“სამინისტრო მემორანდუმის მხარეებთან ერთად კვლევის შედეგად უზრუნველყოფს მიზნობრივი სოციალური დახმარების პროგრამის გადახედვას და დახვეწას, რაც საშუალებას მოგვცემს, ქულების მინიჭების ფორმულამ, უფრო ობიექტურად შეაფასოს სოციალურად დაუცველი ოჯახების მდგომარეობა. სამუშაოების დამთავრების შემდეგ, იდენტიფიცირებული ახალი მეთოდოლოგია წარედგინება საქართველოს მთავრობას დასამტკიცებლად. საჭიროების შემთხვევაში საქართველოს კანონმდებლობაში განხორციელდება შესაბამისი ცვლილება.” _ აცხადებს “გურია ნიუსთან” საუბრისას სოციალური მომსახურების სააგენტოს დირექტორი ნოე ქინქლაძე.
მისივე განცხადებით, ფორმულა, რომელიც დღეს არსებობს, მაქსიმალურად დაიხვეწება და მისაღები გახდება საზოგადოებისთვის.
“სოცაგენტის სუბიექტური ფაქტორი მაქსიმალურად გამოირიცხება. თავად ეს მემორანდუმი ითვალისწინებს იმას, რომ განსაკუთრებული აქცენტი გაკეთდეს ბავშვიან ოჯახებზე და მათ განსაკუთრებული ყურადღება მიექცეთ ქულების დათვლის დროს. წლის ბოლოს უკვე ახალი ფორმულა გვექნება, რომელსაც მთავრობას შევთავაზებთ. მნიშვნელოვანი ფაქტორია ის, რომ სიების გადამოწმება მოხდება შემოსავლების სამსახურის მონაცემებიდან, რათა რაც შეიძლება ობიექტური ინფორმაცია გვქონდეს იმის შესახებ, თუ ვინ რა შემოსავალს იღებს. ეს ჩვენ საშუალებას მოგვცემს, ობიექტურად ვაკონტროლოთ შემოსავლები და გადაწყვეტილებაც ობიექტურად მივიღოთ. ეს გადაწყვეტილებაც მთავრობამ მიიღო. ჩვენ ბაზები უნდა ვაკონტროლოთ ობიექტურად.” _ აცხადებს ნოე ქინქლაძე.
მემორანდუმს ხელს აწერენ: შრომის ჯანმრთელობისა და სოციალური დაცვის მინისტრი დავით სერგეენკო, სოციალური მომსახურების სააგენტოს დირექტორი ნოე ქინქლაძე და გაეროს ბავშვთა ფონდის (UNICEF) წარმომადგენელი საქართველოში საშა გრაუმანი.
