბობ, ის არ კეთდება, დარწმუნებული ვარ, რომ მალე დაიწყება წყლისა და კანალიზაციის პრობლემის მოგვარება და ურეკს სასმელი წყალი მალე ექნება. ჩამოვიდნენ აზიის ბანკის წარმომადგენლები, ბატონი დავით ნარმანია იყო ჩამოსული, რომელსაც ვესაუბრე ამ თემაზე და მან მომცა პირობა, რომ სექტემბრის ბოლოს ნამდვილად დაიწყება მშენებლობა.

_ ბატონო ბიძინა, ურეკში ანტისანიტარიაა, შიდა ქუჩები გადათხრილია, ყრია ნაგავი, გაჩნდა ჭაობები… ამის მოწესრიგება ვის ევალება?

_ ეს ყველაფერი წყალდიდობის ბრალია, მოუწესრიგებელი არხების გამო.

_ რამდენი ლარია გამოყოფილი ურეკში სოფლის მხარდამჭერი პროგრამით ფარგლებში?

_ 15 000 ლარი, რომელიც მართლაც სამარცხვინოა ურეკისთვის. ამის შესახებ მე ჩემი სათქმელი ვთქვი სოფლის კრებაზეც და ოზურგეთში ვესაუბრე გამგებელს. თუ ადამიანთა რაოდენობით დგინდება სოფლებში პროექტების თანხის გამოყოფა, დაითვალონ, რამდენი მაცხოვრებელია ურეკში და რამდენი დამსვენებელი ჩამოდის ზაფხულში. სხვა სოფლებში გაცილებით მეტია გამოყოფილი, მაგალითად, 100 000 ლარია ერთ-ერთ სოფელში გამოყოფილი. მაგრამ რა ვქნათ _ რაც იყო _ იყო, ალბათ, მომავალში უკეთესობა იქნება.

_ რა უნდა გაკეთდეს 15 000 ლარით?

_ შიდა გზები და განათება მოწესრიგდეს, მოსაცდელები უნდა შეიღებოს. აწი შიდა გზების შეკეთებას რა აზრი აქვს _ ზამთარი მოდის, დამსვენებელი აღარაა.

_ ბატონო ბიძინა, როდის გაიწმინდება საწრეტი არხები, რომ ყველა გაწვიმებაზე წყალდიდობა არ იყოს?

_ ბატონი დავით ნარმანია შეგვპირდა, რომ აუცილებლად მოხდება ამ არხების გაწმენდა. არ გაწმენდილა წლების განმავლობაში, მიუხედავად იმისა, რომ ეს პრობლემები ადრეც იდგა. არხები რომ გაწმენდილი ყოფილიყო, ვფიქრობ, ასეთი ზარალი არ იქნებოდა. ყველა არხი უნდა გაიწმინდოს და გამოყოფილი 15 000 ლარი ეყოფა ამას?

_ ჯერ კიდევ არ დაწყებულა სოფლის პროექტების გახორციელება, როგორ ფიქრობთ, არ გვიანდება?

_ რა ვიცი აბა, რა გითხრათ? ახლა რაღად გინდა, რომ აკეთებ იმ გზას? მოხრეშვას აზრი აქვს? მე ვთქვი და ეს ბატონმა კოტე შარაშენიძემაც იცის, რომ შიდა გზები სეზონის დაწყებამდე უნდა შეკეთებულიყო, შეიძლება სხვა სოფელში მერე გააკეთო, მაგრამ აქ საკურორტო ზონაა და ეს აუცილებელია სეზონამდე მოწესრიგდეს. აუცილებელია კანალიზაციისა და სასმელი წყლის პრობლემის გადაჭრაც.

_ გაქვთ იმედი, რომ პრობლემები გადაიჭრება?

_ იმედი კი მაქვს.

_ თქვენ უკვე 9 თვეა ხართ ურეკის რწმუნებული, რა შეიცვალა ურეკელებისთვის ან დამსვენებლებისთვის ამ პერიოდში?

_ სიმართლე რომ გითხრათ, მე მართლა მეგონა, რომ რამეს შევცვლიდი. კი არ ვამბობ, რომ მე მაგარი ვარ, არ მეგონა, რომ გასაკეთებელი არ გაკეთდებოდა, მაგრამ აღმოჩნდა, რომ თურმე ასე არ ყოფილა. თუ არ შეიცვალა სოფლებისადმი მიდგომა, არაფერი არ გაკეთდება. ვარ რწმუნებული, მაგრამ რა ვალდებულება მაკისრია? აი, გაფუჭდა სოფელში ონკანი, უნდა ჩავიდე ოზურგეთში, დავწერო განცხადება, ჩატარდეს ტენდერი, გამოვლინდეს გამარჯვებული, რომელიც გააკეთებს ონკანს. ამდენი ხანი უნდა იცადოს მოსახლეობამ? აღარ მინდა, ბატონო, ავდექი და ვიყიდე ჩემი ფულით… ასეთი რამდენი ჩამოვთვალო. დაგვირეკავენ ოზურგეთიდან, ჩამოდით, ეს საბუთი ჩამოიტანეთ, ის საბუთი ჩამოიტანეთ და ვართ ასე,

_ და რომ ჩადიხართ და ჩაგაქვთ ეს საბუთები, რეაგირება თუ არის?

_ რეაგირებას დრო უნდა. ვერ კეთდება ისე მალე, ხალხს რომ უნდა. არის უკმაყოფილება, რომ არ კეთდება არაფერი.

_ თქვენი აზრით, რა შეიცვალა არჩევნების შემდეგ?

_ ნამდვილად არაფერი შეცვლილა. ზაფხულის დასაწყისშივე ვთქვი, რომ აქცენტს გავაკეთებთ მხოლოდ სისუფთავეზე, რადგან გვიანი იყო და ვერაფერს ვერ შევცვლიდით. მომავალში ვეცდებით, ყველანაირად უკეთესი სეზონი იყოს.

_ რა დახმარება გაეწია იმ ოჯახებს, რომლებიც წყალდიდობის დროს დაზარალდნენ?

_ მე, როგორც რწმუნებულს, არანაირი საშუალება არ მაქვს, რაიმე სახის დახმარება გავუწიო ამ ოჯახებს. კონკრეტულად დახმარების სახეზე ვერ გეტყვით, იმიტომ, რომ არ ვფლობ ინფორმაციას. მთავარი ისაა, რომ უნდა გაწმინდონ სანიაღვრე არხები, რომ მსგავსი რამ არ განმეორდეს. დაზარალებულ ოჯახებს რომ დახმარება გაეწიოს, ამისთვის უნდა შეიქმნას ზარალის დამთვლელი კომისია, ასეთი კომისია კი ჯერ არ შექმნილა. ვიცი, რომ მსგავსი კომისია შეიქმნა მაშინ, როცა მეწყერი ჩამოწვა _ ვიცი, რომ მაშინ დაზარალებულ ოჯახებს დახმარებას გაუწევენ.

_ სტიქიის შედეგების გამოსასწორებლად თანხა თუ არის გამოყოფილი?

_ მე არ ვიცი.

_ სხვა რა პრობლემებია ურეკში?

_ პრობლემების მეტი რა არის?! მთავარი უმუშევრობაა. ახალგაზრდები მოდიან ჩემთან, მთხოვენ, რომ იქნებ, სადმე დავასაქმო თუმცა, მე რა შემიძლია?! გული გეტკინება, ისე გთხოვენ, მაგრამ ვერ ვეხმარები, თუმცა, არ სჯერათ, რომ არ შემიძლია.