მოახლოებული საპრეზიდენტო არჩევნები, საარჩევნო პროცესის მიმდინარეობა, კონფლიქტური რეგიონები და ეუთოს სადამკვირვებლო მისიის აღდგენის აუცილებლობა, ეს ის მთავარი თემებია, რაზეც დღეს ეუთო-ს საპარლამენტო ასამბლეის დელეგაციის და საპარლამენტო უმრავლესობის წარმომადგენლებმა დახურულ ფორმატში შეხვედრისას ისაუბრეს. როგორც შეხვედრის დასრულების შემდეგ საპარლამენტო უმრავლესობის თავმჯდომარემ, დავით საგანელიძემ განაცხადა საარჩევნო პროცესის მიმდინარეობა იყო დღევანდელი შეხვედრის ერთ–ერთი მთავარი თემა.
“სტუმრები დაინტერესდნენ როგორ მიდის საარჩევნო პროცესი ქვეყანაში, რა რისკები და რა პრობლემებია. რამდენად არის დღეს მზად ხელისუფლება იმისთვის, რომ საარჩევნო პროცესი იყოს სამართლიანი და არჩევნები იყოს ობიექტური. მე ისინი დავარწმუნე, რომ ეს არჩევნები იქნება საქართველოს ისტორიაში ყველაზე დემოკრატიული არჩევნები. ქართველი ხალხი აირჩევს პრეზიდენტს, რომელიც იქნება არჩეული და არა ერთი რომელიმე პარტიის მიერ დანიშნული”, – განაცხადა დავით საგანელიძემ. მისი თქმით, შეხვედრაზე მხარეებმა საქართველოში ეუთოს მისიის მანდატის აღდგენის აუცილებლობაზე ისაუბრეს. ამ ბოლო დროს, თუნდაც, დღეს განვითარებული მოვლენების ფონზე ეს ჩვენთვის ძალიან მნიშვნელოვანი თემაა, განაცხადა უმრავლესობის ლიდერმა. მისივე თქმით, ამ საკითხთან დაკავშირებით მათ თავიანთი სურვილი და მზადყოფნა და გამოთქვეს, თუმცა, ეს მხოლოდ მათი გადასაწყვეტი არ არის, დასძინა მან.
შეხვედრისას მხარეებმა სოფელ დიცში შექმნილ ვითარებაზე ისაუბრეს. საოკუპაციო ზონის მონაკვეთზე შექმნილ ვითარებას საპარლამენტო უმრავლესობის ერთ-ერთი ლიდერი, ევროპასთან ინტეგრაციის კომიტეტის თავმჯდომარე ვიქტორ დოლიძე რუსეთის დესტრუქციული ქმედებების გაგრძელებად აფასებს.
“რუსეთის ამგვარი დესტრუქციული ქმედებების ფონზე მნიშვნელოვანია საერთაშორისო საზოგადოების ჩართულობის გაძლიერება. ჩვენი ყველა რესურსი მიმართულია სწორედ იქითკენ, რომ საერთაშორისო საზოგადოებამ რუსეთზე ზეწოლა გააძლიეროს”, – განაცხადა ვიქტორ დოლიძემ.
“შეხვედრაზე საქართველოსა და ეუთოს საპარლამენტო ასამბლეას შორის თანამშრომლობის საკითხებზე ვისაუბრეთ. ეუთოს სადამკვირვებლო მისიას უდიდესი როლი ენიჭება საქართველოში არჩევნების სამართლიანად და ევროპული სტანდარტების შესაბამისად ჩატარებისთვის. ჩვენ მადლობა გადავუხადეთ მისიას იმ ძალისხმევისთვის რასაც ის ადამიანის უფლებათა დაცვის და მედიის თავისუფლების კუთხით იჩენს“, – განაცხადა შეხვედრის დასრულების შემდეგ საპარლამენტო უმრავლესობის წარმომადგენელმა ელისო ჩაფიძემ.
