საზოგადოებისათვის გასააზრებელია ის, რომ ეს მოცემულობა არ აიღოს როგორც საზოგადოებრივი პოზიციის ინდიკატორი. ზოგადად, NDI-ს ეს კონკრეტული მუშაობა არ არის წმინდა წყლის სოციოლოგიური და სოციოლოგთათვის დამახასიათებელი. ეს უფრო საზოგადოებრივი ურთიერთობების სპეციალისტების მუშაობას გავს, რომელთაც პროპაგანდისტული ინტერესები აქვთ,” – ასე აფასებს საზოგადოებრივი კომუნიკაციების მართვის სპეციალისტი არჩილ გამზარდია NDI-ს კვლევის შედეგებს, რომელიც ორგანიზაციამ დღეს გამოაქვეყნა.
NDI-ის კვლევის თანახმად, უმნიშვნელოვანეს ეროვნულ საკითხებად სამუშაო ადგილები(63%), ტერიტორიული მთლიანობა(35%) და ხელმისაწვდომი სამედიცინო მომსახურება(29%) სახელდება. ამასთან, გამოკითხულთა 71 პროცენტი ბიძინა ივანიშვილის პოლიტიკიდან წასვლის გადაწყვეტილებას არ ამართლებს, ხოლო საპირისპიროს ფიქრობს 18 პროცენტი.
გამოკითხულთა 31 პროცენტის აზრით, 2012 წლის საპარლამენტო არჩევნების შემდეგ საქართველოში კრიმინალის დონე გაიზარდა, 45 პროცენტი მიიჩნევს, რომ არ შეცვლილა, 11 პროცენტის აზრით – შემცირდა, 13 პროცენტმა კი – არ იცის.
რაც შეეხება სამუშაო ადგილებს, გამოკითხულთა 4 პროცენტის აზრით, 2012 წლის საპარლამენტო არჩევნების შემდეგ სამუშაო ადგილები გაიზარდა, 54 პროცენტის აზრით ამ მხრივ ვითარება იგივეა, 32 პროცენტი – შემცირდა, 10 პროცენტმა – არ იცის.
რესპონდენტთა 39% მიიჩნევს, რომ საქართველო სწორი მიმართულებით ვითარდება, 16 პროცენტი კი საპირისპიროს ფიქრობს. რუსეთთან ამჟამინდელი ურთიერთობით უკმაყოფილოა გამოკითხულთა 70 პროცენტი. 73 პროცენტი დადებითად აფასებს საქართველოს მთავრობის გაცხადებულ მიზანს, გახდეს ნატო-ს წევრი.
კვლევა მიმდინარე წლის 18 აგვისტოდან 3 სექტემბრის პერიოდში ჩატარდა და საქართველოს მასშტაბით 3,838 ქართულენოვანი მოქალაქე გამოიკითხა.
კვლევის შეფასებისას არჩილ გამზარდია აცხადებს, რომ აღნიშნული ორგანიზაცია ძალიან მაღალტექნოლოგიური და მეთოდოლოგიური შესაძლებლობებით ერევა საზოგადოებრივ პროცესებში – “არა იმ მიზნებით, რომელიც მას ოფიციალურად აქვს განცხადებული, არამედ სრულიად სხვით, რომლის უკანაც ძალიან ბევრი რამაა გაურკვეველი”.
იგი მიიჩნევს, რომ კვლევაში ქართული საზოგადოება ნეგატიურ ჭრილშია წარმოდგენილი.
“საკმაოდ უცნაური დისკურსით არის დასმული შეკითხვები რელიგიურ მაჩვენებელთან დაკავშირებით. თვითონ შეკითხვა – გადაწყვეტილების მიღებისას ითვალისწინებთ თუ არა რელიგიურ საზომს, ძალიან ამორფულია. მსგავსი შეკითხვა ნებისმიერ ადამიანს ნებისმიერ ქვეყანაში რომ დავუსვათ, ძირითადად, მსგავს პასუხს გასცემს, რა დროსაც ხაზს გაუსვამს ამა თუ იმ ქვეყნის ფასეულობებსა და რელიგიურ მიდრეკილებებს. თუმცა, NDI-ს მოცემულ შეკითხვაში აქცენტი უფრო კითხვა-პასუხის ინტერპრეტირების შესაძლებლობებზეა გადატანილი, რაც ჩვენი ქვეყნის ნაციონალურ ინტერესებს შემლახველად მოევლინება.
მსგავსი კვლევის დროს შეკითხვა ყველა შესაძლო გვერდითი აღქმისაგან უნდა იყოს გაწმენდილი. აქ კი იმდენად უცნაურადაა წარმოდგენილი, რომ რასაც გინდა იმას ამოიკითხავ.
ვფიქრობ, ამით NDI-ს სურდა ეჩვენებინა, რომ საზოგადოება მართვადი სივრცეა და არაცნობიერად ხედავს, აღიქვამს და განიცდის სხვადასხვა პროცესებს. აქედან გამომდინარე, იმდენად, რამდენადაც ხალხი კონკრეტული საკითხის გადაწყვეტაში რაღაცა ფაქტორს გაუაზრებლად ითვალისწინებს, დაინტერესებული სუბიექტი თუ ინსტიტუცია სათანადო მუშაობის შემთხვევაში შეძლებს ეს სათავისოდ გამოიყენოს. ანუ ეს არის ირიბი ბიძგი საიმისოდ, რომ “ადვილად მართვადი” ქართული საზოგადოების ზეგავლენაზე მეტი მონდომებით იმუშაოს, რისი მოწმეებიც ბოლო წლებში არაერთხელ ვყოფილვართ და რომლის ძირითადი წარმომადგენლობები არასამთავრობო სექტორის სახით არის განფენილი ქვეყანაში,” _ ამბობს გამზარდია.
მისივე თქმით, თუ მონაცემებს დავაკვირდებით, ახალი ხელისუფლების ეფექტურობის საზოგადოებრივი შეფასების მაჩვენებელი უფრო დაწეულია.
“ზოგადად, რომ შევაფასოთ, მთელი პათოსი ასეთია: ჯერჯერობით არ ჩანს საზოგადოების მკვეთრი უკმაყოფილობები ამა თუ იმ საკითხის მიმართ. თუმცა, ძალიან ფრთხილად წარმოდგენილია მმართველი ძალის რეიტინგის შემცირების ტენდენცია და ეს გამოხატულია დინამიკაში, ასევე ნეგატიურად არის წარმოდგენილი მონაცემები ეროვნულ ინსტიტუტებსა და ნაციონალური ინტერესების მქონე საკითხებზე.
ამავდროულად, კვლევის შედეგები აჩვენებს, რომ საზოგადოება არაცნობიერი და საკმაოდ ლატენტურია და თუკი დაინტერესებული სუბიექტი ამ შესაძლებლობას სათანადოდ გამოიყენებს, შეუძლია საკუთარი ინტერესების შესაბამისად მართოს საზოგადოებრივი სეგმენტები.
ასეთი მონაცემების პარალელურად, კვლევითი ორგანიზაცია შანსს იტოვებს, რომ საჭიროების შემთხვევაში მათი რადიკალურობა უარყოს და სხვა შედეგების არსებობის თეორიული შესაძლებლობა დატოვოს.
კერძოდ, გამოკითხულთა იმ სეგმენტის მონაცემების ხარჯზე, რომელმაც დასმულ კითხვაზე პასუხისგან თავი შეიკავა ან კონკრეტული პოზიცია ვერ გამოხატა. ამასთან, კვლევის მონაცემები ყველა მხარისათვის ერთნაირად სასურველად მოჩანს, როგორც “ნაციონალური მოძრაობის”, ისე “ქართული ოცნებისა” თუ არასამთავრობო სივრცისათვის და მათ თითოეული სათავისოდ დაინახავს,” _ უთხრა “გურია ნიუსს” გამზარდიამ.
