“თანაინვესტირების ფონდის პარალელურად ჩვენ ვაფუძნებთ ვენტურულ ფონდს, რომელიც ინოვაციურ პროექტებს დააფინანსებს. ჩვენ საპარტნიორო ფონდის ბაზაზე დავაფუძნებთ სუვერენულ ფონდს, რომელიც იქნება უფრო დახვეწილი და გასაგები ინვესტორებისთვის, სამივე ფონდის დაფუძნება დამატებით სტიმულს მისცემს საქართველოში ინვესტიციების შემოდინებას. ეს არ არის საკმარისი, აუცილებელია ეკონომიკური სტაბილურობა, რათა ბიზნესი იყოს დამოუკიდებელი და ხელშეუხებელი,” _ განაცხადა ივანიშვილმა.
პრეზენტაციას ესწრებოდა ფინანსთა მინისტრი ნოდარ ხადურიც, რომელმაც აღნიშნა, რომ ამით მნიშვნელოვან საქმეს ჩაეყარა საფუძველი.
“ფონდის კაპიტალი კიდევ უფრო გაიზრდება. ჩვენ ყოველთვის ვამბობდით, რომ აღნიშნული პროექტის დახმარებით, 3-4 წლის განმავლობაში საქართველოში 10-12 მლრდ დოლარის ინვესტიცია განხორციელდება. ფონდი ძალიან დაეხმარება ჩვენი ქვეყნის ეკონომიკის განვითარებას,” _ აღნიშნა ფინანსთა მინისტრმა ნოდარ ხადურმა.
კერძო საინვესტიციო ფონდი პოტენციურ ინვესტორებს საქართველოში პირდაპირი ინვესტიციების განსახორციელებლად ხელსაყრელ პირობებსა და განსაკუთრებულ შესაძლებლობას სთავაზობს. ფონდი საქართველოს პრემიერ-მინისტრის, ბიძინა ივანიშვილის ინიციატივითა დაფუძნდა.
ფონდისთვის პრიორიტეტული მიმართულებებია: ენერგეტიკა, ტურიზმი და სოფლის მეურნეობა. ამ დროისთვის, ახალდაფუძნებულ თანაინვესტირების ფონდში მოზიდული კაპიტალი ექვსი მილიარდი აშშ დოლარია.
ფონდის საქმიანობას წარმართავენ: გიორგი ბაჩიაშვილი, საქართველოს თანაინვესტირების ფონდის აღმასრულებელი დირექტორი; ცოტნე ებრალიძე, საქართველოს თანაინვესტირების ფონდის მმართველი დირექტორი ტურიზმისა და უძრავი ქონების სექტორებში; გიორგი კიკვაძე, საქართველოს თანაინვესტირების ფონდის მმართველი დირექტორი სოფლის მეურნეობისა და ლოჯისტიკის სექტორებში; ირაკლი მენაბდე, საქართველოს თანაინვესტირების ფონდის მმართველი დირექტორი ენერგეტიკის, ინფრასტრუქტურისა და მრეწველობის სექტორებში.
