“მერცხალის” წარუმატებლობის მიზეზი _ არასაკმარისი ხელფასები თუ გაბერილი შტატები

მათი სახელფასო ანაზღაურება ყოველთვიურად 15 250 ლარს შეადგენს, ყოველწლიურად კი ოზურგეთის მუნიციპალიტეტის ბიუჯეტიდან 250 000 ლარამდე თანხით ფინანსდება.

კლუბის თანამშრომელთა ხელფასის რაოდენობა ასეთია: “მერცხალის” დირექტორი გია გოგუა _ 900 ლარი; ადმინისტრატორი ლევან გაგუა _ 450 ლარი; უფროსი მწვრთნელები სოსო გაგუა და ამირან ვანიძე _ 600 ლარი; ხარიტონ ჩხატარაშვილი, ახალგაზრდა ფეხბურთელთა მწვრთნელი _ 850 ლარი; მიხეილ ქობულაძე, მოთამაშე მწვრთნელი _ 600 ლარი; ნესტან მუხაშავრია, ბუღალტერი _ 500 ლარი; ირაკლი მურუსიძე, ფეხბურთელი _ 300 ლარი; გიორგი გოგუა, ფეხბურთელი _ 200 ლარი; სერგო ჩიგოგიძე, ფეხბურთელი _ 400 ლარი; თემურ ჩხატარაშვილი, ფეხბურთელი _ 400 ლარი; მალხაზ მუჯირი, ბოხვაურის სტადიონის მეთვალყურე _ 375 ლარი; სერგო ჩიგოგიძე, ფეხბურთელი _ 400 ლარი; ლაშა კოტრიკაძე, ფეხბურთელი _ 200 ლარი; საშა სკამკოჩაიშვილი, ექიმი _ 300 ლარი; იური ჩხაიძე, მწვრთნელი _ 500 ლარი; ირაკლი ბაჯელიძე, ფეხბურთელი _ 375 ლარი; აკაკი ათუაშვილი, მწვრთნელი _ 550 ლარი; გიორგი მექვაბიშვილი, ფეხბურთელი _ 375 ლარი; სოსო გაგუა მთავარი მწვრთნელი _ 650 ლარი; გოგიტა ხამაშურიძე, მწვრთნელი _ 375 ლარი; ლევან ათუაშვილი, ფეხბურთელი _ 400 ლარი; ილია ხეცურიანი, ფეხბურთელი _ 125 ლარი; არჩილ ლიპარტელიანი, მწვრთნელი _ 500 ლარი; გედევან პაპკოვი, ფეხბურთელი _ 125 ლარი; მირიან გაგუა, მწვრთნელი _ 400 ლარი; ვახტანგ ჩხაიძე, ფეხბურთელი _ 400 ლარი; კახაბერ როხაძე, მეკარეების მწვრთნელი 500 ლარი; გიორგი მალაზონია, ფეხბურთელი _ 375 ლარი; ნიკოლოზ ხინთიბიძე, ფეხბურთელი _ 375 ლარი; გიგა გობრონიძე, ფეხბურთელი _ 400 ლარი; გიგა ქარჩილაძე, ფეხბურთელი _ 400 ლარი; ჯემალ პაპავა, ფეხბურთელი _ 300 ლარი; გიორგი გოგუაძე, ფეხბურთელი _ 300 ლარი; გიორგი ცერცვაძე, ფეხბურთელი _ 200 ლარი; დავით სურგულაძე, ფეხბურთელი _ 400 ლარი; გოჩა წივწივაძე, მწვრთნელი _ 500 ლარი; ლაშა ესაძე, ფეხბურთელი _ 125 ლარი; რობიკო ჭაფოძე, ფეხბურთელი _ 125 ლარი.

საზოგადოებაში დიდ უკმაყოფილებას იწვევს ის ფაქტი, რომ “მერცხალი” ბოლო თვეების განმავლობაში ყველა თამაშს აგებს. ამასთან დაკავშირებით ჩვენ ვესაუბრეთ კლუბის დირექტორს, გია გოგუას და მთავარ მწვრთნელს სოსო გაგუას, რომელსაც, ჩვენი წყაროს ინფორმაციით, გუნდიდან წასვლაზე განცხადებაც კი აქვს დაწერილი. წყაროს თქმით, ამდენი თამაშის წაგების გამო, შესაძლოა, გუნდის დირექტორს _ გია გაგუასაც დაატოვებინონ თანამდებობა. თუმცა, ისინი ჩვენთან საუბარში ამას არ ადასტურებენ.

_ ბატონო გია, ამბობენ, რომ ფეხბურთელები არათანაბარ პირობებში არიან. რა არის ამის მიზეზი?

გია გაგუა: _ ეს საერთოდ ასე ხდება ფეხბურთში, ასეა მიღებული და პრობლემა არ არის. ეს არის დამოკიდებული ფეხბურთელის დონეზე.

_ რამდენი ლარით ფინანსდება ბიუჯეტიდან კლუბი და რას ხმარდება ეს თანხა?

_ 245 000 ლარით ფინანსდება, მაგრამ აქ შედის საწევროები _ 20 000 ლარი ფეხბურთის ფედერაციაში ირიცხება. ასევე, არის იმერეთის ფეხბურთის ფედერაციაში შესატანი ჩვენი კლუბის საწევრო _ 6 000 ლარს, 25 000 ლარია გამოყოფილი ტრანსპორტის შესაძენად. ასევე, დაბა ურეკში გვყავს კლუბი და ა.შ. ხელფასს იღებს 38 თანამშრომელი. აქედან 12 მწვრთნელია, 22 ფეხბურთელი და დანარჩენი ხელმძღვანელობა.

_ რამდენი თამაში გქონდათ და რა შედეგით დაასრულეთ?

_ ოთხი თამაში გვქონდა და ოთხივე წავაგეთ. აქედან სამი გასვლითი მატჩი იყო, თუმცა, ეს ჩვენთვის დიდ ტრაგედიას არ წარმოადგენს, არც რესურსი გვაქვს მოგებისთვის, არც სტადიონი გვაქვს ნორმალური. შესაძლებლობის მაქსიმუმს ვაკეთებთ, სტადიონს ვუფრთხილდებით, რომ შევინარჩუნოთ. კი, საწყენია, რომ ყველა თამაში წავაგეთ, გასვლითებიც და სახლშიც, მაგრამ ყველაფერი კარგად იქნება. ახლა 30-ში გვაქვს კიდევ ერთი თამაში და იმედი გვაქვს, რომ მოვიგებთ. მერე წარმატებები გვექნება. ჩვენ არ გვაქვს ზედა ლიგაში გადასვლაზე პრეტენზია. მაგას რომ მოინდომებს გუნდი, სათანადო ინფრასტრუქტურა უნდა ჰქონდეს შექმნილი, ჩვენ კი არ გვაქვს. გუნდში, ყველა ასაკობრივ ჯგუფში ადგილობრივი ბიჭები გვყავს, არც ერთი ჩამოსული არაა.

_ ბატონო გია, როგორც ამბობენ, ამ წაგებების გამო, მწვრთნელს სოსო გაგუას განცხადება აქვს დაწერილი, ასევე, შეიძლება, გაგათავისუფლონ თქვენც.

_ ვინ გითხრათ? სოსომ გითხრათ თვითონ? ასე არ ყოფილა, უბრალოდ, ამირან ვანიძე ხელმძღვანელობს გუნდს და სოსო ეხმარება, ჩვენ ვისაუბრეთ და დროებით ამირანი შეასრულებს მის ფუნქციას. ეს მოხდა ურთიერთშეთანხმებით _ რადგან იყო წაგების სერიები, სოსომ თავისით გამოხატა ამის სურვილი. როგორ შეიძლება ამათი სადმე წასვლა და იგნორირება? აქ არის ყველა ადგილობრივი ფეხბურთელი და ჩვენ არ გვჭირდება ვინმე ჩამოსული.

სოსო გაგუა: _ ვინ გითხრათ, რომ განცხადება დავწერე? ჩემთვის არავის უთქვამს, რომ უნდა დავწერო განცხადება. გუნდი რომ სულ აგებს, ეს მარტო ჩვენი ბრალი არაა.

_ ვისი ბრალია?

_ ხუთი ძლიერი ფეხბურთელი წავიდა გუნდიდან და ესაა მიზეზი.

_ რატომ წავიდა?

_ არ ჰქონდა გუნდს შესაძლებლობა იმის გადახდისა, რამდენიც მათ სურდათ. დიდ ფულს ითხოვდნენ.

_ თქვენ ხომ გაფინანსებთ ადგილობრივი ბიუჯეტი? არაა საკმარისი?

_ კი გვაფინანსებს, მაგრამ ეს რომ ფეხბურთის გუნდს ჰყოფნიდეს, მაშინ რაღა გვექნება ნაკლი? ჩვენს ფეხბურთელებს მაქსიმუმ, 400 ლარი აქვთ ხელფასი, მეტი არა და ეს არ ჰყოფნის კარგ ფეხბურთელს..

_ ბატონო სოსო, როგორც ვიცით, ძალიან ბევრი ისეთი თანამშრომელი გყავთ, სულ რომ არ არის საჭირო. ამის ხარჯზე რომ ფეხბურთელებს რომ გაუზარდოთ ხელფასი, არ შეიძლება?

_ ზედმეტი შტატების დაშვება ჩემი საქმე ნამდვილად არაა. ეს კითხვა სხვას უნდა დაუსვათ, _ გვითხრა სოსო გაგუამ.