ზედმეტ გადასახადს აპროტესტებს მოსახლეობის გარკვეული ნაწილი, რომელსაც მიაჩნიათ, რომ თანხა არაკანონიერად დაერიცხათ. თუმცა, მათი განცხადებით, “ენერგო-პროს ჯორჯიასთან” ვერაფერს გახდნენ და იძულებული არიან, ეს თანხა გადაიხადონ. “ენერგო-პრო ჯორჯიას” წარმომადგენლები აცხადებენ, რომ ზედმეტი გადასახადი მრიცხველის “შენელებული მუშაობის” ბრალია, რასაც დაზარალებული ოჯახები არ ეთანხმებიან.
ოზურგეთში, გოთუას ქუჩაზე მცხოვრები თათული მგელაძე “გურია ნიუსთან” ამბობს, რომ დახარჯულის ზევით 124 ლარი ზედმეტი თანხის გადასახადი მის ოჯახს ყოველგვარი გაფრთხილების გარეშე მიუვიდა: _ 2012 წელს, თუ არ ვცდები, აპრილი იყო, გამოგვიცვალეს მრიცხველი. როდესაც გვიცვლიდნენ, გვითხრეს, რომ იყო დაზიანებული. მე ვიყავი ძალიან შეწუხებული და ვუთხარი კიდეც, ხომ არ ფიქრობთ, რომ ეს ჩვენგან მოხდა,-მეთქი? ხანდახან სპეციალურად აზიანებდნენ მრიცხველებს, რომ ნაკლები თანხა დაეწერა. თუმცა, განმიცხადეს, ქალბატონო, როგორ გეკადრებათ, თქვენ არაფერ შუაში ხართ, დიდი ხანია, დგას ეს მრიცხველები და ალბათ, დროთა განმავლობაში წვიმასა და თოვლში დაზიანდაო. მომცეს სპეციალური აქტი, რომ გამოიცვალა მრიცხველი. მაშინ ვკითხე, მე ამ მრიცხველის თანხას ხომ არ გადამახდევინებთ,-მეთქი, მიპასუხეს, არანაირ გადასახადს თქვენ არ გადაიხდითო.
იმ პერიოდში მე სახლშიც არ ვიყავი, და არ ვიცი, როგორ მოხდა ამ თანხების გადანაწილება, რაც მე ჯარიმის სახით დამაკისრეს. მაინტერესებს, როგორ დამაწერეს ეს თანხა. გავიდა ერთი წელიწადი და რამდენიმე დღის წინ, მომივიდა გადასახადი. უკვე რამდენი ხანია, ვიხდი სტაბილურ გადასახადს: 28, 29, 30, 31 ლარს. ამჯერად მოვიდა გადასახადი 32 ლარი და პლუს კიდევ 124 ლარი.
_ ყოველგვარი გაფრთხილების გარეშე?
_ არანაირი გაფრთხილება არ ყოფილა. სად მაქვს ამდენი თანხა? შევწუხდი, რაიმე შეცდომა ხომ არაა,-მეთქი. წავიდნენ ჩემი შვილი და რძალი ელქსელებში, სადაც უპასუხეს, რომ ეს ერთი წლის წინ მრიცხველის გამოცვლის შედეგიაო. ვერ ვხვდები, როგორ გამოიყვანეს გადასახადი _ არ მცემენ ამაზე პასუხს. გია ნაკაიძემ გვითხრა, ეს ჩემს კომპეტენციაში არ შედის და დარეკეთ “ცხელ ხაზზეო”, თუ არადა, მიმართე სასამართლოსო. სასამართლოს რომ ფული უნდა, მე მიღირს ეს? ესე იგი, იძულებულს გხდიან, რომ გადაიხადო. ერთ დღესაც ჩაგვიჭრეს ხაზი, რომ არ გადავიხადეთ, ესეც ყოველგვარი გაფრთხილების გარეშე, მიუხედავად იმისა, რომ გადახდილი მქონდა, რაც უნდა გადამეხადა.
დავრეკეთ “ცხელ ხაზზე”. მითხრეს, ეს თანხა ორ თვეში უნდა დაფაროთო. იძულებული გავხდით, ნაწილი გადაგვეხადა. ახლა მიწევს მეორე ნაწილის _ 62 ლარის გადახდა. ბრძოლას აზრი არ აქვს. ვინმე რამედ გაგდებს? როგორ დამიდგინეს ამდენი ზედმეტი გადასახადი _ ამაზე გამცენ პასუხი.
ერთ-ერთი ასეთი პრობლემის მქონე მოქალაქის გივი დობორჯგინიძის შესახებ ჩვენ ერთხელ უკვე ვწერდით _ იგი “გურია ნიუსს” დახმარებას სთხოვდა .
მაშინ “ენერგო-პრო ჯორჯიას” ოზურგეთის სერვისცენტრის აბონენტთა მომსახურების სპეციალისტმა ეკა ორაგველიძემ ამ საკითხთან დაკავშირებით ასეთი კომენტარი გააკეთა:
_ ამ აბონენტს 2012 წლის 11 აპრილს გამოუცვალეს მრიცხველი. მრიცხველი შენელებულად მუშაობდა და არ აღრიცხავდა მის მიერ მოხმარებულ ელექტროენერგიას სრულად. დარღვევა იყო ასეთი: 2012 წლის 30 მარტს დაიწერა აღრიცხვის კვანძის მიღების აქტი. შემოწმებისას აღმოჩნდა, რომ მრიცხველს იმპულსი ჰქონდა, მაგრამ მთვლელი მექანიზმი დაზიანებული იყო. ამის შემდეგ ხდება გადაანგარიშება, რამდენით იყო მრიცხველი შენელებული. აბონენტს დაერიცხა 25 ლარი და 87 თეთრი, რომელიც არის მრიცხველის შენელების და აუცილებლად უნდა გადაიხადოს. მე წაგიკითხეთ ოფიციალური დადგენილება ამის შესახებ.
გივი დობორჯგინიძემ რამდენიმე დღის წინ გვთხოვა, “ენერგო-პრო ჯორჯიას” ოზურგეთი სერვისცენტრის მენეჯერთან გია ნაკაიძესთან მივსულიყავით. დობორჯგინიძე თავის ხელნაწერ განცხადებას ითხოვდა, სადაც “ენერგო-პროს ჯორჯიას” მიმართავდა, რომ მრიცხველი ჩქარა მუშაობდა: _ მაჩვენეთ ეს განცხადება, სადაც მე მოგმართავდით, რომ მრიცხველი ჩქარა ტრიალებს. თქვენ ამბობთ ერთი წლის მერე, რომ იმიტომ მოგივიდა ზედმეტი გადასახდი, მრიცხველი შენელებულად მუშაობდაო. ცხადი ხომ არის, რომ იტყუებით და ერთი წლის მერე გაგახსენდათ მრიცხველის დაზიანება? პენსიონერ კაცს ასე უნდა მოექცეთ? თქვენს ასაკში მე დამსახურებული მუშაკი ვიყავი ყველგან, მაგრამ ასე არ გამიკეთებია, გამარკვიეთ ჟურნალისტის თვალწინ, რასთან გვაქვს საქმე, მაჩვენეთ ჩემი განცხადება! _ ეუბნებოდა ნაკაიძეს დობორჯგინიძე.
გია ნაკაიძე: _ მორჩით? დავიწყო? ახლა მე მომისმინეთ! ჯერ ერთი, თქვენ სად იმუშავეთ, მე ეგ არ მაინტერესებს და არ მიკითხავს თქვენთვის. ჩემთვის აბონენტი ღირსების ორდენოსანია თუ სხვა, არ აქვს მნიშვნელობა.
გივი დობორჯგინიძე: _ განცხადებას ვითხოვ!
გია ნაკაიძე: _ მომისმინე, მე ხომ გისმენდი, მათქმევინე, მერე ისევ მოგისმენ და ვიყოთ, თუ გინდა, ასე საღამომდე აქ. ჩემთვის აბონენტი არის ნებისმიერი თანამდებობის პირი, გლეხი, დეპუტატი პენსიონერიც. მე არ ვარჩევ, “პაგონიანი” შემოდის ჩემთან თუ “უპაგონო” . თქვენ სულ რაღაც პრეტენზიები გაგაჩნიათ, ყველაფერს ეჭვის თვალით უყურებთ და ჩემს პიროვნებას განსაკუთრებით, მაგრამ ეს მე ნაკლებად მაინტერესებს. მთავარია, მე ჩემზე დაკისრებულ მოვალეობას ისე ვაკეთებდე, როგორც საჭიროა. შენი აზრი მე ნამდვილად არ მაინტერესებს, რა!
გია ნაკაიძე, რომლის დამოკიდებულება აბონენტებთან კარგად ჩანს, “გურია ნიუსთან” ასეთ კომენტარს აკეთებს:
_ ნებისმიერი მრიცხველზე, რომელიც ზიანდება, დგება შესაბამისი აქტი, რომ დაზიანებული მრიცხველი იცვლება ახლით, ხდება დარიცხვა, რა პერიოდზე არ აღრიცხავდა მრიცხველი სრულად ელექტროენერგიას. ეს ჯარიმა არ არის _ ეს არის მოხმარებული ელექტრონერგიის საფასურის დარიცხვა, რომელიც მრიცხველმა არ აღრიცხა. მაგაზე განმარტება თქვენ ერთხელ უკვე მიიღეთ, როგორც მახსოვს და მეტს არაფერს და ვერაფერს გეტყვით. გქონდათ უკვე სტატია ამ თემაზე და კიდევ აკეთებთ?
_ რა თქმა უნდა, ეს პრობლემა კვლავ არსებობს და მოსახლეობა გაურკვეველ მდგომარეობაშია.
_ არ იცვლება არაფერი. ერთი თვის ან ერთი წლის მერეც რომ მკითხოთ, პასუხი ანალოგიური იქნება.
ამ თემაზე ჩვენ კიდევ გავაგრძელებთ მუშაობას.
