თუმცა, ამ გადაწყვეტილების მიღებას არა ერთი შეხვედრა და სხდომა მიეძღვნა. ფაილების განადგურება სხვადასხვა მიზეზების გამო იდებოდა, დაანონსებული თარიღიც მუდმივად იცვლებოდა, თუმცა, კომისიის წევრები იმედს არ კარგავდნენ და აცხადებდნენ, რომ ეს დღე დადგებოდა.
ე. წ. “მოდულის” შენობაში შინაგან და იუსტიციის მინისტრებმა, ასევე მთავარმა პროკურორმა ქვეყანას უკანონოდ მოპოვებული ფირების განადგურება მიულოცეს. ამ საქმისთვის სპეციალურად გამოყოფილი პირი CD დისკებს სათითაოდ იღებდა წინა დღით დალუქული ყუთიდან და გამანადგურებელ მანქანაში ჰყრიდა. მედიას ბოლოს დანამცეცებული დისკები უჩვენეს, საზოგადოების ის ნაწილი, კი ვინც სავარაუდოდ ამ ჩანაწერებში იყო ასახული, დაამშვიდეს, თუმცა, შინაგან საქმეთა მინისტრმა ირაკლი ღარიბაშვილმა იქვე დასძინა, ჩვენი ინფორმაციით, ამ ჩანაწერების ასლები არსებობს და ის წინა ხელისუფლების წარმომადგენლებს უნდა ჰქონდეთო: “სამწუხაროდ, ჩვენი ინფორმაციით და ვარაუდით, მასალის უმრავლესობა არის კოპირებული. არსებობს ძალიან დიდი ალბათობა იმისა, რომ რაც ჩვენ აქ დაგვხვდა და რაც ჩვენ მოვიპოვეთ, ჰქონდეთ წინა ხელისუფლების წარმომადგენლებსაც. ამის გამო ჩვენ ვიმსჯელეთ და ვაპირებთ, გავამკაცროთ კანონი, რომელიც ითვალისწინებს პირადი ინფორმაციის გასაჯაროვებას.”
იუსტიციის მინისტრი თეა წულუკიანი ჩანაწერების გავრცელების პრევენციას კანონის გამკაცრებაში ხედავს. მინისტრს მიაჩნია, რომ თუ სისხლის სამართლის კონკრეტული დანაშაულისთვის სასჯელის ზომა გაიზრდება, ის ადამიანები, რომლებიც ჩანაწერებს ფლობენ, მათ გავრცელებაზე ან ჩანაწერში ასახული პირის დაშანტაჟებაზე უარს იტყვიან: ” ჩვენ წინა სხდომაზე ერთხმად გადავწყვიტეთ, რომ სისხლის სამართლის კოდექსის 157, 158 და 159-ე მუხლებში მოხდება დანაშაულის შემადგენლობის დაზუსტება, რომ ამ მუხლებმა დაიცვას არა მხოლოდ პირადი და ოჯახური საიდუმლო, არამედ პირადი ცხოვრების ამსახველი ჩანაწერის უკანონო გამოყენება, მათზე ასახული პირების შანტაჟისთვის, მათ შორის, პოლიტიკური მიზნით. ჩვენი ერთსულოვანი აზრი იყო, რომ ეს შეეხოს არა მხოლოდ მოქმედ, არამედ ყოფილი თანამდებობის პირებსაც. პარლამენტში მოხდება ინიცირება, რომ ჯარიმის სახე ამოღებული იქნას და ახლა ვმუშაობთ პატიმრობის ხანგრძლივობაზე”.
წულუკიანის თქმით ერთი, ორი ან სამწლიანი პატიმრობა ამ კატეგორიის დანაშაულისთვის არაადეკვატური სასჯელია. იმის მიუხედავად, რომ ჩანაწერებში ასახულმა ადამიანებმა ფირების შინაარსის შესახებ არაფერი იციან, მინისტრის თქმით, დღეის შემდეგ შეუძლიათ მშვიდად იცხოვრონ.
მთავარი პროკურორი არჩილ კბილაშვილი ამბობს, რომ ფირების განადგურების გადაწყვეტილება გარკვეული ღირებულებების აწონ-დაწონვის შემდეგ გადაწყდა. ერთი მხრივ, იყო გამოძიების ინტერესი, დაედგინა, დამკვეთი და შემსრულებელი და მეორეს მხრივ, ფირებზე ასახული ადამიანების სიმშვიდე. კომისიამ არჩევანი პიროვნებაზე შეაჩერა.
“ერთი შეხედვით, როდესაც უკანონო ჩანაწერთან გვაქვს საქმე, არ აქვს მნიშვნელობა, ეს პირად ინტიმურს ეხება თუ სხვა კატეგორიას _ უკანონობა უკანონობაა და გამოძიება დაწყებული უნდა იყოს. ამ ლოგიკას როცა მივდევთ, პირადი ინტიმური ცხოვრების ამსახველი კადრების არსებობის ფაქტზე გამოძიების დაწყება თავისთავად ნიშნავს იმას, რომ გამოძიების პროცესში ყველა ის ადამიანი, ვინც ასახულია ფირზე, უნდა გამოიძახო, დაკითხო, ჩატარდეს ექსპერტიზა. აქ ჩვენ წავაწყდით დიდ ღირებულებით კონფლიქტს _ ეს უდაოდ გამოიწვევდა ასეთი ადამიანების დიდ გულისტკივილს. ამიტომ იყო რომ კახა კახიშვილი გამოძიებას უჭერდა მხარს. წმინდა სამართლებრივად, მეც იქ ვარ, სადაც კახა, მაგრამ ღირებულებით კონფლიქტში, პირადი ცხოვრების საიდუმლოს შენახვა არის პრიორიტეტული,” _ განაცხადა კბილაშვილმა.
პირადი ცხოვრების საიდუმლოს შენახვა რომ ყველაფერზე მაღლა დგას, კომისიის წევრებმა საკუთარი მაგალითითაც დაამტკიცეს. მათ უარი თქვეს კადრების ნახვაზე, რათა “ამ კადრების ყურებით პირადი ცხოვრების ხელშეუხებლობა არ დაერღვიათ”.
“ჩვენ ვიმსჯელეთ იმასთან დაკავშირებით, უნდა გვეცნობებინა თუ არა ადამიანებისთვის, ვინც ამ კადრებზეა ასახული. ცალსახად უნდა ითქვას, რომ არც ერთმა აქ მსხდომმა კომისიის წევრმა არ იცის, ვინ არიან ამ მასალებში ასახულნი. სამუშაო ჯგუფის 2-3 წევრმა ნახა ეს კადრები შერჩევითად, ნახა ზოგიერთი კადრი, ისიც დაშტრიხული, რადგან ჩვენ დავიცავით ის პრინციპი, რომ ყურების დროს არ დაგვერღვია პირადი ცხოვრების ხელშეუხებლობა”, _ განაცხადა იუსტიციის მინისტრმა.
როგორც შინაგან საქმეთა სამინისტროში აცხადებენ, ეს ჩანაწერები დალუქული სახით ინახებოდა, რაც პერსონალური ინფორმაციის დაცვის ოფიცერმა თამარ ქალდანმაც დაადასტურა
განადგურების პროცესს უჩა ნანუაშვილის გარდა, კომისიის ყველა წევრი დაესწრო _ სახალხო დამცველი საზღვარგარეთ იმყოფება და ფირების განადგურებაზე თანხმობა წინასწარ განაცხადა.
მთავრობის დადგენილების საფუძველზე, 2 სექტემბერს შეიქმნა “უკანონო მიყურადებისა და ფარული ჩანაწერების საკითხებზე მომუშავე დროებითი კომისიის” სამუშაო ჯგუფი, რომლის შემადგენლობაში შედიან: სახალხო დამცველი უჩა ნანუაშვილი, პერსონალურ მონაცემთა დაცვის ინსპექტორი თამარ ქალდანი, “საარჩევნო და პოლიტიკური ტექნოლოგიების კვლევითი ცენტრის” ხელმძღვანელი კახა კახიშვილი, შინაგან საქმეთა სამინისტროს ოპერატიულ-ტექნიკური დეპარტამენტის დირექტორი ავთანდილ თაბუნიძე, ამავე დეპარტამენტის დირექტორის მოადგილე კობა კობიძე და დეპარტამენტის თანამშრომელი დავით გაბეხაძე.
3 სექტემბერს, მოდულის შენობაში შედგა აღნიშნული სამუშაო ჯგუფის პირველი შეხვედრა, სადაც არსებული 110 დისკიდან შერჩევითი პრინციპით მოხდა რამდენიმეს (სამის) ამორჩევა. ადგილზევე მოხდა მათი დამუშავება იდენტიფიცირების გამომრიცხავი ფორმით, რის შემდეგაც ჯგუფის წევრები გაეცნენ ამ დისკებზე არსებულ ჩანაწერებს. დაადასტურეს, რომ ისინი ნამდვილად შეიცავენ მოქალაქეთა პირადი ცხოვრების ამსახველ ინფორმაციას, შედგა შესაბამისი ოქმი, ზემოთ აღნიშნული სამივე დისკი კი განადგურდა. დანარჩენი დისკები ისევ მოთავსდა კონტეინერში, დაილუქა და გამზადდა საჯარო განადგურებისათვის.
საზოგადოების ნაწილი ფირების განადგურებას, პიარ-აქციას უწოდებს, რადგან გარანტია იმისა, რომ ჩანაწერების ასლები კვლავაც არ ინახება შინაგან საქმეთა სამინისტროში, არ არსებობს. ასევე ჩნდება ეჭვი, რომ პოლიცია ფირების განადგურების დემონსტრირებით გელა ხვედელიძის მსგავსი ინციდენტებისაგან თავს იზღვევს _ თუ მომავალში პირადი ცხოვრების ამსახველი ჩანაწერი კვლავ გავრცელდება, შინაგან საქმეთა სამინისტროსკენ ხელს ვერავინ გაიშვერს, რადგან მინისტრმა თქვა, რომ ასლები მხოლოდ ყოფილ ხელისუფლებაში შეიძლება ინახებოდეს. ირაკლი ღარიბაშვილმა ჯიჰადის ვიდეოების შესახებ კომენტირებისას არა ერთხელ აღნიშნა, რომ მსგავსი დანაშაულის გახსნა დიდ სირთულეებთან არის დაკავშირებული. ხომ არ ნიშნავს ეს, რომ სასჯელის გამკაცრების მიუხედავად, პოლიცია ვერასოდეს მიაკვლევს იმ ადამიანს, ვინც ეს ჩანაწერები ინტერნეტით გაავრცელა ან ხომ არ არის იმის საფრთხე, რომ კოდექსში გამკაცრებული სანქცია მხოლოდ ყოფილი ხელისუფლების წარმომადგენლების მიმართ ამოქმედდება?!
