ნეპოტიზმი ლათინური სიტყვაა და მეგობრებისა და ნათესავებისათვის, მათი დამსახურების მიუხედავად, განსაკუთრებული პრივილეგიების მინიჭებას ნიშნავს.
გურიაში ეს სიტყვა უცხო არავისთვის არის. პირიქით _ თამამად შეიძლება ითქვას, რომ ნეპოტიზმი ჩვენ მხარეში ძალზე მოდურია. დედა-შვილი, ცოლ-ქმარი, ბიძა-დისშვილი, რძალ-მული, მაზლი, მაზლის ცოლი და სხვა ნათესავები _ ასეთია დღევანდელი საჯარო დაწესებულებების საშტატო შემადგენლობა. მოკლედ რომ ვთქვათ, გურიაში, საჯარო სამსახურები ლამისაა “ოჯახურ ბიზნესად” იქცეს _ აქ თანამდებობებზე ინიშნებიან არა კვალიფიკაციის მიხედვით, არამედ გავლენიანი ახლობლების წყალობით და ალბათ ამის შედეგია, რომ საჯარო დაწესებულებები არაკვალიფიციური კადრებით არის სავსე.
მიუხედავად იმისა, რომ კვალიფიციური კადრების სიმცირეს, როგორც სამხარეო ადმინისტრაციაში, ისე გურიის სამივე მუნიციპალიტეტში უჩივიან, არც ერთი მათგანი, ვითარების გამოსასწორებლად კონკრეტულ ნაბიჯებს არ დგამს.
არც თუ დიდი ხნის წინ, ჩვენ ჩოხატაურის მუნიციპალიტეტის გამგეობაში შესული დასაქმების მსურველთა განცხადებების ავტორები გაგაცანით. ბევრი მათგანის ბიოგრაფია მართლაც რომ შთამბეჭდავი იყო, თუმცა შთაბეჭდილება ისევ ქაღალდებს შემორჩა. ჩოხატაურში მცხოვრები ანა შარაშენიძე, ჩაისუბანში ბაღის გახსნის შემთხვევაში, გამგის პოსტზე მისი კანდიდატურის გათვალისწინებას ითხოვდა. შარაშენიძის განცხადებას თან ერთვოდა პროფესიულ დონეზე შევსებული ბიოგრაფია, სადაც მითითებული იყო, რომ მას ორი უნივერსიტეტი, რამდენიმე საზაფხულო სკოლა ჰქონდა დამთავრებული და მენეჯმენტის სფეროში ტრენინგებზე იყო ნამყოფი საზღვარგარეთ.
ჩაისუბანში ბაღი სულ ახლახან გაიხსნა, თუმცა, როგორც შევიტყვეთ, შარაშენიძე არ დაუსაქმებიათ _ მიზეზად გუბერნატორის სიტყვიერი ბრძანება დასახელდა. ჩვენი წყაროს ინფორმაციით, შარაშენიძეს სამსახურზე უარის თქმა ურჩიეს და ქმრის, რომელიც პროფესიით იურისტი ყოფილა, დასაქმებას დაჰპირდნენ: “ასეთია გუბერნატორის ბრძანება _ საჯარო სამსახურში ერთი ოჯახიდან ორი წევრი არ უნდა მუშაობდეს!” _ უთქვამთ ქალბატონი ანასთვის. შარაშენიძე ამ თემაზე კომენტარს არ აკეთებს, თუმცა ამ ინფორმაციას არც უარყოფს. რაც შეეხება მის მეუღლეს, მალხაზ ოსეფაიშვილს, მას, თურმე, გამგეობის იურიდიული სამსახურის უფროსის თანამდებობას უკვე 4 თვეა პირდებიან.
გურიის გუბერნატორი, ვალერი ჩიტაიშვილი ჩვენთან საუბრისას ამბობს, რომ მსგავსი არაფერი უთქვამს და ადამიანები თანამდებობებზე მხოლოდ და მხოლოდ პროფესიონალიზმით უნდა ინიშნებოდნენ.
_ რაც შეეხება ჩაისუბნის საბავშვო ბაღის ხელმძღვანელს და ამ კანდიდატურასთან დაკავშირებულ სხვა ნიუანსებს, ვერაფერს გეტყვით, რადგან არანაირ ინფორმაციას ამ საკითხზე არ ვფლობ, _ დაგვიზუსტა ჩიტაიშვილმა.
გუბერნატორისგან განსხვავებით, ჩაისუბნის ბაღის ახალ დანიშნული დირექტორის ნინო ბერაძის შესახებ კარგად ფლობენ ინფორმაციას ჩოხატაურის მუნიციპალიტეტის გამგეობაში _ ბერაძეს, ჩოხატაურის მუნიციპალიტეტის საორგანიზაციო სამსახურის უფროსთან, დავით ჯინჭარაძესთან ნათელ-მირონობა აკავშირებს. აღსანიშნავია ისიც, რომ ახალი გამგე ასევე ახლობლობს ბაღების გაერთიანების ხელმძღვანელთან ნინო ბარამიძესთან. ამ უკანასკნელს, როგორც ჩანს, საკუთარი ახლობლების დასაქმება ჰობად ექცა, რადგან არც თუ დიდი ხნის წინ, #1 საბავშვო ბაღში, რეზერვი მასწავლებლის შტატი საკუთარი შვილისთვის დაუშვა და იმავე ბაღში, ნახევარ განაკვეთზე, საკუთარი ძმის ცოლის დანიშვნის ბრძანებასაც მოაწერა ხელი.
უნდა ითქვას ისიც, რომ მუნიციპალიტეტებში კანონს და შტატებს სიტუაციას არგებენ. ასე მოხდა მაშინ, როდესაც ჩოხატაურის მუნიციპალიტეტის საორგანიზაციო სამსახურის უფროსად დავით ჯინჭარაძე დაინიშნა _ ჯინჭარაძის მეუღლისთვის, თამთა ჯანხოთელისთვის შტატი გამგეობის კულტურის სამსახურში დაუშვეს.
მხოლოდ მიმდინარე წელს, მხოლოდ ჩოხატაურის მუნიციპალიტეტის გამგეობაში 10 ადამიანი დასაქმდა საშტატო განაკვეთით. ზოგისთვის ძველი შტატი გამოინახა, ზოგისთვის სპეციალურად შექმნეს _ ლევან ჩხიკვაძე, სოფიკო ჩხიკვაძე, მამუკა სანიკიძე, გივი ანთიძე, ლელა ნინიძე, მანანა ძნელაძე, ნუგზარ მგელაძე, ივანე ცინცაძე, ზაალ ბერძენიშვილი გამგეობის თანამშრომლები არიან. მათი უმრავლესობა ახალი სახე არ არის და არც ერთი მათგანის დანიშვნაზე კონკურსი არ გამოცხადებულა. უფრო მეტიც, ნოდარ თედორაძე, რომელიც შესყიდვების სამსახურის სპეციალისტად არის გაფორმებული, სინამდვილეში ჩოხატაურის მუნიციპალიტეტის საკრებულოს თავმჯდომარის ანტონ ხუნდაძის მძღოლია; ეკონომიკის სამსახურის სპეციალისტად გაფორმებულ მანანა ძნელაძეს კი, რომელიც სხვებისგან განსხვავებით, საკუთარი კაბინეტით სარგებლობს, სოფლის მეურნეობის დარგს არაოფიციალურად აბარებენ. უფრო დაზუსტებით კი, სწორედ ძნელაძეს ჰქონდა ჩაბარებული ჰიბრიდული სიმინდის მარცვლის გასაღება.
ჩოხატაურის მუნიციპალიტეტის გამგეობას ხელშეკრულებით 4 პირი ჰყავს აყვანილი. ამავე პირობით აყვანილი პირების სიმრავლე არასამეწარმეო იურიდიულ პირებშიც შეიმჩნევა. გამგეობის მსგავსად, ყველა აიპ-ში შტატების მატებაა ჴ რა თქმა უნდა ნაცნობობის გათვალისწინებით.
ნეპოტიზმი არც ოზურგეთშია უცხო, თუმცა არა იმ მასშტაბებით, როგორც ჩოხატაურში. ნათესაური არა, თუმცა, მეგობრული კავშირები ყვავის ოზურგეთის მუნიციპალიტეტის საკრებულოში _ თავმჯდომარედ არჩევისთანავე, ალეკო მამეიშვილმა, აპარატის უფროსად, ბავშვობის მეგობარი, ალეკო ბურჭულაძე დანიშნა. ასევე მეგობრობით და ძმაკაცობის პრინციპით შეირჩა კადრები ოზურგეთის მუნიციპალიტეტის საკრებულოს და გამგეობის მიერ დაფუძნებულ არასამეწარმეო იურიდიულ პირებში. გამონაკლისი არც ლანჩხუთია, სადაც კადრებს ასევე ახლობლობის გათვალისწინებით ნიშნავენ თანამდებობებზე.
