კვლევა დაადგენს ან უარყოფს დანაშაულის სისტემურობას, ხასიათს, წამების ინიციატორებს, გამომწვევ მიზეზს და მიზანს.
როგორც Human Rights Watch-ის მკვლევარი გიორგი გოგია ამბობს ხელისუფლებასთან ერთად პასუხი საზოგადოებამაც უნდა აგოს, რომელმაც წლების განმავლობაში ვერ შეძლო “ამ უბედურების თავიდან აცილება”.
ყოფილი სახალხო დამცველი გიორგი ტუღუში “გურია ნიუსთან” ამბობს, რომ ყოველთვის ღირსეულად ასრულებდა მოვალეობას და ბრალდებას ხელისუფლებასთან გარიგების ან წამების ფაქტების მიჩქმალვის შესახებ არ მიიღებს.
“აბსოლუტურად ადეკვატური იყო ჩემი ანგარიშები. დღესაც თუ ჩახედავთ ამ ანგარიშებს, ის სრულ რეალობას ასახავდა. რა თქმა უნდა, ამის მერე იყო ბევრი სპეკულაცია იმაზე, რომ იქ ბევრი ისეთი რაღაც ხდებოდა, რაც ომბუცმენის ანგარიშის მიღმა რჩებოდა. ეს ასე არ იყო. მე ფირები არ გამაჩნდა და ამ ფირებს არავინ მომცემდა, თუმცა, ვისაც კითხვა არ ეზარება, შეუძლია გადაშალოს 2010-2011 წლის ანგარიშები და ნახოს რა არის იქ ასახული. რაც შეეხება დამატებით ფაქტებს, რომელთა ნაწილი რეალობასთან ახლოს მდგომია, ნაწილი კი სავარაუდოდ გამოგონილი, ამას ყველაფერს სჭირდებოდა გამოძიება, რომელიც სამწუხაროდ არ ჩატარდა”, _ განმარტავს ტუღუში და დასძენს, რომ პროკურატურას ომბუცმენის ბოლო სამი წლის ანგარიშებში მოყვანილი ფაქტებიც კი არ გამოუძიებია. რაც შეეხება “წამებას”, რომელიც გავრცელებული მოსაზრებით, ტუღუში უფრო მსუბუქი ფორმულირებით ნიღბავდა, პროკურატურას არც ამ მიმართულებით აქვს რეალური შედეგები.
“თუ წამება იყო სისტემური, მაშინ პროკურატურამ გასცეს იმას პასუხი, თუ რატომ წარმართა სასამართლოში უმეტესი საქმეები ღირსების შემლახავი, არადამიანური მოპყრობის კუთხით და მხოლოდ 5-6 საქმე წამების მუხლით და რატომ შეუმსუბუქა სასჯელი პირებს, რომლებიც დაკავებულები იყვნენ ჯერ კიდევ წინა ხელისუფლების პირობებში. ასევე თუ გაუპატიურებები სისტემური იყო , ერთი პირი მაინც თუ არის დასჯილი ამის გამო. ძალიან საინტერესოა”,_ ამბობს ტუღუში.
მთავარი პროკურატურის დეპარტამენტის ხელმძღვანელი კახა წერეთელი ყოფილი სახალხო დამცველის და არასამთავრობო ორგანიზაციების ბრალდებას პროკურატურის არაეფექტური მუშაობის შესახებ სტატისტიკით პასუხობს.
“პასუხისგებაში ციხის 50 თანამშრომელია მიცემული, მათ შორის წამების მუხლითაც. რაც შეეხება გაუპატიურებას, რამდენადაც მე მახსოვს, ხუთი პირია ამ მუხლით პასუხისგებაში მიცემული”, _ ამბობს წერეთელი “გურია ნიუსთან”.
პროკურატურის მიერ მოწოდებული სტატისტიკის მიხედვით ე.წ. “ციხის კადრების” გასაჯაროვებიდან მიმდინარე წლის 31 აგვისტოს ჩათვლით გამოძიება დაიწყო წამების 28 ფაქტზე და დამამცირებელი და არაადამიანური მოპყრობის 118 ფაქტზე.
სამართლებრივი დევნა დაწყებულია 51 პირის მიმართ. წამება – 12 პირი. დამამცირებელი და არაადამიანური მოპყრობა – 26 პირი/
ორივე დანაშაული ერთობლიობაში – 8 პირი
წამება, რომელსაც თან ახლდა სექსუალური ძალადობა – 5 პირი
დამდგარი განაჩენების სტატისტიკა კი ასე გამოიყურება:
გამამტყუნებელი – 21
გამამართლებელი – 1
პასუხისმგებლობისგან გათავისუფლდა 1( ბედუკაძე)
შეწყდა დევნა 1 პირის მიმართ
პასუხისგებაში მიცემული სასჯელაღსრულების დეპარტამენტის თანამშრომლები:
ხელმძღვანელი პირები – 27
დაბალი რანგის მოხელები – 24
