შეხვედრაზე პრეზიდენტობის კანდიდატს ადგილობრივი ხალხური ანსამბლი “ხელხვავი“ და დროშებმოფრიალე პატარა ფეხბურთელები დახვდნენ. ჩვენს კითხვას, საკუთარი ინიციატივით მოვიდნენ შეხვედრაზე თუ ვინმემ მოიწვია, გვიპასუხეს, რომ შტაბის დავალებით აკეთებენ ამას. “ქართული ოცნების“ პრეზიდენტობის კანდიდატთან შეხვედრას, ასევე, ესწრებოდა საქართველოს პრემიერის ძმა, ადიკო ივანიშვილი, რომელმაც მარგველაშვილი გამოსვლის დასრულების შემდეგ ხელგადახვეულმა მიაცილა მანქანამდე. მოედანზე მრავლად შეინიშნებოდა სოფლებიდან ჩამოყვანილი ავტობუსები და სამარშრუტო ტაქსები.
მარგველაშვილს თან ახლდა მინისტრი კახი კალაძე, მსახიობი ზაზა კოლელიშვილი, ჟურნალისტი ქეთი დუმბაძე.
პრეზიდენტობის კანდიდატმა ისაუბრა სამომავლო გეგმებზე. მოსახლეობას შეჰპირდა, რომ გაპრეზიდენტების შემთხვევაში, ის ხშირად იქნება ხალხთან და მათთან ერთად გადაწყვეტს ყველა პრობლემას.
_ ვერ დაგპირდებით, რომ ასე გავაგრძელებ სიარულს სოფლებში, მაგრამ გპირდებით, რომ ხშირად ვიქნები თქვენ გვერდით, რომ თქვენთან ერთად გადავჭრი ყველა პრობლემას. პიარს გვიწუნებენ, მაგრამ რა არის იმაზე დიდი პიარი, როცა წიგნები დახვდება მოსწავლეს მერხზე, როცა პენსია 150 ლარი გახდა, მშობიარობა უფასო, ბაღი უფასო. თუ მაინცდამაინც პლაკატი უნდა გავაკეთო წიგნებით და ჩემი ფოტოთი?! _ თქვა მარგველაშვილმა.
მიუხედავად იმისა, რომ ადგილობრივი ხელისუფლება უკვე დიდი ხანია, აფრთხილებს საჯარო მოხელეებს, რომ არ დაესწრონ მსგავს შეხვედრებს, რადგან არჩევნები უნდა ჩატარდეს დემოკრატიულად, შეხვედრაზე მაინც შეინიშნებოდა საჯარო მოხელეებიც,
პრეზიდენტობის კანდიდატის მიმართვის დასრულების შემდეგ მას მოსახლეობამ კითხვებით მიმართა. შეხვედრაზე მყოფ ადამიანთა შორის იმყოფებოდა აცანელი ზაურ ჩხაიძე, რომელიც ასევე ესწრებოდა პრეზიდენტობის კანდიდატების: შალვა ნათელაშვილისა და ნინო ბურჯანაძის მოსახლეობასთან წინა საპრეზიდენტო შეხვედრებს. ის კანდიდატების მიმართ კრიტიკულობით გამოირჩეოდა, ამჯერადაც არ უღალატა თავის პრინციპს და მარგველაშვილი გააკრიტიკა. ჩვენს კითხვას, თუ რომელ კანდიდატს გამოარჩევდა ამ სამიდან, ასე გვიპასუხა: მე რომ მკითხოს ვინმემ, ერთად რომ მეიყრიან თავს, შეიძლება, გამოვიდეს ერთი კარგი კანდიდატი“ . ასე ცალ-ცალკე არცერთი არაფერი არ იქნება. ყველა გაიძახის _ კაი მე ვარო, ვერ მივხვდი, რომელია კაი. რაც შეეხება მარგველაშვილს, ივანიშვილის ხათრით შემეევლოს ჩემი თავი, მაიც ეს სჯობია, ყანა კი დაგვითესა გლეხებს და რაცხა კი გააკეთა მაინც, ბევრი ტყუილიც კი გამოუვიდა, მარა რას ვიზამთ, _ გვითხრა აცანელმა ზაურ ჩხაიძემ.
შევეცადეთ, გაგვეგო, ვის თვლის გიორგი მარველაშვილი მთავარ კონკურენტად საპრეზიდენტო არჩევნებში, თუმცა კითხვის დასმის უფლება პრესსამსახურმა არ მოგვცა: _ გიორგი მარგველაშვილი არ განიხილავს კონკურენტებს ამ კამპანიის დროს.
