და პოლიციასთან პრეტენზია არ აქვს. პოლიცია იმუქრება, ახლა ჩამთავრდეს არჩევნები და მერე გიჩვენებთო…” _ ამბობს ერთ-ერთი წალენჯიხელი, რომელმაც “გურია ნიუსს” ინფორმაცია ანონიმურობის დაცვის პირობით მიაწოდა.
“წალენჯიხაში სამი კვირის წინ, შაბათ ღამით, ზემო ფაბრიკის დასახლებაში, 5 ოჯახი გაიქურდა. ტელევიზორები და სხვადასხვა ტექნიკა წაიღეს. ასევე, საოჯახო ნივთებიც. თქვეს, რომ ნაქურდალი გალში გადაიტანეს. როგორც ვიცი, პოლიციაში არც ერთ ოჯახს არ განუცხადებია გაქურდვის შესახებ. პოლიციასთან არც ერთი ფორმით არ უნდათ თანამშრომლობა, რადგან წალენჯიხის პოლიცია ფაშისტურ გესტაპოსთან ასოცირდება.
“ნაციონალური მოძრაობის” დროს, მთელ საქართველოში ყველაზე სასტიკი პოლიცია წალენჯიხასა და ზუგდიდში იყო. ახლა ესენი (“ქართული ოცნება”. ავტ.), რომ მოვიდნენ, ცოტა დამშვიდდნენ, მაგრამ მაინც ცდილობენ იმის გაკეთებას, რასაც აკეთებდნენ.
პოლიციაში ისევ ის კადრებია, რომლებიც ადამიანებს აუბედურებდნენ. ეს ფაქტები არ გამოძიებულა და არც ერთ წალენჯიხელს არ უჩივლია პოლიციისთვის. იმიტომ, რომ არ სჯერათ იმისი, რომ ქვეყანაში რამე შეიცვალა, რადგან ისევ ის კადრები არიან ძალოვნებში, რომლებიც იყვნენ. უფრო მეტიც – ზოგიერთი მათგანი დააწინაურეს კიდეც,” _ ამბობს წყარო.
“გურია ნიუსმა” აღნიშნული ინფორმაცია რამდენიმე წალენჯიხელთან გადაამოწმა, რომლებიც ინტერვიუზე მხოლოდ ანონიმურობის დაცვის პირობით დაგვთანხმდნენ. როგორც ისინი ამბობენ, პოლიციის მიერ ადამიანების მანქანით გატაცებისა და ცემის ფაქტები “ნაციონალური მოძრაობის” მმართველობის პერიოდში საკმაოდ ხშირი იყო. თუმცა, ბოლო პერიოდში მათ ამის შესახებ არაფერი სმენიათ. ამასთან, წალენჯიხელები აღნიშნავენ, რომ ბოლო თვეების განმავლობაში რაიონში ძარცვა-დაყაჩაღების შემთხვევები განსაკუთრებით გახშირებულია, მაგრამ ამისათვის არავინ ისჯება.
“ბოლო 5-6 თვის განმავლობაში, კვირა არ გავა, რომ ძარცვა და ქუჩური გარჩევები არ იყოს. ასე, 2 თვის წინ იყო შემთხვევა, როცა ციხიდან გამოსული კაცი შურისძიების მიზნით, მეზობელს თავს დაესხა და დაჭრა. ეძებდნენ, მაგრამ ამ დრომდე არ დაუკავებიათ. დაახლოებით სამი თვის წინ კი წალენჯიხის რაიონის სოფელ საჩინოში სკოლა და წალენჯიხაში ბანკი გაძარცვეს _ “ლიბერთი ბანკის” ფილიალიდან კომპიუტერები წაიღეს და როგორც ვიცი, ამისთვისაც არავინ დაუჭერიათ. გუშინწინ ჩემს მეზობელს “ნოუთბუქი” მოპარეს. ბავშვის ოთახში ჰქონდათ და ღამით ისე ააცალეს, რომ ვერავინ ვერაფერი გაიგო,” _ ამბობს “გურია ნიუსთან” წალენჯიხის რაიონის მკვიდრი.
“ღამე გარეთ გასვლის უკვე გვეშინია. არჩევნების მერე, აქაოდა, ჩვენი დრო მოვიდაო და ყოველი შელაპარაკება გარჩევებით მთავრდება. რამდენიმე დღის წინ, ერთ-ერთი გარჩევის დროს, ბიჭს თავში ბოკალი ჩაარტყეს. 11 ნაკერი დაადეს. ბიჭებმა თქვეს, პოლიციამ რომ გაიგო, მადლობა გვითხრა, მაგ ტიპებს ვერაფერს ვუხერხებდით და ღირსები არიანო.
იმის შემდეგ, რაც ამდენი პატიმარი გამოვიდა, ყაჩაღობებიც ძალიან გახშირებულია, მაგრამ არავინ არ აცხადებს პოლიციაში. რისთვის განვაცხადოთ, მაინც არავის იჭერენ და რა აზრი აქვს. თან რომ ვიჩივლოთ, გაიგებენ და შეიძლება უარესი დაგვმართონ,” _ ამბობს კიდევ ერთი წალენჯიხელი.
შსს-ს სამეგრელო-ზემო სვანეთის სამმართველოს პრესსამსახურში “გურია ნიუსს” განუცხადეს, რომ “დანაშაულის სტატისტიკის მიხედვით, მთელი ქვეყნის მასშტაბით ყველანაირმა დანაშაულმა დაიკლო”.
“ეს ინფორმაცია გასაჯაროებული გვაქვს და ნებისმიერ ადამიანს შეუძლია ამ მონაცემებს გაეცნოს.
თუკი მსგავსი ფაქტები ხდება, ამ შემთხვევებთან დაკავშირებით მოსახლეობამ არა ჟურნალისტებს, არამედ შესაბამისი რაიონის პოლიციის განყოფილებას უნდა მიმართოს, რომ საქმეს მსვლელობა მიეცეს,” _ განუცხადეს “გურია ნიუსს” შსს-ს პრესსამსახურში.
