_ არ მითხოვია ცესკოსთვის, რომ ორმაგი მოქალაქეობის მქონე პრეზიდენტი ვყოფილიყავი. როცა ჩემი თავი წარვადგინე, როგორც კანდიდატი, ძალიან კარგად ვაცნობიერებდი, რაც კონსტიტუციაში წერია. ვამტკიცებდი _ კანონი არ კრძალავს, რომ კანდიდატი ორმაგი მოქალაქე იყოს და რასაც კანონი არ კრძალავს, ნებადართულია. თუ მე ვიქნებოდი არჩეული, საფრანგეთის მოქალაქეობას ინაუგურაციამდე დავთმობდი. ამისთვის საჭირო დოკუმენტები საფრანგეთის საელჩოში შეტანილიც მქონდა, მაგრამ ამით არც ცესკო და არც სასამართლო არ დაინტერესებულა.
უცნაური ისაა, რომ მე მიკრძალავენ და პრემიერს არაფერს ეუბნებიან, რომელიც მხოლოდ საფრანგეთის მოქალაქეა და ამავდროულად პარლამენტი ამზადებს ცვლილებას, რომ პრემიერს, პრეზიდენტს და პარლამენტის თავმჯდომარეს მიეცეს უფლება, იყოს ორმაგი მოქალაქე.
_ როგორ ფიქრობთ, თქვენი სახით, რომელმა კანდიდატმა ჩამოიცილა გზიდან ძლიერი კონკურენტი?
_ სამივემ. მარგველაშვილმა იმით, რომ მან მეორე ტურის საფრთხე აიცილა. ბურჯანაძემ _ მეორე ადგილის კონკურენტი, რისთვისაც ის რეალურად იბრძვის, რათა მეტი შანსები ჰქონდეს საპარლამენტო და თვითმმართველობის არჩევნებზე. ბაქრაძემ კი ჩემი სახით აიცილა ერთადერთი კონკურენტი თავის დასავლურობაში.
სამივე ეს კანდიდატი ერთი და იგივე მოვლენაა საქართველოსთვის, სადაც არ ჩანს არც დასავლურობა, არც დემოკრატიულობა და არც საქართველოს წინსვლა. მე ამ რეალურ სამ კანდიდატს შორის, არც ერთს არ ვუჭერ მხარს. დანარჩენი კანდიდატები კი მხოლოდ ფარსია. მათი ვინაობის გაგებაც კი რთულია, არათუ პოლიტიკური მიმართულებისა და იდეოლოგიის.
_ კონსტიტუციით მომავალ პრეზიდენტს თითქმის არც ერთი ის უფლებამოსილება არ რჩება, რაც აქამდე ჰქონდა. რა იყო თქვენი მთავარი მიზანი, როცა გსურდათ საპრეზიდენტო არჩევნებზე გეყარათ კენჭი?
_ პრეზიდენტი დიპლომატიურ ასპარეზზე იქნება. მე კი ამ მხრივ ჩემი კონტაქტებითა და გამოცდილებით, ბევრი რამის გაკეთება შემეძლო. მსურდა საქართველოს ინტერესები საზღვარგარეთ უკეთ დამეცვა, რაც დღეს საერთოდ არ ხდება.
_ თქვენი შეფასებით, რა მდგომარეობაშია ქვეყნის საგარეო პოლიტიკა. თუ შეიმჩნევა რაიმე მიღწევები, თუნდაც, რუსეთთან მოლაპარაკებების დაწყებით?
_ რუსეთთან მიმართებაში ჩვენ საგარეო პოლიტიკა არ გაგვაჩნია. არ შეიძლება საზღვრების გადმოწევა ხდებოდეს, ჩვენ კი ვამბობდეთ, რომ მანდარინების ხარჯზე პოლიტიკას ვაწარმოებთ. ჩვენ ვართ კონფრონტაციაში, რაც სააკაშვილის გაცხადებული პოლიტიკა იყო. რეალური იყო თუ არა, არ ვიცი, მაგრამ იყო კონცეფცია. დღეს კი ეს კონცეფციაც არ არსებობს. არ ვიცით ქვეყნის პრემიერის თავში რა აზრი დაიბადება და რაში ხედავს რუსეთთან ურთიერთობების მოგვარებას. საით მივდივართ ჩვენი პოლიტიკით, გაურკვეველია. გადაწყვეტილება სასწრაფოდ უნდა მივიღოთ, რომ ვიცოდეთ, სად ვდგევართ და რა გვინდა. ამ გაურკვევლობით უცხოეთში გაუგებრობის სურათს ვქმნით, რასაც მათი მხრიდან უნდობლობა მოჰყვება.
_ პრემიერის პოლიტიკიდან წასვლის შესახებ განცხადებას როგორ შეაფასებთ?
_ დემოკრატიული პრინციპების მიხედვით, გაუგებარია მისი ასე წასვლა. ის იქნა არჩეული გარკვეული ვადით და ანგარიშვალდებულია თავისი ამომრჩევლის წინაშე. დემოკრატიის პრინციპი ასეთია: მე ვარ ამომრჩეველი, გაძლევ დროებით მანდატს და შენ, როცა ეს დრო გავა, ანგარიში უნდა ჩამაბარო. როცა ეს პრინციპი ირღვევა, დემოკრატიაც ირღვევა. ამის გაკეთება მხოლოდ განსაკუთრებულ სიტუაციებში შეიძლება. გარდა ამისა, თუ მიდის, მას არ აქვს უფლება, რომ დანიშნოს პრემიერი, რომელიც დარჩება. ჩვენ მონარქიაში არ ვართ, სადაც პირადი დანიშვნები ხდება ხელისუფლებაში.
_ რა შანსები არსებობს იმის, რომ 2014 წლის თვითმმართველობის არჩევნებში მიიღოთ მონაწილეობა?
_ არ ვიცი, რა სიტუაცია იქნება ივანიშვილის წასვლის შემდეგ. ვნახოთ, სად დავინახავ ჩემს თავს. ქართულ პოლიტიკაში ვრჩები და საქართველოშიც. მივიღებ თუ არა თვითმმართველობის არჩევნებში მონაწილეობას, ჯერ არ ვიცი.
