ბევრი ქალბატონი დამეთანხმება, რომ თანამედროვე ლეიბ-საბნები, რომლებიც ძალიან ლამაზი, მსუბუქი და კარგი მოსახმარია, სინთეტიკური ბამბა-ქსოვილითაა დამზადებული და ჩვენმა საოჯახო სარეცხმა მანქანამ არაერთხელ ნაფლეთებად აქცია. ასეთი შემთხვევის შემდეგ ვიზრუნე ოჯახში არსებული ძველი ლეიბების განახლებაზე.
ყველა ოჯახში მოიპოვება ნატურალური ბამბისგან შეკერილი საწოლი ლეიბები, რომელიც სიძველისგან დატკეპნილი და ერთი შეხედვით გამოუსადეგარია. ზოგმა არც იცის, რომ ახლა ბევრგან არის გახსნილი ბამბის საპენტი მინი-საამქროები, რომელსაც ამ ძვირფასი ნატურალური პროდუქციის სრული განახლება შეუძლია. ერთმა ჩემმა მეგობარმა თავში შემოიკრა ხელი, როცა საკუთარი გამოცდილება გავაცანი და დახმარებაც შევთავაზე, _ ძველი ლეიბები კი დავწვი და აწი რაღა დროსიაო!
მათ, ვისაც ელემენტარული კერვა შეუძლიათ, ვურჩევ ჯერ შეაგროვონ ოჯახში არსებული ძველი ლეიბები, დაშალონ და დააპენტინონ. არც ისე ძვირი დაგიჯდებათ _ კილოგრამის დაპენტვა 50 თეთრი ღირს. ამის შემდეგ მოვამზადოთ ლეიბის საპირე და და სარჩული. საპირეს შესაკერად საჭიროა სპეციალური ბიაზის ან ნარმის ქსოვილი. სიგრძით ორი მეტრი, სიგანით ერთი მეტრი და ოცი სანტიმეტრი (2X1,20).
ცოტა რთულია საპირეში ბამბის დაგორგვლით ჩადების პროცესი, თუმცა, გთავაზობთ უფრო მარტივ გამოსავალს _ საპირეს ორივე ფარდი ქსოვილი ცალ-ცალკე აიღეთ. ერთზე მოათავსეთ ექვსი კგ ბამბა, თანაბარი განფენილობით. შემდეგ ზემოდან დააფინეთ მეორე ფარდი ქსოვილი და ნელ-ნელა შემოკერეთ ყველა მხრიდან. კერვის დროს ოდნავ შეუკეცეთ კიდეები და ნემსით ნაკერში მოაქციეთ. შემდეგ ავიღოთ სპეციალური მსხვილი აბრეშუმის ძაფი, გავუყაროთ მახათში და და თანაბარი დაშორებით, სამი პარალელური ხაზით ლეიბი დავალიანდაგოთ. ასევე თანაბარი დაშორებით, ექვს ადგილზე (სამი მარცხნივ, სამი მარჯვნივ, მახათის ორი ამოღებით გავაკეთოთ ნაზი, მაგრამ შეკრული კვანძები). შემდეგ ჩავდოთ ლეიბი სპეციალურ სარჩულში, რომლის გამზადებული სახით ყიდვაც შეგიძლიათ და ასევე შინ შეკერვაც.
მე ასე დავამზადე ექვსი ლეიბი. ახლა ვაპირებ ორსაწოლიანი ლეიბის გაკეთებასაც, რასაც იგივე მეთოდით გავაკეთებ, ოღონდ 12 კგ ბამბა და სიგანით ორმაგი ოდენობის საპირე და სასარჩულე ქსოვილი დამჭირდება. ჩემს მეგობრებს ძალიან მოეწონათ ჩემი გადაწყვეტილება ეკოლოგიურად სუფთა, ბუნებრივი პროდუქციისგან ლეიბის შეკერვის გამო და ახლა თვითონაც ცდილობენ იგივეს გაკეთებას.
