ხელისუფლება საარჩევნო კამპანიის დროს, ხშირად ახსენებს და თავის დამსახურებად მიიჩნევს გაზიფიცირების პროცესს, თუმცა, როცა საქმე ახალი მრიცხველების შეძენაზე ან საფასურის გაძვირებაზე მიდგება, პასუხისმგებლობას იხსნის და ამბობს, რომ კერძო კომპანიის საქმიანობაში ვერ ჩაერევა. “გურია ნიუსი” დაინტერესდა, თუ რატომ ხდება ცოტა ხნის წინ შეძენილი მრიცხველების შემოწმება-გამოცვლა და რამდენად მისაღებია მოსახლეობა კიდევ ერთხელ აიძულონ მრიცხველების საფასური გადაიხადოს.
სანამ თემის ირგვლივ კონკრეტულ პასუხებს შესაბამისი უწყებებიდან მივიღებდით, გადავწყვიტეთ გამოგვეკითხა რამდენიმე მოსახლე, რომლებმაც, როგორც გაირკვა, არცთუ ისე ბევრი იციან ახალ გამრიცხველიანებასთან დაკავშირებით.
_ როგორ ფიქრობთ, რატომ ცვლიან გაზის მრიცხველებს?
ცისანა დიდია: _ ეგ ზუსტად არ ვიცი. გავიგე, რომ ძველი მრიცხველები უნდა შეიცვალოს და ახალი დაგვიმონტაჟდეს. რას ემსახურება ეს გადაწყვეტილება, ჩემთვის გაუგებარია. ძველი მრიცხველიც ძალიან კარგად მუშაობს.
მაყვალა რამიშვილი: _ რატომ ცვლიან, არ ვიცი, მაგრამ მაინტერესებს, რა განსხვავებაა ძველსა და ახალ მრიცხველს შორის.
ზინა ლაგვილავა: _ მე საერთოდ არ მაქვს, შვილო, გაზი და აბა რა გითხრათ, რომ შემოვიყვანო მაგის საშუალებაც არ მაქვს, თერთმეტი შვილიშვილი მყავს და სამკილოიან გაზის ბალონს ვხმარობ. თუ გაითვალისწინებენ ჩემს მდგომარეობას და დამეხმარებიან გაზის შემოყვანაში, მადლობელი ვიქნები.
ამის შემდეგ ვესაუბრეთ შპს “სოკარ ჯორჯია გაზი გურიას ჩოხატაურის სერვის ცენტრის” მენეჯერს ელიოტ ხაბეიშვილს და შევეცადეთ მოსახლეობისთვის უფრო დაწვრილებით მიგვეწოდებინა ინფორმაცია.
_ ბატონო ელიოტ, რის საფუძველზე გადაწყდა ძველი მრიცხველების ახლით ჩანაცვლება?
_ კომპანია “შპს სოკარ ჯორჯია გაზმა” გადაწყვიტა ძველი მრიცხველების შემოწმება-შეცვლა, იმიტომ, რომ ახალ მრიცხველებში ჩამონტაჟებულია კორექტორი, იგივე თერმორეგულატორი, რომელიც ხელს უწყობს ტემპერატურის რეგულაციას ზამთარსა და ზაფხულში; შესაბამისად, ზუსტად აისახება მრიცხველებზე დახარჯული ბუნებრივი აირის რაოდენობა.
_ ეს ძველ მრიცხველებზე არ ხდებოდა?
_ ხდებოდა, მაგრამ სხვადასხვა სეზონზე სხვადასხვანაირად _ ძველ მრიცხველებზე ზამთარში დახარჯული აირის რაოდენობა სხვანაირად აისახებოდა, ზაფხულში _ სხვანაირად. იმიტომ, რომ ძველ მრიცხველს არ აქვს კორექტორი, რაც ზემოთ აღვნიშნე. ახალი მრიცხველის კიდევ ერთი უპირატესობა ისაა, რომ მოთავსებულია სპეციალურ ყუთში და მისი დაზიანების ალბათობა ძალიან მცირეა. ეს ყველაფერი მოსახლეობისთვის უფრო სასარგებლო და მოსახერხებელია.
_ როგორ მიმდინარეობს შემოწმება-განახლების პროცესი?
_ ყველა მრიცხველი გამოდის ეზოდან გარეთ, ჩვენ ვამონტაჟებთ ახალ მრიცხველს, ამის შემდეგ ხდება ძველი მრიცხველის ლაბორატორიული შემოწმება ქუთაისში ან ბათუმში.
_ ვის ევალება მრიცხველების შემოწმება, კომპანიას თუ მოსახლეობას?
_ შემოწმება ჩვენი მოვალეობაა, ჩვენ უნდა წავიღოთ ლაბორატორიაში, მაგრამ ზოგმა გადაწყვიტა, თავად შეემოწმებინა; ასე რომ, ზოგს ჩვენ ვამოწმებთ, ზოგს _ აბონენტი, როგორც მათ სურთ.
_ შემოწმებისთვის თანხა თუა გადასახდელი და რამდენი?
_ ლაბორატორიულ შემოწმებას უნდა ათი ლარი, რომელსაც ჩვენ ვიხდით, თუ ჩვენ მიგვაქვს შესამოწმებლად; თუ არა, მაშინ აბონენტი იხდის.
_ რა ხდება ლაბორატორიული შემოწმების შემდეგ?
_ თუ შემოწმების შემდეგ დაიწერა დასკვნა, რომ მრიცხველი გამოსაყენებლად ვარგისია, ამ შემთხვევაში, მოსახლეს ახალი მრიცხველი უმონტაჟდება სრულიად უსასყიდლოდ, ხოლო თუ დასკვნაში დაიწერა, რომ მრიცხველი უვარგისია, მაშინ აბონენტი ახალ მრიცხველში 160 ლარს იხდის განვადების სახით, ექვსი თვის მანძილზე.
_ რაში გამოიხატება მრიცხველის უვარგისობა, აქამდე აბონენტი ხომ ჩვეულებრივად მოიხმარდა თავის მრიცხველს?
_ მისი გამოუსადეგარობა აღწერილია ლაბორატორიულ დასკვნაში, შესაძლოა, ხდებოდეს ბუნებრივი აირის გაპარება და მოსახლე იხდიდეს იმაზე გაცილებით მეტს, ვიდრე შესაძლოა, რეალურად დახარჯოს.
_ თუ მოსახლეს უვარგის მრიცხველში უწევს 160 ლარის გადახდა, გამოდის, რომ ორმაგად ზარალდება _ გარკვეული დროის მანძილზე ცუდი მრიცხველი ედგა და დამატებით იხდის ამხელა თანხას, რომელიც თითქმის ორი თვის პენსიას უტოლდება… რა დააშავა აბონენტმა, ერთხელ ხომ გადაიხადა მრიცხველში თანხა?
_ ეს საკითხი კომპანიას არ ეხება, მათ ხომ თავის დროზე “სოკარისგან” არ შეუძენიათ მრიცხველები, ბაზარში შეიძინეს. ამ თანხას იხდიან იმიტომ, რომ თავისი მრიცხველი ისევ მათ რჩებათ. “სოკარს” გამოუსადეგარი მრიცხველები არ მიაქვს. და კიდევ ერთი, ჩვენი კომპანია ახალ მრიცხველებზე პასუხისმგებლობას თავიდან ბოლომდე თავის თავზე იღებს და დაზიანების შემთხვევაში, მრიცხველის შეკეთებას ყოველგვარი ჰონორარის გარეშე უზრუნველყოფს.
_ სულ რამდენი მრიცხველი გაქვთ შემოწმებული?
_ ჯერ მხოლოდ ასამდე მრიცხველი შევამოწმეთ და აქედან გამოუსადეგარი ექვსი იყო.
_ ადგილობრივი თვითმმართველობა ერევა ახალი გამრიცხველიანების პროცესში?
_ არა, ადგილობრივი ხელისუფლება არ ერევა, რადგან შპს “სოკარ ჯორჯია გაზი” კერძო კომპანიაა და გადაწყვეტილებებს დამოუკიდებლად იღებს.
_ რა თანხა გამოყო კომპანიამ ამ პროექტისთვის?
_ ერთ მრიცხველზე 35 ლარი იხარჯება, ამაში შედის მუშების ხელფასი, მასალების თანხა, საშემოსავლო… ხელფასის გარდა კი ერთ მრიცხველზე 28 ლარი იხარჯება.
_ როდის დასრულდება გამრიცხველიანება?
_ სამუშაოები ერთ თვეში უნდა დავასრულოთ, ჯერჯერობით სამი ბრიგადა მუშაობს და თუ საჭირო გახდა ოზურგეთიდანაც დავიმატებთ მუშა ხელს.
გამრიცხველიანების პროცესის შეფასება ვთხოვეთ ექსპერტ გია ხუხაშვილს: _ ეს პროცესი მიმდინარეობს დედაქალაქშიც; ჩემი აზრით, კარგი გადაწყვეტილებაა კომპანიის მხრიდან, რათა ერთხელ და სამუდამოდ დალაგდეს ეს საკითხი და ადამიანმა გადაიხადოს იმდენი, რამდენსაც რეალურად დახარჯავს, _ გვითხრა ხუხაშვილმა.
