_ ბატონო გურამ, გორის გიორგი ერისთავის სახელობის სახელმწიფო დრამატული თეატრის მსახიობები განმეორებით მოგმართავთ თხოვნით გულდასმით შეისწავლოთ ქვემოთ ჩამოთვლილი გარემოებები სამხატვრო ხელმძღვანელის დანიშვნის თაობაზე გადაწყვეტილების მიღებისას. კერძოდ, გორის თეატრი დანგრეული და პრაქტიკულად უმოქმედო შენობა ჩაიბარა რამაზ იოსელიანმა. უმოკლეს პერიოდში გარემონტდა, გაკეთდა გათბობა და მიუხედავად იმისა, რომ ცნობილმა ტერაქტმა დიდი დარბაზი ექსპლუატაციისთვის უვარგისი გახადა, ოპერატიულად მოეწყო მცირე სცენა, რომელიც დღემდე ფუნქციონირებს. რაც შეეხება რეპერტუარს, სპექტაკლების რაოდენობამ 21-ს მიაღწია, ამოქმედდა თოჯინების თეატრი, ეწყობოდა ბენეფისები, გასვლითი სპექტაკლები საქართველოს ქალაქებში, ჯარში, ბავშვთა სახლებში და ა.შ. უკანასკნელი 15 წლის მანძილზე პირველად მივიღეთ საერთაშორისო ფესტივალში მონაწილეობა .
აღსანიშნავია რომ, დასის შემადგენლობაში უმტკივნეულოდ მიმდინარეობდა ახალი მსახიობების შემოყვანა გორელი იქნებოდა ის, თუ თბილისელი. მაგრამ, 2007 წელს ოპოზიციური შეხედულებების გამო, რამაზ იოსელიანი გათავისუფლდა დაკავებული თანამდებობიდან და დაინიშნა სოსო ნემსაძე. ახალმა ხელმძღვანელმა გორის თეატრში სიახლედ ის შემოიტანა, რომ შტატების შემცირების მიზნით მოაწყო პირობითი კასტინგი, გაათავისუფლა 12 გორელი მსახიობი და თბილისიდან ჩამოიყვანა 9 მსახიობი, უმეტესობა თავისი სტუდენტი. ჩვენი, როგორც ადგილობრივების დისკრიმინაცია ამით არ დასრულებულა. განსხვავება აისახა სახელფასო ანაზღაურებაშიც. მაგალითად, სოსო ნემსაძის კადრები (რომელთაგან ზოგი სტუდენტია, ზოგი კი სხვა თეატრის მსახიობი) ძირითადად 1 ან 2 სპექტაკლში არინ დაკავებულები, მაგრამ ხელფასებზე ბატონი სოსო გულს არ წყვეტს. კერძოდ, ადგილობრივი მსახიობი ნათია ტატულაშვილი დაკავებულია 9 სპექტაკლში და ხელფასი 370 ლარი აქვს, ბატონი სოსო სტუდენტს _ 2 სპექტაკლში დაკავებულ ანა ჩოგოლაშვილს კი 450 ლარი. (თუ სახელფასო უწყისებით დაინტერესდებით, ასეთი მაგალითების მოყვანა მრავლად შეგვიძლია). ასევე, ადგილობრივი მაყურებლების შეურაცხყოფად მიგვაჩნია, როცა სხვაგან დადგმული სპექტაკლის კალკირებას ახდენს გორის სცენაზე (“მსხერპლი”, “ტოპაზი”). რამაზ იოსელიანის დროს დისციპლინა მკაცრად კონტროლდებოდა და ეს მწარედ ახსოვთ სოსო ნემსაძის დღევანდელ მხარდამჭერებს. არ შეიძლებოდა დაგვიანება რეპეტიციაზე (ახლა 12 საათზე დანიშნულ რეპეტიციაზე თვითონ აგვიანებს და 5 საათზე ჩამოდის), არ შეიძლებოდა ნასვამ მდგომარეობაში შენობაში შესვლა (ახლა სპექტაკლის დროს სცენიდან მაყურებელი ალკოჰოლის სუნს გრძნობს) და სხვა. აღარ გვინდა ისედაც დამცირებულები, უფრო დავკნინდეთ და ჩვენი ბრალდებები ჭორაობას დავამსგავსოთ, მაგრამ ყველაზე საოცარი რაც არის ჩვენთვის, თეატრი “ნაციონალების” დროს ლამის საარჩევნო შტაბად გადააქციეს. რამაზ იოსელიანს კი ხშირად შეემთხვა უსიამოვნება იმის გამო, რომ ხელისუფლებას თეატრის საქმეებში ჩარევის უფლება არ ჰქონდა. “ნაციონალებთან” სიამტკბილობა თეატრს გარკვეული თანხა უჯდებოდა, რადგან საარჩევნო კამპანიას თავისი პიარი და ფინანსური მხარდაჭერა სჭირდებოდა. იმედი გვაქვს ჩვენი სიტყვებს დამოუკიდებელი აუდიტური შემოწმება დაადასტურებს.
ბატონო გურამ, განმეორებით მოგმართავთ იმიტომ, რომ მოხდა მოვლენების ქრონოლოგიის ფალსიფიცირება, ხელმოწერების გაყალბება, ქალაქის საზოგადოების მხარდამჭერი მომართვის იგნორირება, რამაზ იოსელიანის მხარდამჭერების დაშანტაჟება. ასევე გაურკვევლია, რატომ დასჭირდა ადგილობრივი მუნიციპალიტეტის ხელმძღვანელობას რეკომენდაციის რამოდენიმეჯერ გამოგზავნა.
ჩვენ გაგვიჩნდა ეჭვი, რომ თქვენამდე რეალურმა მდგომარეობამ ვერ მოაღწია და სამართლიანობის იმედით კიდევ ერთხელ გთხოვთ გაითვალისწინოთ გორელი მსახიობების გულისტკივილი, _ აღნიშნულია მინისტრისთვის გაგზავნილ წერილში.
