ჩვენ პირველ რიგში, დავიწყეთ ზრუნვა ბავშვთა ონკოჰემატოლოგიაზე და ამ მიმართულებით ვახორციელებთ პროექტს, რომლის სრულ დაგეგმარებასა და სისტემის აწყობაში დაგვეხმარებიან ამ საქმეში ყველაზე დიდი ცოდნისა და გამოცდილების მქონე დაწესებულებები და ორგანიზაციები. აი, ეს არის ჩვენი ამოცანა, რომ მოვიცვათ მთელი მწკრივი დაწყებული პროფილაქტიკიდან, დამთავრებული დაავადების სწორი მართვით. ეს სწორი მართვა არ გულისხმობს მხოლოდ დიაგნოსტიკას და მკურნალობას, მოიცავს ხარჯეფექტურ მკურნალობას, პერსონალის გადამზადებას, შესაბამისი აღჭურვილობის შეძენას და ასეთი სტრუქტურების ეფექტურ მენეჯმენტს. ასეთ ფართო ფრონტის გეგმა გვაქვს განსახორციელებელი და პირველ შეთანხმებებს მივაღწიეთ კიდეც. ეს ყველაფერი აქტიურ ფაზაში გადავა სექტემბრის მეორე ნახევრიდან.” _ ეს განცხადება ჯანდაცვის მინისტრმა დავით სერგეენკომ “გურია ნიუსთან” 2013 წლის 7 ივლისს გააკეთა.
დღეს კი, სწორედ სექტემბრის მეორე ნახევრის დასაწყისში, თბილისში პიტსბურგის საუნივერსიტეტო კლინიკის ხელმძღვანელები ჩამოვიდნენ. დელეგაციის შემადგენლობაში შედიან: დოქტორი ბრუნო გრიდელი – ცენტრის სამედიცინო და სამეცნიერო დირექტორი, ჩაკ ბოგოსტა – საერთაშორისო და კომერციული სერვისების პრეზიდენტი და ლორეტა ჰანველი- საერთაშორისო და კომერციული სერვისების ვიცე-პრეზიდენტი. ვიზიტის ფარგლებში დელეგაციის წარმომადგენლები გამართავენ შეხვედრებს ჯანდაცვის მინისტრ დავით სერგეენკოსთან ასევე გაეცნობიან : იაშვილის სახელობის კლინიკის , პალიატიური მზრუნველობის ცენტრის, ეროვნული სკრინინგის ცენტრის, მაღალტექნოლოგიური სამედიცინო ცენტრისა და ეროვნული ონკოცენტრის მუშაობას. პიცბურგის საუნივერსიტეტო კლინიკის დელეგაციის საქართველოში ჩამოსვლა, ჯანდაცვის მინისტრის დავით სერგეენკოს ამერიკის შეერთებულ შტატებში ვიზიტის დროს დაიგეგმა. ვიზიტის მიზანია საქართველოში ონკოლოგიური დარგის განხრით არსებული ვითარების შესწავლა და ამ მიმართულებით ტექნიკური მხარდაჭერა. ამერიკელი სპეციალისტები ქართველ კოლეგებს საკუთარ გამოცდილებას გაუზიარებენ და დარგის განვითარებისათვის კონკრეტულ რჩევებს მისცემენ.
შეხვედრები გაიმართება ჯანდაცვის სამინისტროში, იაშვილის სახელობის კლინიკაში (დაესწრება განათლების მინისტრიც), ეროვნულ სკრინინგ ცენტრში, ეროვნული ონკოცენტრსა და პალიატიური მზრუნველობის ცენტრში.
როგორც დავით სერგეენკო “გურია ნიუსთან” საუბრისას აცხადებს: “საქართველოში, სიკვდილიანობის მიზეზებში ონკოლოგიას არც თუ ისე დიდი ადგილი უჭირავს. აბსოლუტური უმრავლესობა სიკვდილიანობისა მოდის ინსულტებსა და ინფარქტებზე. სხვათაშორის, მესამე ადგილზეა ღვიძლის ცეროზი და მეოთხე ადგილზეა ონკოლოგია. მასშტაბებზე რომ შეგექმნათ წარმოდგენა, სიკვდილიანობის თვალსაზრისით, გულსისძარღვთა დაავადებებს საქართველოში უჭირავს 60%. მიუხედავად იმისა, რომ ონკოლოგიურ დაავადებებზე სულ 5% მოდის, დაავადების სპეციფიკიდან გამომდინარე, ეს არის ფატალურობის და უმწეობის შეგრძნება, რომელიც არა მარტო პაციენტს ანადგურებს, არამედ მთელ მის საახლობლოს, ამიტომ აქ არის გამოყენებული განსაკუთრებული მიდგომა.“
საყოველთაო ჯანდაცვის მეორე ეტაპის ფარგლებში, ონკოლოგიური პაციენტების გამოკვლევა და თერაპია (ქიმიოთერაპია, ჰორმონოთერაპია და სხივური თერაპია, აგრეთვე ამ პროცედურებთან დაკავშირებული გამოკვლევები და მედიკამენტები) დაფინანსდება 80%-ით. წლიური ლიმიტი შეადგენს 12 ათას ლარს. ონკოლოგიურ პაციენტთა მკურნალობა და გამოკვლევები 18 წლამდე დაფინანსდება სრულად.
დავით სერგეენკო: “ზოგადად, ონკოლოგიური დაავადებების მკურნალობა შედგება სამი მიმართულებისგან: ქირურგიული ოპერაცია, ქიმიოთერაპია და სხივური თერაპია. ქირურგიული ოპერაციები, ის რაც ონკოლოგიას ჭირდება შედის გეგმიური ოპერაციების შემადგენლობაში და ფინანსდება იგივე წესით, როგორც გეგმიური ოპერაციები _ 70%-ს იხდის სახელმწიფო და 30 %-ს _ პაციენტი. ბავშვებში 100 %-ით ფარავს სახელმწიფო ხარჯებს.
ახლა, რაც შეეხება დანარჩენ ორს _ ქიმიოთერაპიას და სხივურ თერაპიას, დაავადების ჯგუფის გარკვეული სპეციფიკიდან და ტექნოლოგიების სიძვირიდან გამომდინარე, ჩვენ ეს მთლიან პაკეტში კი არ გავაერთიანდეთ, არამედ ცალკე გამოვიტანეთ, ისევე როგორც სოციალურად დაუცველებსა და პედაგოგებში. ქიმიოთერაპიას და სხივურ თერაპიას დავაფინანსებთ ცალკე ლიმიტით, 12 000 მარტო ამაზე იქნება გამოყოფილი. 18 წლამდე იქნება სრული დაფინანსება, ხოლო 18 წლის ზემოთ სახელმწიფო გადაიხდის 80 %-ს. ეს არის ჩვენი მოდელი. ანუ თუ პაციენტს დაჭირდება ქირურგიული ოპერაცია, ის ცალკე ანგარიშიდან დაიფარება, 15 000 იანი გეგმიურიდან.”
