ოზურგეთის ყოფილ აგრარულ ბაზარში მომუშავეებს, სადაც მოვაჭრეთა ნაწილი დღემდე რჩება და განაგრძობს მუშაობას, გასულ ორშაბათს დაწიოკებით ემუქრებოდნენ, თუმცა 23 მაისი მათ მშვიდობიანად გაუთენდათ. როგორც თვითონ ამბობენ, მუნიციპალიტეტის ზედამხედველობის სამსახურიდან კვლავ ესტუმრნენ, ოღონდ, შედარებით ლმობიერი შეთავაზებით: თვის ბოლომდე გაცლით და იმ თვის პირველ რიცხვებში, მაინც ახალ ბაზარში უნდა გადახვიდეთო. ასე რომ, წინ კიდევ ერთი ორშაბათი დარჩა, თუმცა, მოვაჭრეებს იმედი აქვთ, ბარე ორ ორშაბათს ვერ დაგვძრავენ აქედან _ ძალიან მართალნი ვართ და იმიტომო.
ყოფილი ბაზრის ტერიტორიის იმ ნაწილზე, სადაც თევზით მოვაჭრეები დგანან, მიწისქვეშა გვირაბით პატარა მდინარე ე. წ. “ბაზრისწყალი” გადის. აქ ყოველთვის მეტი სიგრილეა, ვიდრე დანარჩენ ტერიტორიაზე. მოვაჭრეებსაც საგანგებოდ აქვთ შერჩეული ეს ადგილი, რადგან გასაყიდი თევზისთვის მოხერხებული გარემოა. როგორც მათ თქვეს, ზედამხედველობის სამსახურის თანამშრომლებმა მათაც უბრძანეს კატეგორიულად, ახალ ბაზარში გადადითო.
_ გაგვაგებინონ, რატომ გვაგდებენ აქედან? გაიძახიან, სახელმწიფო მიწააო, მერე მათ რა უნდათ? ჩვენ ამ სახელმწიფოს მოქალაქეები არ ვართ? მაცივრისთვის რაც ელექტროენერგია იხარჯება, გადასახადს პატიოსნად ვიხდით ყოველ თვეში, აწიც გადავიხდით, ვიქნებით აქ, რას ვაშავებთ? თვითონ სარგებლობენ იმით, რომ დღეს ხელისუფლებაში არიან და სურთ, აქ კერძო მაღაზიები ააშენონ. მერე დააყენებენ თავიანთ ხალხს და გამდიდრდებიან უფრო მეტად. მეტი, აბა, რისთვის იბრძვიან ესენი?! _ ამბობენ მოვაჭრეები და დასძენენ, რომ რადგან ეს სახელმწიფოს მიწაა, ისეთივე უფლება აქვთ აქ იდგნენ, როგორც მომავალში ნებისმიერ აქ მომსვლელს.
მოვაჭრეები თანახმა არიან, კანონს ყოველმხრივ დაემორჩილონ, _ გადაიხადონ გადასახადი; თუ აქ ახალ შენობას ააშენებენ, შევიდნენ და ივაჭრონ.
მათივე თქმით, ახალ, ანუ “სირაძის ბაზარში”, დახუთულ გარემოში, წესიერი ვენტილაციაც არ არის და შიშობენ, გადასახადსაც ძალიან მაღალს გადაახდევინებენ.
რაც შეეხება ოზურგეთის მუნიციპალიტეტის ზედამხედველობის სამსახურს, იქ ამბობენ, რომ გარემოვაჭრე, თევზით ვაჭრობს თუ სხვა ნებისმიერი პროდუქტით, აუცილებლად უნდა გადავიდეს ახალ ბაზარში, მორჩა და გათავდა!
