პრემიერის არა ერთ ანონსს, რომ ის პოლიტიკიდან წავა, ცოტა ხნის წინ მიღებული გადაყვეტილება მოჰყვა, რომლის თანახმადაც ივანიშვილი საპრეზიდენტო არჩევნების შემდეგ სამოქალაქო სექტორში გადაინაცვლებს. აღნიშნული მოქმედმა მინისტრთა კაბინეტმა არაერთგვაროვნად შეაფასა. იუსტიციის მინისტრმა თეა წულუკიანმა კი განაცხადა, რომ მომავალი პრემიერის გუნდში დარჩენისთვის ორი პირობა არსებობს – მომავალი პრემიერი დაინტერესებული იყოს მასთან მუშაობით და თავად მინისტრის ინტერესი იმუშაოს იმ პრემიერთან, ვინც ბიძინა ივანიშვილის შემცველელი იქნება.
რამდენად მოსალოდნელია, რომ მოქმედი პრემიერის პოლიტიკიდან წასვლის შემდეგ მინისტრთა კაბინეტის შემადგენლობიდან ნაწილი თანამდებობის გარეშე დარჩეს და რა მიზეზებმა შეიძლება ეს განაპირობოს?
პოლოტოლოგი თორნიკე შარაშენიძე „გურია ნიუსთან“ საუბრისას ამბობს, რომ მინისტრთა კაბინეტის შემადგენლობის უმეტესობა დიდი ხანია მთავრობაში ყოფნაზე ოცნებობს და ამიტომ წარმოუდგენელია რომელიმე მათგანმა დაკავებული თანამდებობა თავისი ნებით დატოვოს. იგივე მოსაზრება აქვს პოლიტოლოგ ნინო ლაპიაშვილს, რომელიც აღნიშნავს, რომ საეჭვოა რომლიმე მინისტრი თავისი ნებით წავიდეს, თუ ახალ პრემიერთან პიროვნული შეუთავსებლობა არ ექნება.
„ძალიან მეეჭვება, რომ პრემიერს თავისი ნებით გაჰყვეს ვინმე. თუმცა, როგორც კი პრემიერი თანამდებობას დატოვებს, დაუყოვნებლივ მოხდება გადაჯგუფება, რადგან რეალურად ისინი ერთი გუნდი არასდროს ყოფილან.
„თუ დღევანდელი მინისტრთა კაბინეტიდან ვინმეს ახალ პრემიერთან პიროვნული შეუთავსებლობა აღმოაჩნდება, ამ შემთხვევაში შესაძლებელია, რომელიმე მათგანი თანამდებობის გარეშე დარჩეს. თუმცა, მიზეზი არ იქნება ის, რომ მათ მხოლოდ ამჟამინდელ პრემიერთან სურდათ მუშაობა. არ გამოვრიცხავ, რომ სუსტი ფიგურა მოვიდეს პრემიერად და მის უკან კვლავ ივანიშვილი დარჩეს, რომელიც ამ ადამიანებს შორის ისევ დააბალანსებს ურთიერთობებს . თუმცა, ყოველთვის რთულია სიტუაციის გაკონტროლება, როცა ჩრდილიდან ხდება მართვა.
„რაც შეეხება წულუკიანის განცხადებას, ვფიქრობ, მან მოვლენებს დაასწრო სანამ გაუშვებენ და თქვა, რომ თავისი ნებით მიდის. შექმნილი სიტუაციიდან გამომდინარე, თუნდაც გამოძიებების, სასამართლო პროცესების, ბევრი ხმები გამოდის, რომ წულუკიანის მუშაობასთან დაკავშირებით კითხვები და უკმაყოფილება არსებობს. ვფიქრობ, ეს თავის დაზღვევის პოლიტიკაა, რადგან როგორც გუნდი ამბობს, არავინ იცის ვინ იქნება მომავალი პრემიერი და ნებისმიერ მათგანს შეიძლება მასთან პიროვნული შეუთავსებლობა ჰქონდეს. „ – ამბობს ლაპიაშვილი.
პოლიტოლოგი სოსო ცინცაძე კი გაცილებით რადიკალურია. როგორც ის „გურია ნიუსთან“ ამბობს: „ყველაზე კარგი იქნება, პრემიერის წასვლის შემდეგ, თუ მარგველაშვილი გახდება პრეზიდენტი, პრეზიდენტმა დატოვოს თანამდებობა და ისიც პრემიერს გაჰყვეს არასამთავრობო სექტორში.
„რაც შეეხება მინისტრებს, ვერ წარმომიდგენია რომელი მინისტრი შეიძლება შეელიოს თავის პოსტს. არც სოლიდარობის მიზნით გაჰყვება ვინმე და ეს გამართლებული არც იქნება , რადგან ივანიშვილი ხომ პროტესტის ნიშნად არ მიდის პრემიერის თანამდეობიდან?!
„ეს მინისტრები ცალობის პრინციპით ყველა პრემიერის შერჩეულია, პრემიერიც ივანიშვილის მიერ იქნება შერჩეული, რაც პირდაპირ ნიშნავს, რომ მინისტრებს თუ მომავალი მთავრობის ხელმძღვანელთან პიროვნული შეუთავსებლობა არ ექნებათ, ადგილზე დარჩებიან.“ – ამბობს ცინცაძე.
