“ისე ცუდად ვარ, სასწრაფოს სასწრაფოზე ვიძახებ”

(გურია ნიუსი, ლანჩხუთი) _ ჩვენი წყაროს ინფორმაციით, სამართალდამცავები ლანჩხუთელი “შეფიცულების” ვინაობის დადგენას ცდილობენ, რათა შემდეგ, მათი, მინიმუმ, დაკითხვა მოხდეს. რა თქმა უნდა, არც ის არის გამორიცხული, რომ “შეფიცულების” ნაწილი დააკავონ კიდეც. როგორც ჩანს, “სახელმწიფო გადატრიალების” “გასაპრავებლად” სწორედ “შეფიცულების” არსებობა სჭირდებათ. მართალია, თავის დროზე ოფიციალურად გაცხადდა, რომ “სახალხო კრებას” გურიაში, და მათ შორის, ლანჩხუთში, ათეულობით “შეფიცული” ჰყავდა, მაგრამ საქმე საქმეზე რომ მიდგა, ეს ხალხი სამართალდამცველებმა ვერ მოიძიეს იმ უბრალო მიზეზის გამო, რომ რეალურად არანაირი “შეფიცული” გურიაში არ გვყავს! ამის მიზეზი, სავარაუდოდ, ის არის, რომ დიდი რეკლამის მიუხედავად, ბურჯანაძემ ასეთი ადამიანების შემოკრება ვერ შეძლო. ამასთან, არც ის არის გამორიცხული, რომ ზემდგომებს სიებს მოვალეობის მოხდის მიზნით უგზავნიდნენ. თუმცა, სხვა მიზეზიც ყოფილა, რის შესახებაც ოპოზიციონერმა ლელა ნაცვალაძემ ჩვენს გაზეთს უკვე უამბო.

როგორც იცით, “საახალხო კრების” ლანჩხუთის ოფისის ხელმძღვანელი გია გურგენაძე თბილისში, დემონსტრაციის დარბევისას დააკავეს, ხოლო დანარჩენი ლიდერების მიმართ გამოძიებას ჯერ კითხვები არ გასჩენია. რატომ “ერიდება” სამართალდამცავ ორგანოებს ლანჩხუთელი ოპოზიციონერების თუნდაც დაკითხვა, ჯერჯერობით ამის შესახებ არაფერია ცნობილი.

ჩვენ დავუკავშირდით აქციაზე დაშავებულ მაკა კვირკველიას: _ ძალოვანი სტრუქტურებიდან ჩემთვის არავის დაურეკავს. არც ის გამიგია, რომ ვინმეს ამ მხრივ პრობლემა აქვს ლანჩხუთში. ძალიან ცუდად ვარ _ ფეხი ხომ მოვიტეხე და ეტყობა გაზის შესუნთქვის გამო, თავის საშინელი ტკივილები მაქვს, სასწრაფო დახმარებას ლამის ყოველ მეორე დღეს ვიძახებ, უკვე მრცხვენია კიდეც დარეკვა. 20-დღიანი მკურნალობის კურსი დამინიშნეს, წოლითი რეჟიმი მაქვს. რაც შეეხება მოტეხილ ფეხს, ორ თვეში კიდევ ერთი ოპერაცია დამჭირდება, _ გვითხრა კვირკველიამ.