მშენებლობა 2012 წელს უნდა დასრულებულიყო, მაგრამ, ჯერჯერობით, ცნობილი არ არის ზუსტი თარიღი, თუ როდის მოხდება ახალი შენობის დასრულება.
ელგუჯა ბერიშვილი: _ ოლიმპიურ კომიტეტში არის ის ხალხი, რომელსაც ძალიან უყვარს სპორტი და ამის ერთ-ერთი დასტურია ეს სპორტული კომპლექსი, რომელიც ოზურგეთში რამდენიმე წელია შენდება. მშენებლობა, თითქმის, დასრულებულია და ის სამუშაოები, რაც არის დაუმთავრებელი, იმედია, მალე დასრულდება. ყველამ უნდა მოვინდომოთ, რომ ეს კომპლექსი დროულად დასრულდეს. იგი იქნება სპორტის გაძლიერების საწინდარი.
_ ბატონო ელგუჯა, რატომ გაჭიანურდა სამშენებლო სამუშაოები _ ფინანსები არ არის?
_ რა თქმა უნდა, ფინანსური პრობლემა იყო. შენობის საბოლოო სახე უკვე დამთავრებულია, თუმცა არის კიდევ სამუშაოები დასასრულებელი, რომელსაც მრავალი ათასი ლარი დასჭირდება. ჩვენ ძალიან დაინტერესებული ვართ, რომ ფინანსური სახსრების მოძებნა დროულად მოხდეს. ეს იქნება სპორტსმენების თავშეყრის ადგილი, აქ გაიმართება სხვადასხვა სახის ღონისძიებები და საღამოები.
_ რა რაოდენობის თანხაზეა საუბარი?
_ დაახლოებით, 100 000-იდან 150 000 ლარამდე არის კიდევ საჭირო.
_ სპორტის და ახალგაზრდობის საქმეთა მინისტრმა, ლევან ყიფიანმა ამ მშენებლობის შესახებ არაფერი იცოდა. გქონდათ თუ არა მასთან შეხვედრა?
_ მე პირადად, ამ საკითხთან დაკავშირებით, არ მქონია მასთან საუბარი, მაგრამ ოლიმპიური კომიტეტის პრეზიდენტი, ლერი ხაბელოვი შეხვდა მას და ყველა კითხვას პასუხი გაეცა. ყველანი დაინტერესებული ვართ, რომ ეს შენობა მალე გაიხსნას.
ელგუჯა ბერიშვილი, ასევე, სეოკ-ის გურიის რეგიონული ორგანიზაციის ხელმძღვანელთან, ლაშა ლომაძესთან ერთად, ურეკში მხარის წარმატებულ სპორტსმენთა შეკრებაზე იმყოფებოდა, რომელიც 12 დღეს გასტანს. სპორტული კომპლექსი ურეკში წელს აშენდა. ზღვისპირეთში წვრთნებს გურიიდან ასევე ის ახალგაზრდა სპორტსმენები გადიან, რომლებიც 2015 წელს თბილისში გასამართი ევროპის ახალგაზრდული ოლიმპიური ფესტივალისთვის, სპორტის სხვადასხვა სახეობებში, საქართველოს ნაკრების კანდიდატებად ითვლებიან. როგორც ლაშა ლომაძემ გვითხრა ათლეტებს სავარჯიშოდ იდეალური პირობები აქვთ შექმნილი და მსგავსი ტიპის შეკრებები სისტემატურ სახეს მიიღებს.
