ამის მიზეზი მათი ხელფასების განახევრება გახდა.
ჩოხატაურის მუნიციპალიტეტის გამგეობის მიმდებარე ტერიტორიაზე გამართულ აქციაზე, გამგებლის მოვალეობის შემსრულებელი, თამაზ ჯინჭარაძე მივიდა, რომლის თქმით, საქმის კურსში უკვე ჩააყენა მაჟორიტარი დეპუტატი.
ექიმების განმარტებით, ეს გამაფრთხილებელი აქციაა და იმ შემთხვევაში, თუკი შესაბამისი უწყებები პრობლემას დროულად არ მოაგვარებენ, გადაუდებელი სამედიცინო დახმარების სამსახურის ჩოხატაურის ფილიალი 1 ოქტომბრიდან მუშაობას შეწყვეტს.
აღსანიშნავია, რომ ამ პრობლემის შესახებ, როგორც ადგილობრივი, ისე ცენტრალური ხელისუფლება დიდი ხნის წინ იყო საქმის კურსში. “გურია ნიუსი” ჯერ კიდევ 25 ივლისს წერდა, რომ ექიმები გაფიცვისთვის ემზადებოდნენ. როგორც მაშინ ვწერდით, კომპანია “ალფამ”, რომელსაც გურიის ბაზრის 100% უკავია, უმწეოთა დაზღვევის პროგრამა, რომლის ფარგლებში ფინანსდებოდა უბნის ექიმები და სასწრაფო დახმარების სამსახური, არარენტაბელურობის გამო დატოვა, რაც ხელფასების განახევრების მიზეზი გახდა.
_ “მედალფა”, წინა ხელისუფლების დროიდან მოყოლებული, ჩართული იყო სახელმწიფო პროგრამაში. კომპანიას დავალებული ჰქონდა, ექირავებინა ფიზიკური პირი, ექიმი, დაედო ხელშეკრულება და განეხორციელებინა პროგრამა. ხარჯების 50%-ს იხდიდა სახელმწიფო, 50%-ს _ “მედალფა”. იგივე სქემა იყო სასწრაფო დახმარების სამსახურზე. თუმცა, რამდენიმე თვის წინ, “მედალფა” ამ პროგრამიდან, 218-ე დადგენილებიდან გავიდა, რადგან ეს პროექტი მათთვის წამგებიანი იყო და შესაბამისად, ფულს აღარ იხდის, _ აღნიშნა ჩვენთან საუბრისას “ავერსის” კლინიკურმა დირექტორმა, დავით მდინარაძემ.
მდინარაძის ინფორმაციით, აღნიშნულის შესახებ კომპანიამ ჯანდაცვის სამინისტრო დიდი ხნით ადრე ჩააყენა საქმის კურსში.
_ როგორც ვიცი, ამ ეტაპზე სამინისტროსა და კომპანიას შორის მიმდინარეობს მოლაპარაკება. არის საუბარი, რომ როცა მოლაპარაკება დასრულდება, თანხა, რომელიც ამ დრომდე მიუღებელი აქვთ ექიმებს, გადახდილი იქნება, მაგრამ დაზუსტებული არ არის, ვინ გადაიხდის _ სადაზღვევო კომპანია თუ სახელმწიფო. თუმცა, შეთანხმება ჯერ არ არის მიღწეული და როდის მიაღწევენ, ამაზე კომპეტენტურ პასუხს ვერ გაგცემთ, _ გვითხრა მდინარაძემ.
არადა, ჯერ კიდევ მარტში, ლანჩხუთში ჩამოსული დავით სერგეენკო ექიმებს პრობლემების მოგვარების პირობას აძლევდა:
“არ მეგონა თუ ამდენი პრობლემა დამხვდებოდა, განსაკუთრებით სოფლის ექიმის ინსტიტუტის ირგვლივ. ვეცდებით, ყველა იმ პრობლემას, რაც ამ შეხვედრაზე დაისვა, კომპლექსურად მივუდგეთ”, _ აღნიშნა ჯანდაცვის მინისტრმა ექიმებთან შეხვედრაზე.
მას შემდეგ დიდი დრო გავიდა. როგორც ჩანს, მედიკოსთა პრობლემებით ჯერ არავინ დაინტერესებულა.
_ “ვიცით”, “გვესმის”, “ყველაფერი მოგვარდება”… დავიღალეთ უკვე ამის მოსმენით. ვინმემ აგვიხსნას _ ექიმობაზე აუცილებელი და საჭირო პროფესია არის რომელიმე? გამგებელს 3 000 ლარი აქვს, დეპუტატს _ 5 000, მინისტრს _ 7 000. ჩვენ რომ 300 ლარი მაინც გვქონდეს, არ შეიძლება?! ათასებს ხომ არ ვითხოვთ?! არც კაბინეტი გვინდა და არც კომფორტული ავტომობილები. როცა ამ პროფესიაზე გავაკეთეთ არჩევანი, ყველამ ძალიან კარგად ვიცოდით, რა გვინდოდა და რას გავაკეთებდით. სახელმწიფოს ექიმების მიმართ ასეთი მონური დამოკიდებულება არ უნდა ჰქონდეს. მეტს ველოდით და ისიც არ გვაქვს რაც გვქონდა. აქ მყოფთა უმრავლესობას საბანკო კრედიტები აქვს. რა ვქნათ, რითი ვარჩინოთ ოჯახები? ექიმებს 120-130 ლარი ჩამოერიცხა, მძღოლებს ასი ლარი. ამ თანხით როგორ უნდა ვიარსებოთ?! _ ამბობენ “გურია ნიუსთან”გადაუდებელი სამედიცინო დახმარების სამსახურის ჩოხატაურის ფილიალის თანამშრომლები.
