მაუწყებლის სამეურვეო საბჭომ არხის გენერალურ დირექტორს უნდობლობა ერთხმად გამოუცხადა და მისი გადაყენების მიზეზად მაუწყებლის ბიუჯეტისა და არხის პრიორიტეტების შესახებ პასუხების მიუღებლობა დაასახელა.
როგორც საბჭოს წევრი გიორგი მელაძე განმარტავს, სამეთვალყურეო საბჭო ბოლო 3 თვეა, უკვე აქტიურად ცდილობს მენეჯმენტისგან სამომავლო გეგმები გაიგოს, რომლებიც ტელევიზიის ბედზე დიდ ზეგავლენას ახდენს ფინანსურ და პროგრამულ საკითხებთან დაკავშირებით, თუმცა ნორმალური სამუშაო ვითარების შექმნა ვერ მოხერხდა.
თავად საზმაუს უკვე ყოფილი დირექტორის, გიორგი ბარათაშვილის თქმით კი, მაუწყებლის გენერალური დირექტორის გადაყენება მაუწყებელზე კარგად არ აისახება, რადგან ეს გარკვეულ პრობლემებს “შიგნით” შექმნის.
“პირველი გადაყენების შემდეგ, მესამე თვეა დავბრუნდი, ყველაფერი გავაკეთე, რომ გადაგვეწყო ახალი ეთერი და ჩემთვის გაუგებარია, რატომ გაჩნდა კითხვა ახალი ეთერის შესახებ და რატომ გახდა საჭირო არჩევნების წინ ეს საკითხი მეორედ დამდგარიყო. ამაში გარკვეულ პოლიტიკურ ქვედა დინებებს ვხედავ. ვნახოთ, რა იქნება ხვალ ბორდზე”, _ განაცხადა ბარათაშვილმა.
აღსანიშნავია, რომ სხდომა “ახალგაზრდა უფლებადამცველთა ასოციაციის” აქციის ფონზე მიმდინარეობდა. ტელევიზიის შენობასთან შეკრებილები გიორგი ბარათაშვილისთვის უნდობლობის გამოცხადებას აპროტესტებენ და აღნიშნავენ, რომ წინასაარჩევნოდ მსგავსი ქმედებები საბოტაჟის მცდელობაა.
ამავდროულად, დღეს დილით არასამთავრობო ორგანიზაციებმა ”სამართლიანი არჩევნებისა და დემოკრატიის საერთაშორისო საზოგადოება”, ”საერთაშორისო გამჭვირვალობა _ საქართველო”, ”საქართველოს დემოკრატიული ინიციატივა, ”ადამიანის უფლებების სწავლებისა და მონიტორინგის ცენტრი” და ”მედიის განვითარების ფონდი” ერთობლივი განცხადება გაავრცელეს, სადაც აღნიშნული იყო, რომ “საზოგადოებრივი მაუწყებლის მენეჯმენტს ამ გადაწყვეტილების მყარი და ობიექტური არგუმენტებით დასაბუთება მოუწევს, წინააღმდეგ შემთხვევაში აღნიშნული ფაქტი თავად მაუწყებლის მენეჯმენტის პოლიტიკური მიუკერძოებლობის მიმართ გააჩენს კითხვებს. შექმნილი გაურკვევლობები უარყოფითად აისახება, როგორც საზოგადოებრივი მაუწყებლის საქმიან რეპუტაციაზე, ასევე შეიძლება გავლენა იქონიოს წინასაარჩევნო გარემოზე.”
თუმცა, განსხვავებული მოსაზრება აქვს საზოგადოებრივი კომუნიკაციების მართვის სპეციალისტს არჩილ გამზარდიას, რომელიც “გურია ნიუსთან” საუბრისას აღნიშნავს, რომ საზოგადოებრივ მაუწყებელს აღარ გააჩნია უკვე ის ძალაუფლება, რომლითაც საზოგადოებრივ ცხოვრებაში განსაკუთრებული როლით გამოდიოდა.
” რაღაც არეულობა რომ დაიწყოს “რუსთავი 2″-ზე ან სხვა წამყვან ტელევიზიაში, მაშინ შეგვიძლია ვიფიქროთ, რომ ამით მთელი რიგი მიმართულებები შეიცვლება და მედიას საფრთხე დაემუქრება, მაგრამ ამას ვერ ვიტყვით საზმაუზე. ვფიქრობ, საზოგადოებრივ არხზე მიმდინარე მოვლენები, ესაა სამეურვეო საბჭოს მხრიდან იმის მტკიცება, ვის აქვს მაუწყებელზე პრეტენზია.” _ განმარტავს გამზარდია.
მისივე თქმით, ესაა ძალიან უარყოფითი პროცესი, რადგან საზმაუს რაღაცნაირად შანსი გაუჩნდა, მეტნაკლებად ჩამოყალიბებულიყო.
“მიმდინარე პროცესებით ჩნდება საშიშროება იმისა, რომ საზმაუ საერთოდ გამოირიცხოს საზოგადოებაში გარკვეული როლის მატარებლად, რადგან საზოგადოებრივი განწყობა ბარათაშვილის მიმართ დადებითად აკუმლირდება, ეს შიდა ინტრიგები კი შეიძლება ტელევიზიისთვის ძალიან სერიოზული პრობლემების შემქმნელად იქცეს. არა მგონია კონკრეტული პარტიული ინტერესების გარდა, ვინმე სამეთვალყურეო საბჭოს მხარის პოზიციებს იზიარებდეს საქართველოში,” _ უთხრა “გურია ნიუსს” გამზარდიამ.
ცნობისთვის, ბორდის გადაწყვეტილებით, გენერალური დირექტორის მოვალეობას თამაზ ტყემალაძე შეასრულებს, რომლის თქმითაც “მაუწყებელში ყველაფერი ისე წარიმართება, როგორიც უნდა იყოს საზოგადოებრივ არხში”. ახალი გენერალური დირექტორის პოსტის დასაკავებლად კი კონკურსი ათი დღის ვადაში გამოცხადდება.
