9 სექტემბერს აფხაზეთში რუსეთის საელჩოს პირველ მდივანს დიმიტრი ვიშერნევს და მისი მეუღლეს ოლგას სოხუმში ცეცხლსასროლი იარაღიდან ესროლეს. ძიების შედეგად გაირკვა, რომ ცოლ-ქმარს დაქირავებულმა ჩეჩენმა ბოევიკმა იუსუფ ლაკაევმა ესროლა, ხოლო დაკვეთა სამხრეთკავკასიური ბანდფორმირებებიდან მიდიოდა.
25 წლის ლაკაევი 13 სექტემბერს ბათუმში დააკავეს. საქართველოს შინაგან საქმეთა სამინისტროს ოფიციალური განცხადებით, პოლიციამ ავტომანქანა, რომელშიც ლაკაევი ორ გამცილებელთან ერთად გადაადგილდებოდა, დოკუმენტების შემოწმების მიზნით გააჩერა. ჩეჩენმა ბოევიკმა პისტოლეტი ამოიღო და ცეცხლი გახსნა, რის შედეგადაც პატრულის თანამშრომელი და შემთხვევითი გამვლელი დაიჭრნენ. პოლიციამ ლაკაევს საპასუხო ცეცხლი გაუხსნა, მიღებული ჭრილობების გამო მან გაქცევა ვერ შეძლო. იუსუფ ლაკაევს ბრალი პოლიციისთვის წინააღმდეგობის გაწევის მუხლით წაუყენეს. ბათუმში ჩატარდა იმ ბინის ჩხრეკაც, სადაც ლაკაევი დროებით ცხოვრობდა. ჩხრეკის შედეგად პოლიციამ ცეცხლსასროლი და ცივი იარაღი ამოიღო.
შს სამინისტროს ერთ-ერთმა თანამშრომელმა გამოცემა kommersant.ru-ს ჟურნალისტს უთხრა, რომ “13 სექტემბერს პოლიციას უკვე ჰქონდა რუსეთის სპეცსამსხურებისგან მიღებული ინფორმაცია ლაკაევის მიერ აფხაზეთში ჩადენილი დანაშაულის შესახებ. ამიტომ იყო ეს არა დოკუმენტების შემოწმება, არამედ რეალურად მისი აყვანის ოპერაცია. ჩეჩენ ბოევიკთან ერთად, პოლიციამ ორი მოჭიდავეც დააკავა _ ფირუზ წულუკიძე და თემურ ბახუნდარიძე, რომლებმაც ჩეჩენი საიდუმლოდ გადმოიყვანეს აფხაზეთიდან და წულუკიძის ბინაში მალავდნენ. მათ სტუმრის თურქეთში გადაყვანა ჰქონდათ გადაწყვეტილი.”
რუსეთის საგამოძიებო სამსახურის ინფორმაციით, ლაკაევი ცოლ-ქმარს ვიშერნევებს 9 სექტემბერს გაუსწორდა. ის თავდაპირველად ავტოფარეხთან ელოდა მსხვერპლს და მათ აფეთქებას ხელნაკეთი ბომბით გეგმავდა. თუმცა, მოწყობილობამ არ იმუშავა და ქილერმა ცოლქმარს ხუთი ტყვია დაახალა, რის შედეგადაც ქმარი ადგილზე დაიღუპა, მეუღლე კი საავადმყოფოში.
აფხაზმა სამართლადამცველებმა სოხუმში ლაკაევის ნაქირავები ბინა გაჩხრიკეს, საიდანაც მისი ბიომასალის ნიმუშები ამოიღეს. ნიმუშები აიღეს ასაფეთქებელი მოწყობილობიდანაც, რომელიც პოლიციამ ვერნიშევების ავტოფარეხთან იპოვა. სამართალდამცავებმა სწორედ ამ ნიმუშების შესწავლის შედეგად დაადგინეს დამნაშავის ჯერ გენოტიპი, შემდეგ კი პიროვნება.
რუსეთის საგამოძიებო სამსახური თავდაპირველად მკვლელობის ვერსიად საყოფაცხოვრებო კონფლიქტსაც მიიჩნევდა, რადგან, როგორც გაირკვა, ლაკაევმა და მოკლულმა დიპლომატმა ბინები ერთსა და იმავე სახლში ერთსა და იმავე დროს იქირავეს და შესაძლო იყო მათ ეზოში შელაპარაკება ან კონფლიქტი მოუხდათ. პოლიციამ გამოკითხა სახლის მაცხოვრებლები, რომლებმაც განაცხადეს, რომ მსგავსი კონფლიქტი ან შელაპარაკება არ მომხდარა. გამოძიება მკვლელობის კიდევ ერთ ვერსიას განიხილავდა _ დიპლომატი ვიშერნევი სასამართლოში რუსების ქონებრივ უფლებებს იცავდა, რაც აფხაზეთში მათ უძრავ ქონებას ეხებოდა. შესაძლოა, სწორედ ეს გახდა მასზე შურისძიების მიზეზი. საბოლოოდ, სამართლადამცავები იმ დასკვნამდე მივიდნენ, რომ დიპლომატი შეკვეთით მოკლეს.
გამოძიების ინფორმაციით, ერთი თვის წინ ლაკაევი რუსეთიდან აფხაზეთში არალეგალურად ჩავიდა და სოხუმში ბინა იქირავა. ის კონსპირაციის ყველა ზომას მიმართავდა, მაგალითად სახლში ახალგაზრდა ქალი და პატარა ბავშვი მიიყვანა, რითაც მეოჯახის იმიჯს იქმნიდა. მკვლელობამდე ერთი კვირით ადრე ქალმა და ბავშვმა აფხაზეთის ტერიტორია დატოვეს, “წითურმა ჩეჩენმა კი, _ როგორც გამოძიება ამტკიცებს, _ თმა გაიღიავა და სლავური იერი მიიღო. სწორედ აქედან მომდინარეობდა მოწმეთა ჩვენებები იმის შესახებ, რომ ქილერს სავარაუდოდ სლავური წარმომავლობა უნდა ჰქონოდა.
როგორც ლაკაევის მეზობლები ჰყვებიან, ლაკაევი პლასტმასის მაგნიტურ სუვენირებს სოხუმის პლიაჟზე ტურისტებზე ჰყიდდა, რითაც ის წვრილი ბიზნესმენის იმიჯს იქმნიდა. მკვლელობის შემდეგ ლაკაევი მაშინვე დაუკავშირდა თავის ბათუმელ მეგობრებს და დახმარება სთხოვა. როგორც გამოძიებამ დაადგინა, ლაკაევმა სამართალდამცავების ყურადღება ჯერ კიდევ 2010 წელს მიქცია, როდესაც ვაჰაბისტ ამირს უმარ ისაევს ტყეში საკვებს უზიდავდა. ლაკაევმა პატიმრობაში ცოტა ხანი დაჰყო და შემდეგ კვლავ მოხვდა სოჭის ოლიმპიადისთვის საფრთხის შემცველ ორგანიზაციათა და პირთა სიაში _ 90-კაციან სიაში ლაკაევს N48 აქვს მინიჭებული.
რუსეთის ფედერაცია საქართველოს ლაკაევის ექსტრადირებას სთხოვს თუმცა როგორც მთავარ პროკურატურაში აცხადებენ, რუსეთიდან ოფიციალური მომართვა ამ დრომდე არ მიუღიათ.
სტატია მომზადებულია kommersant.ru-ზე დაყრდნობით
