გადაცემა, რომლის ნახვა ჩვენ ვებგვერდზე www.gurianews.com შეგიძლიათ, ყოველ ოთხშაბათს იწერება.
გადაცემის მსვლელობისას თქვენ საშუალება გაქვთ დარეკოთ ტელეფონის ნომერზე 551373636 და ჩვენ სტუმარს თქვენთვის საინტერესო შეკითხვები დაუსვათ. შეკითხვების დასმა, “გურია ნიუსის” ვებგვერდსა და ჩვენი გამოცემის ფეისბუქის ოფიციალურ გვერდზეც არის შესაძლებელი, გადაცემის ბეჭდურ ვერსიას კი გაზეთში გაეცნობით.
ჩვენი პირველი გადაცემის სტუმარი ჩოხატაურის მუნიციპალიტეტის გამგებლის მოვალეობის შემსრულებელი, თამაზ ჯინჭარაძე გახლდათ.
ჯინჭარაძესთან საუბარი მისი მუშაობის 10-თვიანი პერიოდით დავიწყეთ. როგორც გამგებლის მოვალეობის შემსრულებელმა აღნიშნა, მისთვის პირველი მოსაგვარებელი პრობლემა კადრების დანიშვნა იყო. რომელიც დღესაც გრძელდება: _ ვგულისხმობ სოფლის ხელმძღვანელების შეცვლას, _ თქვა ჯინჭარაძემ.
გამგებლის მოვალეობის შემსრულებლის განმარტებით, ახალი ხელისუფლების მიერ საარჩევნოდ ადმინისტრაციული რესურსის გამოყენება არ ხდება და ამით ბიუჯეტი იზოგება:
_ წელს უფრო მეტი ფული დაიხარჯა ინფრასტრუქტურის კუთხით, ჩოხატაურელების ერთ-ერთი მთავარი ოცნება _ კულტურის სახლი, შენდება.
_ ბატონო თამაზ, გინდათ თქვათ, რომ გასულ წელს, წინასაარჩევნო შეხვედრების დროს ბიუჯეტის თანხები იხარჯებოდა? ამის დამამტკიცებელი კონკრეტული საბუთი გაქვთ?
_ კონკრეტული მტკიცებულება არ მაქვს, მაგრამ რომ იხარჯებოდა, ეს ყველამ იცის. იმ ადამიანებმა, რომლებსაც ეს ფული ურიგდებოდათ და იმათაც, რომლებიც ამ ფულს არიგებდნენ.
_ ეს საკმაოდ სერიოზული ბრალდებაა. რამდენად სწორია დანაშაულზე საუბარი, როცა მტკიცებულებები არ არსებობს?
_ მესმის, რასაც ამბობთ, მაგრამ ეს არ არის ერთ, ორ ან სამ მაგალითზე. მთლიანობაში ეს მასობრივად ხორციელდებოდა და თქვენი აუდიტორია ალბათ ამაში დამეთანხმება, ეჭვს არ შეიტანს და არანაირ საბუთს არ მომთხოვს, რადგან ეს ასე იყო და არა მარტო შარშან.
ჯინჭარაძის თქმით, ყველა რწმუნებული, ასევე გამგეობის თანამშრომლები, კატეგორიულად არიან გაფრთხილებულნი, რომ წინასაარჩევნო პროცესებში მონაწილეობა არ მიიღონ.
თამაზ ჯინჭარაძეს ტელეფონის საშუალებით შეკითხვები სხვადასხვა საკითხზე დაუსვეს. ნატო ჯაფარიძე დაინტერესდა კურორტ ბახმაროში არსებული პრობლემებით. მისი თქმით, ამ საკითხზე ბევრი უწყება შეაწუხა, თუმცა კითხვაზე _ რატომ არ არის კურორტზე საკმარისი ბუნკერები, რატომ ხდება ელექტროენერგიის მიწოდება ხარვეზებით და რატომ იხდის დამსვენებელი არარეალურ თანხას დენის მიწოდებისთვის, პასუხი არ მიუღია.
ჯინჭარაძის განმარტებით, ახალი აიპ -ის, “ბახმაროს” შექმნამ სიტუაცია გააუმჯობესა: _ ეს არის პრობლემა, რომელიც ადგილობრივი ძალებით ვერ მოგვარდება. წლევანდელი წელი ჩავთვალოთ “მოთელვად”. წელს გაცილებით უკეთესი მდგომარეობა იყო ბახმაროში, ვიდრე ადრე _ ბუნკერებიც მეტი იდგა, თუმცა, უფრო მეტია საჭირო და ეს ყველაფერი მომავალი წლის ბიუჯეტში უნდა აისახოს. სხვათაშორის, ამ “მოთელვას” ის შედეგი მოჰყვა, რომ კახი კალაძე საქმის კურსშია და მომავალ წელს გამრიცხველიანება მოხდება. თუმცა, მხოლოდ იმ კატეგორიისთვის, რომელსაც მიწები და კოტეჯები დაკანონებული აქვთ, დანარჩენებს შუქი არ ექნებათ.
ჯინჭარაძის ინფორმაციით, ბახმაროში, ამ ეტაპზე, გზის სარეაბილიტაციო სამუშაოები მიმდინარეობს და ეკლესიის მიმდებარე ტერიტორიაზე ასფალტირება მოხდება.
ერთ-ერთი შეკითხვა სოფელ ზემოხეთს ეხებოდა. მსმენელი დაინტერესდა რა გაკეთდებოდა კონკრეტულად სოფელში, სადაც ყველაზე მეტი სოციალურად დაუცველი ადამიანი ცხოვრობს.
ჯინჭარაძის თქმით საჭამიასერი-ზემოხეთის გზა, რომელიც ავარიულია, უმოკლეს დროში გაკეთდება: _ ამის გარდა, სოფლის პროგრამის ფარგლებში გაკეთდება შიდა გზები და მოხდება სასმელი წლის სისტემის რეაბილიტაცია.
სოფელ გოგოლესუბნის მკვიდრი, ბუთა მამარდაშვილი დაინტერესდა, რატომ მიდის ქვეყნის ეკონომიკა უკან “ქართული ოცნების” ხელისუფლებაში მოსვლის შემდეგ: _ არ შემიძლია, უკმაყოფილება არ გამოვხატო “ქართული ოცნების” მიმართ, რადგან რაც ეს ხელისუფლება მოვიდა, ჩოხატაური, ფაქტობრივად, მკვდარია. არაფერი კეთდება, გარდა იმისა, რომ ვიღაცა ძროხას ეჯახება და ვიღაცა _ ტრაილერს. გარდა ამისა, რატომ არ სრულდება “ქართული ოცნების” მიერ უხვად მოცემული დაპირებები? ამ ერთი წლის განმავლობაში 44 000 სამუშაო ადგილი დაიკარგა, 33 000 ადამიანს დახმარება შეუწყდა და კრიმინალმა იმატა. ეკონომიკის 11-პროცენტიანი ზრდა _ 0, 8%-ზეა დაყვანილი. რა პასუხები გაქვთ ამ ყველაფერზე, როგორც “ქართული ოცნების” წარმომადგენელს? აქვე კიდევ ერთ შეკითხვას დავსვამ _ რა მოტივით გაუშვით სახლში სოფლის რწმუნებულები, რომლებიც ჩემთან საუბრისას ამბობენ, სამსახურიდან წასვლის შესახებ განცხადების დაწერა პირადად თქვენ, ზემოდან მიღებული დავალების შედეგად მოსთხოვეთ?
_ ეს ადამიანი რაზეც საუბრობს _ პირუტყვისთვის მანქანით დაჯახებაზე და ა. შ. გასაგებია, გასაგებია ისიც, ბატონი მამარდაშვილი რატომ და რისთვის რეკავდა. თუ მას სურვილი აქვს, აქვე, თქვენთან დავუჯდები ეთერში და ავუხსნი. ასე ზოგადად იმის თქმა, რომ ქვეყანა უკან მიდის, არ შეიძლება. ახლა მე ასე გავცემ პასუხს მას _ არ ვეთანხმები მის მოსაზრებას., ქვეყანა წინ მიდის და მე ოფიციალური მონაცემები მაქვს. ეს ზეციდან ნასროლი სიტყვები არ არის. მისი ჩამოყალიბებული შეკითხვა ვერ გავიგე.
_ ძალიან კონკრეტული შეკითხვაც იყო… რა მიზეზით გაათავისუფლეთ რწმუნებულები, რომლებსაც როგორც ამბობენ, განცხადების დაწერა პირადად მოსთხოვეთ…
_ ასე არ შეიძლება. იქნებ, მეც მაქვს ინფორმაცია ამ ადამიანზე, რომ რაღაც… ასე საუბარი არ შეიძლება.
_ რწმუნებულების გათავისუფლებაზე რას იტყვით?
_ მოსვლის დღიდან ვამბობ და ვაფიქსირებ, რომ ისინი უხეშად ერეოდნენ პოლიტიკურ ცხოვრებაში, რისი უფლებაც მათ არ ჰქონდათ. რომელი არ ერეოდა? დამისახელეთ ერთი მაინც.
_ თქვენ არ შეგიცვლიათ დაბის რწმუნებული, გოჩა ჯინჭარაძე, რომელიც თქვენი ნათესავია და, როგორც მოსახლეობის ნაწილი ამბობს, სწორედ ამ ნიშნით დარჩა თანამდებობაზე. ის “ნაციონალური მოძრაობის” მაჟორიტარობის კანდიდატის ძმა გახლდათ და ბევრ შეხვედრაზე დაგვიფიქსირებია…
_ ერთ-ერთი რწმუნებული, რომელიც ჩემი არც ბიძაშვილი ყოფილა და არც მამიდაშვილი, ხიდისთავში ახლახან შეიცვალა. ამით იმის თქმა მინდა, რომ ზოგ ადგილებზე კადრის დეფიციტი იყო. ჩვენ ამ თემებს ყოველდღე გავდივართ და როცა დგება იმის დრო, როცა მომწიფებულია სიტუაცია ამა თუ იმ სოფელში რწმუნებულის შესაცვლელად, ხდება ცვლილებები.
_ დაბის რწმუნებულზე არაფერი გვითხარით. სწორედ ეს შეკითხვა მოგვწერეს “გურია ნიუსის” ვებგვერდზეც. რატომ დარჩა ბოლოს დაბა და ხომ არ არის ეს ის შემთხვევა, როცა გამგებელი ნათესავებს არ ათავისუფლებს და პირიქით, მათ დასაქმებაზე ზრუნავს?
_ ამ ადამიანთან ნათესაური კავშირი მაქვს, მაგრამ ვინც ამ პიროვნებას იცნობს, დაიჯერებს, რომ ჩემთან უამრავჯერ მოვიდა და მთხოვა, რომ სამსახურიდან წავიდოდა. რწმუნებულები ზემოხეთშიც დატოვებული მყავს, დიდივანშიც ჯერჯერობით. დაბა სხვანაირი სპეციფიკაა. ვიღაცამ სხვანაირად არ გაიგოს, მაგრამ ეს ადამიანი უბოროტოა და პატიოსნად აკეთებს მის საქმეს. თუმცა, შესაცვლელია.
თამაზ ჯინჭარაძეს, გადაცემაში სტუმრობისას სოფელ ხევიდან დაურეკეს და ჰკითხეს, რას გააკეთებს ადგილობრივი ხელისუფლება იმ 22 მოსწავლისთვის, რომელიც ყოველდღე დადის ჩოხატაურის სამრევლო სკოლაში, თუმცა, იმის გამო, რომ კერძო სკოლის მოსწავლეები არიან, განათლების სამინისტროს პროგრამით _ “ტრანსპორტი ყველას სკოლას!”, ვერ სარგებლობენ.
_ ამ თემაზე ვმუშაობთ. ჩვენგან არანაირი პრობლემა არ არის, უბრალოდ, იურიდიულ საკითხებზე ვფიქრობთ. გამოსავალი მაპოვნინოს ვინმემ და პრობლემა არ არის. მე ამ სკოლას ავტობუსი გადავეცი, შევეცდები საბურავებიც შევუძინო და ტექნიკურად გავმართო. საწვავზეც ვიფიქრებთ და მივალთ რაღაც შედეგამდე. ჩვენც არ ველოდით _ ერთი კვირის უკან გავიგეთ, რომ ყველა სკოლას ტრანსპორტი დაენიშნა, _ განმარტა ჯინჭარაძემ.
ჩოხატაურის გამგებლის მოვალეობის შემსრულებელმა, სოფლის პროგრამების შესრულებაზეც ისაუბრა და სამუშაოების დაგვიანების მიზეზად გარემოს დაცვის სამინისტროს პოზიცია დაასახელა. ჯინჭარაძის თქმით, სოფლის გზების მოხრეშვა იმ მიზეზით ვერ იწყება, რომ სამინისტრომ კონკრეტული კარიერებიდან ხრეშის ამოღების ნებართვა არ გასცა: _ ახლა მოგვცეს ნებართვა და 10-15 დღეში დაიწყება.
_ რატომ მაინცდამაინც წინასაარჩევნოდ? სპეციალურად ხომ არ ხდება? წინა ხელისუფლებას ამ დროისთვის ეს სამუშაოები ყველგან დასრულებული ჰქონდა.სხვა საკითხია, რა ხარისხის…
_ ერთადერთი პრობლემა რაც შეიქმნა, ეს არის გზის მოხრეშვის პრობლემა. დანარჩენი დღე-დღეზე მთავრდება. არჩევნებამდე თვენახევარია და არ გამოვა მაგ თემაზე მიბმა, _ აღნიშნა ჯინჭარაძემ.
კითხვაზე, მოხდება თუ არა გასულ წლებში სოფლებში გახორციელებული პროგრამების შესწავლა, ჯინჭარაძემ აღნიშნა, რომ იმ სოფლის მოსახლეობამ, სადაც კონკრეტულ პროექტს ხარვეზი აქვს, ერთობლივი წერილით პროკურატურას უნდა მიმართოს.
მომავალი გადაცემის სტუმარი, ოზურგეთის მუნიციპალიტეტის გამგებლის მოვალეობის შემსრულებელი, კონსტანტინე შარაშენიძე იქნება. თქვენ საშუალება გექნებათ, ოთხშაბათს, 25 სექტემბერს 4-საათიდან 5 საათამდე თქვენთვის ნებისმიერი საინტერესო შეკითხვა, კონსტანტინე შარაშენიძეს დაუსვათ სატელეფონო ნომერზე: 551373636.
