ერთობლივი კონფერენციის ჩატარების აუცილებლობა მას შემდეგ დადგა, რაც ნონა უბილავამ დევნილთა და განსახლების მინისტრი, დავით დარახველიძე გულგრილობაში დაადანაშაულა და მის წინააღმდეგ სისხლის სამართლის საქმის აღძვრა მოითხოვა.
“აფხაზეთში ცხოვრობს დაახლოებით 50 ათასამდე დევნილი, რომელთაც რეგისტრაციისთვის ზუგდიდში გადმოსვლა სჭირდებათ. ეს ერთ ადამიანს დაახლოებით 60 ლარამდე უჯდება, რაც მთლიანობაში 3 მილიონ ლარზე მეტია. ზარალი იქ მცხოვრებმა მოსახლეობამ უნდა ნახოს. დევნილთა რეგისტრაციის შემოწმებაზე მხოლოდ 100 ადამიანის მონაცემები არ დაემთხვა და ამის გამო აფხაზეთში მცხოვრებ მოქალაქეებს მსგავსი პრობლემები მთავრობამ არ უნდა შეუქმნას,” _ აცხადებს უბილავა.
უბილავას განცხადებას გამოეხმაურა დევნილთა და განსახლების სამინისტრო.
“ნონა უბილავას დევნილთა რეგისტრაციის საკითხზე სრული ინფორმაცია არ აქვს. ოკუპირებულ ტერიტორიაზე დევნილთა რეგისტრაცია “წითელი ჯვრის” დახმარებით ჩატარდება. სწორედ იმიტომ, რომ საზოგადოება ინფორმირებული იყოს, ერთობლივი პრესკონფერენცია გაიმართება, სადაც ჩვენი სამმართველოს უფროს ირაკლი ქოჩუასთან ერთად ნონა უბილავა ჟურნალისტებს შეხვდება და სწორ ინფორმაციას გაავრცელებენ,” _ განაცხადეს სამინისტროში.
